Fiitu 22 - Yennu Gbounpaauŋ Mɔɔr

¹ Li yoo ki malaka na wannin manfoor nyun mɔkir na, ki li puuk nyi Yennu nan Pebik na naangbouŋ na ni, ki nyirii kaman nan mianu na,

² ki puuk ki gaar doo na sɔnjosinsuuk ni, ki tiik nba ki bi yir manfoor tiik na see mɔk-kpinii ŋannlee na kur po ki kook saawa; ki tiik maŋ lon lɔɔna booru piik nan ŋannlee, ki binn nɔɔk ni ki li loon taar piik nan ŋannlee, ŋmaarik kur ni li loone; ki li faat na tee nisaarii tebuk ki tur nibooru kur.

³ Ki Yennu nba por mɔb ki wann linba kur, li ji kii be doo maŋ ni; Yennu nan Pebik na naangbouŋ maŋ sii be doo maŋ ni, ki u toontunna na sii jiantirɔ.

⁴ Ki bi sa la u numm po, ki u sann sa sɔb bi yugbia paak.

⁵ Nyiɔk ji tan sii kaa, bi tan ji kii loon fitir nan yennu yentu leŋi, kimaan ti Yomdaanɔ Yennu sii tee bi yentu. Ki bi sa di naan kii be nan yoo nba kaa gbennu.

Yisa baaru labaar

⁶ Ki malaka na bia yetin a “Mɔbona na tee mɔniie, ki bia tee linba ki yada be li ni. Ki ti Yomdaanɔ Yennu nba jikit u Seyeeŋ na ki teen u sɔkiniinba na, ŋɔɔe tun u malaka a wun baar ki wann u toontunna linba sa tun mɔtana.”

⁷ Ti Yomdaanɔ Yisa yet a “Gotir man, n baate mɔtana.” Tɔn, binba saak sɔkinii mɔmaan nba sɔb gbouŋ na ni na, parpeenn tee bi yare.

⁸ Min Jɔɔnne gbat ki bia la linba na kura. Ma gbat ki bia la na, li yooe ki n gbaan malaka nba wannin linba maŋ na tɔɔnn ki yaa n jiantɔ.

⁹ Ki u yetin a n daa tee nna kaa; a u mun tee min nan n naa waas nba tee sɔkiniinba nan binba saak linba be gbouŋ na ni na toontunlɔɔe; a n jiant Yennue.

¹⁰ Ki u bia betin a n daa bɔrii sɔkinii mɔmaan nba be gbouŋ na ni, a kimaan yoo na pera;

¹¹ a wunba tuu tuun toonbiit, wun biar kii tuun nna, a ki wunba mun tuu tuun jakint toonn, wun mun biar kii tuun nna; ki wunba mun tuu tuun toonŋana, wun mun biar kii tuun nna, ki wunba mun tuu tee popeendaanɔ, wun mun biar kii tee nna.

¹² Ti Yomdaanɔ Yisa yet a “Gotir man, n baate mɔtana na, ki dia sɔɔ kur nan u toona nyɔɔt a n tan pau.

¹³ N tee Alfa nan Omegae, sinsinn nan joontu, pinpiik nan gbennu.”

¹⁴ Damm nba wuur bi para nan Yisa sɔn na, parpeenn tee bi yare; ki li paak ki bi mɔk sɔnu nba ki bi sa di tilɔɔna nba teen manfoor na, ki sa kɔɔ tammɔb na ni ki saan doo na ni.

¹⁵ Ki nibiit, nan binba dia jabaat na ki bu ki kpann niib, nan binba tuun jakint toona na, nan nikpiira, nan patjiantdamm, nan binba tee fai damm ki kpann niib na, bi kur tan sii be doo maŋ nanyer poe.

¹⁶ “Min Yisae tun n malaka a wun tan fiit maan na ki tur n weira. Min Yisa nee tee David yaaboonn ki bia tee sanyafaar ŋmaajar nba nyɔkit na.”

¹⁷ Tɔn, Yennu Seyeeŋ nan Pebik na pooyookir na yet a “Baat.” Ki wunba gbatir mun-n yet a “Baat.” Ki wunba kur ki nyunyukiru soorɔ, wun baar; ki wunba loon nyun maŋ, wun gaar yann.

Li gbennu labaar

¹⁸ Min Jɔɔnn kpaan wunba kur gbat sɔkinii mɔmaan nba be gbouŋ na ni nan nunmɔnn: wunba pukin siar mɔmaan maŋ ni, Yennu sa jii farbiit booru booru nba sɔb gbouŋ na ni na, ki pukin u tubdatu po.

¹⁹ Ki wunba mun nyinn siar sɔkinii mɔmaan nba be gbouŋ na ni, Yennu sa nyinn u tor manfoor tiik na ni, nan Yennu doo na ni, ki bi sɔb li po gbouŋ na ni na.

²⁰ Tɔn, ki wunba tur siara na yet a “Mɔmɔmm, n baate mɔtana.” Mɔmɔmm, ŋaant ki lin teen nna. Ti Yomdaanɔ Yisa, baat na.

²¹ Ti Yomdaanɔ Yisa sommir-ii be u niib kur ni. Mɔmɔmm.