2 Korɛntɩ zannɔ 6 - Wosoci Gu̳aasi̳babaa Daa Nouveau Testament en Bissa

¹ Kʊ zi wɔɔ n'a bam kan Woso kɩ bɩ, wɔɔ y'a yɛrɛ awɔɔ han, ʊ ʊ, a b'a to Woso barka k'a yɩ bɩ n ta vam y.

² Bala, Woso a hɩ, a ʊ: Dɔmɩm kʊ mɔɔ nɩ barka kam bɩ, mɔɔ ɩbɩɩ yaadarɛ si, hinni k'ɩbɩɩ nɩ bʊmbɔrɛ ŋʊaŋ ʊ bɩ, mɔɔ bʊr m bɩ m da ɩ han. Dɔmɩm kʊ Woso n'a barka kam bɩ n naa. Dɔmɩm k'a n'a bʊmbɔrɛ kam bɩ n naa sɔ.

Pol zibəə

³ Wɔɔ lɛ baa k'ʊ hɔsɩ ba k'an yɩ gʊaa ma bʊnyaa y, bala, wɔɔ lɛ baa kʊ gɔsɩ n wɔɔ zibəə bɩ sʊnsɔ wʊ y.

⁴ A n ta ʊ bɩ, hɔ haay kʊ wɔɔ n'a bam bɩ, a ba wɔɔ nawʊm ʊ n'a hɩnkam ʊ ʊ, Woso zibəənyɩnɔ m wɔɔ m. Bɩ tɔ ma bɩ, wɔɔ ɩ jɩnɩm kɔɔkɔɔ fɩr do y'a hʊnhɔ nɔ ʊ, mim kʊsɩrɔ kʊ ŋ n'ɩ wɔɔ yɩm nɔ ʊ, cicir nɔ ʊ, dabɔʊ nɔ ʊ.

⁵ Gʊɔɔ wɔɔ zɛ madɩr m gʊta, ŋnɩ wɔɔ du, ŋn'a zɛ kʊ ra ŋnɩ zee da wɔɔ ma, wɔɔ nyɩnta kɔrɛrɔ nɔ ʊ, hinceem bɩr bam wɔɔ nɩ y, hɔbɩrɛ bɩr bɩm wɔɔ nɩ y.

⁶ Wɔɔ ɩ heer fu zi bam, Woso hɔdɔrɛ zi wɔɔ n'a bam, ʊ nɩ bʊraama zi bam. Ʊ nɩ mɩŋŋabaa bam, ʊ nɩ tam Sɛnt-Ɛspri paŋŋa m, ʊ nɩ ŋʊarɛ zi bam noom fu m.

⁷ Ʊ nɩ sɩra lemim hɩm, ʊ nɩ tam Woso paŋŋa nɔ ʊ, ʊ nɩ tɩrgabaa yar mɔrlɔ sam ʊ nɩ yar barɛ ŋ nɩ, k'ʊ jɩm kɔɔkɔɔ.

⁸ Gʊɔɔ gɔsɩnnɔ ɩ wɔɔ daŋ ʊ, niŋŋoo nɩ wɔɔ bɔŋ ʊ, nɔɔrɔ y'a lɛ bɔm wɔɔ ʊ, nɔɔm nɩ wɔɔ sʊnsɔ wʊm. N yɩ dɩgam wɔɔ ma ŋʊaarbənno, an bɔkarɛ sɩrazannɔ m wɔɔ m.

⁹ Gʊɔɔ ɩ dɩgam wɔɔ ma, ɩ ʊ, gɔsɩ n wɔɔ dɔ y, an bɔkarɛ gʊɔɔ wɔɔ dɔ. N y'a gɩngarɛ n ʊ, gɩnga wɔɔ nawʊm, bɩ wɔɔ gɔɔta ʊ m mɩsɩr, n yɩ fɩr kam wɔɔ ma gʊta, bɩ wɔɔ n gɩnga y.

¹⁰ N yɩ wɔɔ heer zaar barɛ, bɩ wɔɔ gɔɔta ʊ nɩ heernyɔɔ m, n yɩ dɩgam wɔɔ ma ŋʊazannɔ, an bɔkarɛ wɔɔ y'a kam gʊɔɔ n'a bam hɔzannɔ, n yɩ dɩgam wɔɔ ma ɩ ʊ, hɔsɩ ba wɔɔ ʊ y, an bɔkarɛ wɔɔ nɩ hɔ haay m.

¹¹ Awɔɔ Korɛntɩ zannɔ, wɔɔ ʊ heer gʊ ʊ meer ba kan awɔɔ kɩ fasɩ, ʊ ʊ ŋʊarɛ hɩnka awɔɔ m.

¹² Wɔɔ awɔɔ si ʊ heer ʊ, awɔɔ n wɔɔ si a heer ʊ y.

¹³ Awɔɔ ba mɔɔ ʊ m nyɩnɔ, m nɩ meer bɩ bam kan awɔɔ kɩ, k'a a heer gʊ wɔɔ m, a wɔɔ ŋʊa sɔ, amba wɔɔ n'awɔɔ ŋʊam bɩ m.

Lɛɛgure kan monsigə kɩ b'a dam ma ŋ n a zɛ kʊ ra y

¹⁴ A bɩ yɛ a a zɛ kʊ ra kan basɩrakənno kɩ y. A n a ga m, awɔɔ n a ba deem kan ŋ kɩ y. Hɔ tɩrga y'a dam ma an a zɛ kʊ ra kan hɔ bʊnyaa kɩ ra? Lɛɛgure y'a dam ma an a war kʊ ma kan monsigə kɩ ra? A n a ga nɩ y.

¹⁵ Krista y'a dam ma an kʊ ma kan Sʊtaana kɩ ra? Gɛɛ sɩrakarɛzaa y'a dam ma an a ba deem kan basɩrakarɛzaa kɩ ra?

¹⁶ Wosocɛ b'a dam ma an kʊ ma kan *wosobaawɔnnɔ kɩ y. Bɩ, wɔɔ m Woso k'an mɩsɩr bɩ cɛ, amba a mɩŋŋa a hɩ bɩ m, a a hɩ, a ʊ: Mɔɔ mɩsɩrbaa barɛ ŋ bire ʊ, m bɩr kan ŋ kɩ, mɔɔ nɩ yɩrɛ ŋ Woso, ŋnɩ yɩ mɔɔ gʊɔɔ.»

¹⁷ Naa tɔ ma bɩ, Zuuba a ya, a ʊ: K'a bɔ gʊɔɔ bʊnyaarɔ wɔɔ bire ʊ, a a gʊ a hɔ. A b'a wɔ da dintim hɔ ma y, maam bɩ, mɔɔ y'awɔɔ sire m zi.

¹⁸ Mɔɔ yɩrɛ awɔɔ zɩ, awɔɔ n yɩ mɔɔ nyɩnɔ yaarɔ kan mɔɔ nyɩmbɔnnɔ kɩ, Zuuba k'a paŋŋa jirə ba ʊ y'a hɩ.