Zaburi 20 - Bibiliya Ijambo ry'imana

Isengesho ryo gusabira umwami

¹ Zaburi y'umuyobozi w'abaririmbyi. Ni iya Dawidi.

² Nugira amakuba Uhoraho ajye akugoboka, Imana ya Yakobo ubwayo izajye ikurinda.

³ Ijye igutabara yibereye mu Ngoro yayo, igushyigikire iri i Siyoni.

⁴ Ijye izirikana amaturo yawe yose, yemere n'ibitambo byawe bikongorwa n'umuriro. Kuruhuka.

⁵ Ijye iguha ibyo wifuza, isohoze imigambi yawe yose.

⁶ Ni bwo tuzarangurura twishimira ko watsinze, tuzunguze amabendera twogeza Imana yacu. Uhoraho najye aguha ibyo umusabye byose.

⁷ Noneho menye ko Uhoraho arokora umwami yimikishije amavuta, yamugobotse yibereye mu ijuru mu Ngoro ye, amukorera ibikomeye amubashisha gutsinda.

⁸ Bamwe biringira amagare y'intambara, abandi biringira amafarasi y'intambara, ariko twebwe twiringira Uhoraho Imana yacu.

⁹ Abo bazatsindwa bashirire ku icumu, nyamara twebwe tuzashinga ibirindiro.

¹⁰ Uhoraho, shoboza umwami gutsinda, umwami najye atugoboka nitumutabaza.