प्रकाशितवाक्य 15 - भड्लाई नंव्वों नियम

आखरी आफतन सेइं साथी स्वर्गदूत

¹ फिरी मीं स्वर्गे मां अक बड्डो ते आजीब निशान लाव, मतलब सत स्वर्गदूत ज़ैन कां आखरी सत आफतां थी, किजोकि तैन केरे भोने पुड़ परमेशरेरो क्रोध मुकेलो।

² तैखन मीं समुन्द्रेरू ज़ेरू किछ लाव ज़ैन शीशेरू ज़ेरू चमकतू थियूं ते अग भी तैस मां मिलोरी थी। मीं तैना लोक भी लाए ज़ैना हैवाने न थिये हैरेई बटोरो, तैन लोकेईं हैवान ते तैसेरे मूरतरी पूज़ा न थी कियोरी। ते तैन पुड़ तैस हैवानेरे नंव्वेरे अंकेरी महोर न थी लोरोरी। तैना तैस शीशेरे समुन्दरेरे बन्ने पुड़ तै सारंगी घिन्तां खड़े भोए ज़ै परमेशरे तैन दित्तोरी थी।

³ तैना परमेशरेरे दास मूसेरू गीत, ते गबड़ेरू गीत ज़ोते थी, “हे सर्वशक्तिमान प्रभु-परमेशर, ज़ैना कम्मां तीं कियां तैना बड़ा महान ते आजीब आन, तू सेब्भी कौमां केरो राज़ोस, तैन सब ज़ैन तीं कियूं तैन सही ते धर्मी आए।”

⁴ “हे प्रभु, सेब्भी लोकेईं तेरी आदर की, ते तैना सारे तेरे नंव्वेरी इज़्ज़त केरतन, किजोकि तूए सिर्फ पवित्रस। सैरी कौमां केरे लोक हर राज़्ज़न मरां तीं कां एज्जेले, तैना तेरी आराधना केरेले किजोकि तेरे धर्मी कम्मां बड़ां मशूर आन।”

⁵ ज़ैखन तैन लोकेईं गीत ज़ोताईं खतम कियां, त मीं स्वर्गे मां मन्दर खोलोरू लाव। तैन एरू थियूं ज़ेन्च़रे तेम्बु।

⁶ ते तैना सत स्वर्गदूत ज़ैन कां सत आखरी आफतां थी, तैना तैस मन्दरे मरां निस्से। तैनेईं छ़ित्तां चमकतां लिगड़ां लोरां थियां ते तैनेईं अपने छैती पुड़ सोन्नेरी पेट्टी बेन्धोरी थी।

⁷ ते तैन च़ेव्रे प्रैणन मरां एक्के सत्ते स्वर्गदूतन हमेशा ज़ींते रानेबाले परमेशरेरे प्रकोपे सेइं भरोरे सत सोन्नेरे कटोरे दित्ते।

⁸ ते परमेशरेरी महिमा, ते तैसेरे शेक्तरे वजाई सेइं मन्दर तूए सेइं भेरोई जेव, ते ज़ां तगर तैन सत्ते स्वर्गदूतेईं सते आफतां खतम की, तांतगर कोई मन्दरे मां न गेइ बटो।