Éxodo 1 - Diósïri Karakata P´urheepecha Jimbo

I. ENKAKSÏ JURAK'UNHAPKA JIMA ENKAKSÏ JUPIKATA JÁPKA EJIPTU Israeli uáp'echeri Ejiptu kómu jankua

¹ Íksï jintesti Israeli uáp'echeri jakankurhikua enkaksï Jakobini jinkuni Ejiptu inchaakupka imeri márku jémpechani jinkuni:

² Rubeni, Simeoni, Lebi, Juda,

³ Isakari, Sabuloni, Benjamini,

⁴ Dani, Neftali, Gadi ka Aseri.

⁵ Tanimu ekuatse ka témpeni (70) k'uiripu Jakobiri sïrukuespti, Jose t'uini Ejiptu jarhasptia irekani.

⁶ Jose ka erachi jémpecha ka iámentu imeri sïrukua uarhispti,

⁷ Israeli uáp'echaksï uánhekua sapichani kaaspti, ka uánesptiksï jima echerirhu ka sánteruksï juramukua uinhapespti.

⁸ Imani jurhiatekua ísï Ejiptu, jimpanhe irecha ma pénhantaspti enka no mítepka Joseni, ka irecha iretarhu anapuechani arhiaspti:

⁹ Eskani na exeni jaka, Israeli iretarhu anapuechaksï sánteru uánesti ka sánteruksï uínhapesti eskachi jucha.

¹⁰ Ísï jimpo k'uanisïnti eratsekuni nénachi jámaa eskaksï nóteru uáneakia, jimpoka enka ma jurhiani uarhipekua jauaka, imaksï jamaati juchari ikiatspiricha jinkuni ka kunkorhechentantsïni ka tsïpakorheniksï.

¹¹ Ejiptu anapuechaksï Israeli anapuechani ánchetpirichani perakuasti eskaksï kánekua ánchetapirinka ka no sési káani. Xániksï kánekua ánchetanhaspti ka Irechaniksï k'éri ireta úkuaspti Pitoni ka Ramasesi enka t'irekua patsarakuepka.

¹² Enkaksï sánteru kánekua ánchetauempka ka sánteruksï no sési káani imaksï sánteru úanesïrempti, Ejiptu anapuechaksï Israeli uáp'echani chérheasïrempti.

¹³ Jimpoksïsï Ejiptu anapuecha sánteru nósesi káauempti Israeli uáp'echani ánchetaani.

¹⁴ Kánekuaksï nósesi kaasïrempti iauarhi úkata úraani ka atsïmu ka juátarhu anapu ánchekorheta enka úkua jukapka.

¹⁵ Irecha Ejiptu anapu uantaxekuaspti Sifrani ka Puáni enkaksï xurhik'ipka ka enkaksï jarhuatepka Ebreo anapuecha charhu káani, ka arhiaspti:

¹⁶ Enkats'ï nanachicha Ebreo anepucha charhakuni kámani jamaaka, sési exeje, enka ima charhaku tatakeuaka uantikua je, ka enka ima charhaku nanakeuaka ásï uántikuaka je.

¹⁷ Xurhik'ichaksï Diósïni chénharhispti, ka Ejiptu anapu irechani nóksï kurhach'aspti, ka nóksï uántikuaspti charakua tatakechani.

¹⁸ Ejiptu anapu irecha ménteru xurhik'ichani uantap'aspti ka kurhamarheaspti: ¿Antits'ïsï no uántikua charhaku tata sapirhatichani?

¹⁹ Ka imaksï arhispti: Ebreo anapu nanachichaksï no mák'ueni jarhasti eskaksï Ejiptu anapuecha, Ebreo anapuechaksï sánteru uiuinharhasti, enkari jamperi jucha niárak'a imaksï t'uini káasïntia charhakuechani ka nóchi jamperi antakorhesïnti jarhoatini.

²⁰ Diósï sési káaspti xurhik'ichani, ka Israeli anapu k'uiripu sánteru k'éspti ka uinhapeni.

²¹ Jimpokaksï xurhik'icha Diósïni chénharhispka, Diósï uánekua sapichani konteaspti.

²² Ejiptu anapu irecha juramuspti: Iurhekuarhu k'uanima je iámentu charhakuechani Ebreo uáp'echani enkaksï xáni antap'enuaka, nanakechani ásï k'uanima je.