प्रकाशितवाक्य 16 - भड्लाई नंव्वों नियम

परमेशरेरे सरकारे सत कटोरे

¹ तैट्ठां पत्ती मीं मन्दरे मां कोई ज़ोरे सेइं तैन सत स्वर्गदूतन सेइं ज़ोतो शुनो कि, “गाथ, परमेशरेरे सज़ारे सते कटोरे दुनियारे लोकन पुड़ उलटाथ।”

² ते पेइले गेइतां अपनो कटोरे धेरतली पुड़ उलटव। ते तैन मैन्हु केरे ज़ैन पुड़ हैवानेरी छाप थी, ते ज़ैना लोकेईं तैसेरी मूरतरी पूज़ा केरते थी, एक्की किसमेरे बुरे ते दुःख देनेबालो फोड़े निस्से।

³ ते दुइयोवें अपनो कटोरो समुन्द्रे पुड़ उलटव, ते तै मुड़दां केरे खूनेरो ज़ेरो बनो, ते समुन्दरेरे सारे जानदार मरे।

⁴ ते ट्लेइयोवं स्वर्गदूते अपनो कटोरो दरियान ते पैनेरे नागन पुड़ उलटव, ते सारू पानी खून बन्नू।

⁵ ते ज़ैस स्वर्गदूते पैनी पुड़ अधिकारे मीं तै परमेशरे सेइं इन ज़ोते शुनो कि, “हे पवित्र परमेशर, तू ज़ै आस, ते हमेशा करां थियो, तीं कां एन्च़रे इन्साफ केरनेरू हक्के।

⁶ किजोकि तैनेईं तेरे लोक ते तेरे नबी मारे ते तैन केरो खून बगोरो थियो, एल्हेरेलेइ तीं हुना तैन खून पीने जो दित्तो। इन इनामेरे रूपे मां तैन केरे लेइ ठीक आए।”

⁷ फिरी मीं बलिदान केरनेरी ठारी मरां ई आवाज़ शुनी कि, “हाँ सर्वशक्तिमान प्रभु-परमेशर, तेरो इन्साफ सही ते कने सच़्च़ो आए।”

⁸ ते च़ेवरोवें स्वर्गदूते अपनो कटोरो दिहाड़े पुड़ उलटव, ते दिहाड़े जादे गर्म भोनेरी अज़ाज़त दित्ती कि तैस सेइं लोक फुकोन।

⁹ ते लोक तैस बड़े सेके सेइं फुकोए, ते तैना लोक परमेशरेरी तुहीन केरने लाए, किजोकि तैए आए ज़ैस कां सैरी आफतन पुड़ अधिकारे। फिरी भी तैन लोकेईं अपने पापन करां मन न फिराव, ते फिरी भी तैनेईं परमेशरेरे महिमारो इकरार न कियो।

¹⁰ ते पंच़ोवें स्वर्गदूते अपनो कटोरो तैस हैवानेरे तखते पुड़ उलटव ते तैसेरे सारे राज़्ज़े मां आंधरू भोवं। ते लोक दुखे सेइं मरे ते अपनि-अपनि ज़िभ च़ापने लाए।

¹¹ ते अपने दुखे ते फोड़ां केरे वजाई सेइं स्वर्गेरे परमेशरेरी तुहीन की; ते अपने-अपने कम्मन करां मन न फिरव।

¹² शेइयोवं स्वर्गदूते अपनो कटोरो बडे दरिया फराते पुड़ उलटव ते तैसेरू पानी शुक्की जेव एसेरो नितीजो ई भोव कि पूरबेरे राज़े अपनि फौज घिन्तां पार जे।

¹³ एसेरां पत्ती मीं ट्लाई भूतां मैन्डू केरे रूपे मां लाए। अक अजगरेरे ऐशी मरां निस्सू, ते अक पेइले हैवानेरे ऐशी मरां निस्सू, ते अक दुइयोवं हैवानेरे ऐशी मरां निस्सू, ज़ै जो झूठो सन्देश ज़ोते।

¹⁴ इन भूतन कां चमत्कार केरनेरी काबलीत थी ते तैना दुनियारे सारे मुलखां केरे राज़ केरनेबालन अकोट्ठे केरने च़ले ताके तैना परमेशरे सेइं लड़न, ई तै दिहाड़ी आए ज़ेइस परमेशर भूतन नाश केरेलो ते अपने लोकन मुक्ति देलो।

^15-16 तैन भूतेईं हकोमत केरनेबाले ते तैन केरि फौज एक्की ठैरी अकोट्ठी की ज़ैस जो इब्रानी भाषाई मां हर-मगिदोन ज़ोतन। एल्हेरेलेइ यीशुए ज़ोरूए, “इस शुना। मेरू एजनू अचानक च़ोरेरू ज़ेरूए। धने तै मैन्हु ज़ैखन अवं एज्जी त तै बींझ़ो रहते, ते अपने लिगड़न तियार रखते। फिरी तै नग्गो न भोलो, ते फिरी तैस लोकन मां गाने सेइं शर्म न भोली।”

¹⁷ ते सतोवंए स्वर्गदूते अपनो कटोरो हवाई पुड़ उलटव, ते मीं स्वर्गे मां मन्दरे मरां परमेशरे तखते पुड़ां ई बड़ी आवाज़ शुनी कि कोई ज़ोने लोरोए, “सब किछ पूरू भोवं।”

¹⁸ फिरी बिजली, ते आवाज़, ते गुड़ने लाव, ते अक एत्रो बड्डो भुंज़ल अव, कि ज़ेइसेरे मैन्हु इस धेरतली पुड़ पैदा भोरोरेन, तेइसेरो अज़ तगर एरो भुंज़ल कधी नईं ओरो।

¹⁹ ते तैस महान बाबेल नगरेरे ट्लाई टुक्ड़े भोए, ते दुनियारे कौमां-कौमां केरे सारे नगर बर्बाद भोए। ताके परमेशर तै वादो पूरो केरे ज़ै तैने बाबेल नगरेरे लोकन सज़ा देनेरे लेइ कियोरो थियो। ई सज़ा परमेशर पक्की देलो। परमेशर तैन ट्लिठी शराबी पियालो ज़ैस मां पानी न भोए मिलावरू ज़ेसेरो मतलब परमेशरे तैन सेइं बड़ो क्रोधे मां आए ते तैन पुड़ दया न केरेलो।

²⁰ तैस वक्ते हर अक टैपू समुन्दरे मां डुबो; ते कोई भी पहाड़ न राऊं।

²¹ ते अम्बरेरां मैनन् पुड़ मन-मन आण पेई, ते एल्हेरेलेइ कि ई आफत बड़ी भारी थी, लोकेईं आनहरी आफतरे वजाई सेइं परमेशरेरी तुहीन की।