Zaburi 29 - Bibiliya Ijambo ry'imana

Ijwi ry'Uhoraho

¹ Zaburi ya Dawidi. Mwa bana b'Imana mwe, nimwogeze Uhoraho, nimwogeze Uhoraho kubera ikuzo n'ububasha afite.

² Nimwogeze Uhoraho kubera ikuzo afite, nimumwikubite imbere mumuramye kubera ko ari umuziranenge.

³ Uhoraho arangururiye hejuru y'inyanja, Imana nyir'ikuzo iranguruye ijwi nk'iry'inkuba ihinda, koko Uhoraho arangururiye hejuru y'inyanja ngari.

⁴ Uhoraho aravuga aranguruye, ijwi rye riranga icyubahiro cye.

⁵ Uhoraho aravuga ibiti by'inganzamarumbu bigasatagurika, aravuga amasederi y'inganzamarumbu yo muri Libani akavunagurika.

⁶ Ibisi bya Libani byikinagura nk'inyana z'imitavu, umusozi wa Herumoni ukikinagura nk'icyana cy'imbogo.

⁷ Uhoraho aravuga imirabyo ikarabya,

⁸ ijwi rye rigatigisa ubutayu, ubutayu bwa Kadeshi bugatingita.

⁹ Uhoraho aravuga impara zikaramburura, amashyamba na yo agahinduka inkokore. Mu Ngoro ye bose ni ko kurangurura bati: “Uhoraho nahabwe ikuzo.”

¹⁰ Uhoraho agenga inyanja, Uhoraho ni Umwami uganje iteka ryose.

¹¹ Uhoraho nahe ubwoko bwe imbaraga, Uhoraho nabuhe umugisha bugire amahoro.