Jonás 1 - Diósïri Karakata P´urheepecha Jimbo

I. JONASI NO UÉKASPTI ÚNI AMPE ENKA AXANHAPKA ÚNI KA K'ÉRI JAPUNTARHUKSÏ K'UANIMASTI Jonasi, Diósïni sïpakorhekuspti

¹ ACHAeri uantakua Jonasini niárakuspti Amitai uáp'a tatakani, ka arhispti:

² Jauara kókuani, Níniberi niuaka k'éri iretarhu ka aiankuakari imani iretani eskani k'amak'uaka jimpokarini imecheri k'amanharhintskua janocheska.

³ Ka Jonasi méntku máteru náni ísï niraspti, ima Tarsisi ísï niraspti, ACHAni sïpakorhekuni ka Jope kétsemaspti enkaksï tepari icharhuta niántka ka jima jataspti icharhuta teparini ma enka Tarsisi nipirinka; ka maiampespti nitarakueri ka jataspti icharhuta teparini imecha jinkuni enkaksï jini nirani jámempka, eska úpirinka ACHAni sïpakorhekuni.

⁴ K'óru ACHA k'éri ma tarhiamaspti k'éri japuntarhu ka nósesi jásï ma akuitse janikua úkorhespti ka enak'i ampe icharhuta teparini xerenturhipirini.

⁵ Ka ima enkaksï icharhutani páni jápka kánekuaksï chéxapti ka iámentuechaksï imecheri diósïni uantap'akorhexapti; ka xáni ampe enkaksï jima páni jápka, jimak'uksï k'uanimaspti ka Jonasi sáni jini kénhespti icharhuta teparirhu ka sési niárakorheni ka uinhamu k'uíraspti.

⁶ Ka ima enka icharhuta teparini urhets'ïkuni jápka niraspti antarherani ka arhispti: ¿Antirisï xáni k'uíni jáki? ¡K'uímsï! ¡Jauara ka kómu arhikorhe chéti Diósïni! Nántikats'ïni p'amok'uaka ka nóchi uekameni.

⁷ Ka ima enkaksï icharhuta teparini páni jápka arhip'erasptiksï: Ju je p'iárani ch'anakua ma jimpo, ka isï jimpochi míteaka néri jimpoeski enkats'ïni xásï ikimperata janocheka. Ka mítesptiksï néri jimposï úkorheni jápi ka Jonasini antarheraspti eska ima k'amanharhintaspka.

⁸ Ka jiániksïsï imani kurhamarhepti: Arhits'ïni, ¿Antits'ïnisï janoche i ikimperata? ¿Amperi úxamki ixuesï? ¿Naniri uératini jurhasïni? ¿Naniri anapueski? ¿Ne jinkuniri jámasïnki?

⁹ Ka Jonasi arhiantaspti: Ji ebreoueska ka ACHAni chénharhisïnka auantarhu anapu Diósïni, enka k'éri japuntani ka echerini kueraaka.

^10-11 Ima enkaksï icharhuta teparini páni jápka ka íni ampeksï kurhani sánteruksï chéspti jimpokaksï mítespka eska Jonasi ACHAni sïpakorhekuxapka, jimpoka ima aiankukorhentaspka ka imaksï arhispti: ¿Antirisï ísï jámki? Ka k'éri japuntarhu sánteru k'érati jenkuerasïrempti. Jimpoksïsï kurhamarhepti, ¿Ampechi úa t'únkeni jinkuni eska k'éri japunta nóteru xáni nósesi niuaka?

¹² Ka Jonasi arhiantaspti: Jupikats'ïni je ka itsïrhuts'ïni k'uanima ka ísï jámani k'éri japunta nóteru ikiauati, jimpokani ji sési míteska eska jucheti jimposï xánhaskorheka enka chánksïni jamperi antarheraka.

¹³ Enka úpka, ima acheticha enkaksï icharhuta teparini páni jápka jánkorhentasptiksï icharhutani echerintu péntani ka nóksï úspti jimpoka k'éri japunta sánteru ikiasïrempka ka k'érati jenkuerani.

¹⁴ Jiániksïsï ACHAni uantamukukorhepti ka arhinksï: ACHA, ásï jucha jamperi uarhi interi k'amarhintskua jimpo, enka i acheti niáraska uarhini eskani no jucha arhinhaaka enka i acheti uarhiska, jimpokari t'u ACHA úsïnka ampe enkari uékaaka.

¹⁵ Ka jupikasptiksï Jonasini ka itsïrhuksï k'uanimani ka k'éri japunta enka xáni nósesi nirani jápka, anhakuatsespti.

¹⁶ Ka ima enkaksï íni ampe exepka p'ikuarhenhesptiksï ACHAni chénharhini ka jimpoksïsï kéts'ïtakua aiakuntapti ka aiakorheniksï eskaksï k'éri ampe arhipirinka.

II. JONASI ENKA KURUCHARHU INCHAAKUTINI JÁPKA KA ENKA ACHANI KOMU ARHIKORHEPKA

¹⁷ K'óru ACHA, k'éri ma kuruchani axaspti eska Jonasini kunak'apirinka, jimposï Jonasi tanimu jurhia ka tanimu chúrekua jápti kurucharhu inchakutini.