प्रेरितां केरां कम्मां 3 - भड्लाई नंव्वों नियम

टोंटो भिखारी बझ़ानो

¹ एक्की दिहाड़े पतरस ते यूहन्ना प्रार्थना केरने दीसेरे ट्लेइ बज़ेइं मन्दरे मांजो च़लोरे थिये।

² ते मैनेईं अक ज़र्मनेरो टोंटो छ़ुइतां आनोरोए थियो, ते तैस मन्दरेरे दारे पुड़ छ़डते थिये, ज़ैस दारेरु नवं “रोड़ू” थियूं, ताके अन्तर गाने बालन करां भीख मग्गे।

³ ज़ैखन तैनी पतरस ते यूहन्ना मन्दरे मांजो गांते लाए त तैन करां भीख मगने लगो।

⁴ पतरस ते यूहन्ना तैसेरे पासे खेड़ोइतां ज़ोने लगे, “इश्शे पासे तक।”

⁵ ते तैस उमीद भोइजेइ कि एन करां किछ मैलेलू, तै तैन केरे पासे तकने लगो।

⁶ पतरसे ज़ोवं, “सोन्नू चाँदी त असन कां अथ्थी नईं, पन ज़ैन मीं कां आए तैन अवं तीं देताईं, तू यीशु मसीह नैसरेरे नंव्वे सेइं खड़ो उठ ते च़ल फिर।”

⁷ पतरसे ज़ेरो तैसेरो देइनो हथ ट्लेइतां खड़ो कियो, त तैसेरे पावन मां ते गुडन मां ताकत आई।

⁸ ते तै तैखने खड़ो भोव, ते च़लने फिरने लगो, ते फिरी छालां मारतो ते परमेशरेरी तारीफ़ केरतो तैन सेइं साथी मन्दरेरे अंगने मां च़लो जेव।

⁹ ते सेब्भी लोकेईं तै च़लतो फिरतो ते परमेशरेरी तारीफ़ केरतो लाव।

¹⁰ ते पिशानो ई त तैए, ज़ै मन्दरेरे रोड़े दारे पुड़ बिश्तां भीख मगतो थियो, ते ज़ै चमत्कार एन लोकां केरे सामने भोव, त तैना लोक बड़े हैरान राए।

मन्दरे मां पतरस शिक्षा देते

¹¹ ज़ैखन तै मैन्हु पतरस ते यूहन्ना ट्लेइतां खड़खड़ो थियो, त सब लोक ज़ैना तैड़ी खड़खड़े थिये, बड़े हैरान भोइतां सुलैमानी अंगने मां देवड़तां तैन कां आए।

¹² पतरसे एन हेरू त तै लोकन कां एन्च़रे खड़ो भोव, ते ज़ोने लगो, “हे इस्राएली लोकव तुस एस गल्ली पुड़ किजो हैरान भोरेथ, ते असन एन्च़रे किजो तकने लोरेथ, असेईं अपने शक्ति या भक्ति सेइं ए टोंटो मैन्हु च़लने फिरनेरे काबल नईं बनेवरोए।

¹³ अब्राहम ते इसहाक ते याकूबेरे परमेशरे ते इश्शे पूर्वजां केरे परमेशर अपने दासे यीशु महिमा दित्ती, पन तुसेईं तै यहूदी लीडरन कां दित्तो कि तैना तैस मारन। पिलातुसे तै हथरां छ़डनेरो इरादो कियो, पन तुसेईं यीशुएरो इन्कार कियो।

¹⁴ तुसेईं यीशु अक एरो पवित्र ते धर्मी मैन्हु रद कियो, ते पिलातुसे कां दरखुवास की, कि तै तुश्शे लेइ अक कातली हथरां छ़डे।

¹⁵ तुसेईं त ज़िन्दगी देनेबालो मारो, पन अस गवाह आम, कि परमेशरे तै मुड़दन मरां ज़ींतो कियो।

¹⁶ तैसेरे नव्वेंरी शक्ति एस टोंटे, ज़ै तुश्शे सामने ते ज़ैस तुस ज़ानतथ शिफा दित्तोरिये ते ए मैन्हु यीशुएरे नंव्वे सेइं ते यीशु पुड़ विश्वास केरने सेइं बिलकुल ठीक भोव, ते ए एप्पू तुश्शे सामने।

¹⁷ “हे मेरे ढ्लाव अवं ज़ानताईं कि ज़ैन किछ तुसेईं ते तुश्शे लीडरेईं यीशु सेइं कियूं, तैन तुसेईं अनज़ान भोइतां कियूं। किजोकि तुसन न थियो पतो कि तै मसीह आए।

¹⁸ पन परमेशरे एना सैरी गल्लां ज़ैना तैनी अपने नेबी केरे ज़िरिये ज़ोरी थी, कि मसीह दुःख ऊठालो ते मरेलो ते तैनी तैना एन्च़रे पूरी की।

¹⁹ बस्सा पापन करां मनफिराथ ते परमेशरेरे पासे फिरा ते तै तुश्शे पाप माफ़ केरेलो, ते परमेशरेरी तरफां तुश्शे लेइ परमेशरे तरफां रोड़े दिहाड़े एज्जेले।

²⁰ ते तै मसीह यानी यीशु ज़ै तैनी ठहरावरो आए, तुश्शे लेइ भेज़े।

²¹ पन ज़ांतगर तैना सैरी चीज़ां बहाल न केरे, ज़ैन केरे बारे मां परमेशरे बड़े पेइले अपने पवित्र नेबी केरि ज़बानी ज़ोरूए, तांतगर यीशुएरू स्वर्गे मां रानू ज़रूरीए।

²² ज़ेन्च़रे मूसा एस बारे मां ज़ोरू थियूं, प्रभु परमेशर तुश्शे ढ्लान मरां तुश्शे लेइ मेरो ज़ेरो अक नबी भेज़ेलो, ज़ैन किछ तै तुसन सेइं ज़ोए, तुस तैसेरी गल शुनथ।

²³ पन ज़ै तैस नेबेरी गल न शुनेलो, तै लोकन मरां नाश कियो गालो।

²⁴ ते शमूएल परमेशरेरी गल्लां ज़ोनेबाले करां देइतां पेइले तमाम नेबेईं इन दिहाड़ां केरे बारे मां शुनावरू।

²⁵ तुस नेबी केरि खानदेंनी ते ज़ै करार परमेशरे इश्शे पूर्वजन सेइं कियोरो थियो, तैस मां तुस सब शामलथ, परमेशरे अब्राहमे सेइं ज़ोरू थियूं, कि तेरे मट्ठेरे ज़िरिये सेइं दुनियारी तमाम कौमन बरकत मैलेली।

²⁶ परमेशरे अपनो सेवक मुड़दन मरां ज़ींतो कियो ते पेइलो तुसन कां भेज़ो, ताके तुसन तै बरकत दे, कि तुसन मरां हर कोई पापेरी ज़िन्दगी शैरतां परमेशरेरे पासे फिरे।”