Zaburi 11 - Bibiliya Ijambo ry'imana D

Kwiringira Uhoraho

¹ Zaburi y'umuyobozi w'abaririmbyi. Ni iya Dawidi. Uhoraho ni we mpungiyeho. None se kuki mumbwira muti: “Ihute nk'inyoni uhungire ku misozi,

² dore abagome bitwikiriye umwijima, babanze imiheto batamika imyambi, barafoye ngo barase intungane.”

³ None se igihe ibintu byadogereye, intungane yakora iki?

⁴ Uhoraho aganje mu Ngoro ye nziranenge, koko Uhoraho yicaye ku ntebe ye ya cyami mu ijuru, agenzura abantu akamenya ibyabo.

⁵ Uhoraho agenzura intungane n'abagome, abanyarugomo abanga urunuka.

⁶ Abagome abarahuriraho amakara yaka, abagushaho amazuku n'umuyaga utwika. Ngibyo ibihano bazahanishwa.

⁷ Erega Uhoraho ni intungane, akunda abakora ibitunganye, intungane ni zo zizamureba imbonankubone!