2 कुरिन्थियों 2 - भड्लाई नंव्वों नियम

¹ मीं अपने मने मां इन थापेरू थियूं, कि फिरी तुसन कां एइतां तुसन दुख न देईं।

² किजोकि अगर अवं तुसन दुखी केरि, त मीं आनन्द देनेबालो कौन भोलो, सिर्फ तैए ज़ै मीं दुखी कियोरोए?

³ ते मीं ई गल तुसन एल्हेरेलेइ लिखी, कि एरू न भोए, कि मेरे एजने पुड़ ज़ैन सेइं आनन्द मैल्लेरो लोड़तो थियो, अवं तैन करां दुखी भोईं; किजोकि मीं तुसन सेब्भन पुड़ इस गल्लरो भरोसोए, कि ज़ै मेरो आनन्दे, तैए तुश्शो सैरी केरो भी आए।

⁴ मीं बड़े दुःख, ते मनेरे कष्टे सेइं, बड़े ऐंखरन सेइं तुसन चिट्ठी लिखोरी थी, एल्हेरेलेइ नईं, कि तुस दुखी भोथ, पन एल्हेरेलेइ कि तुस तैस बड़े प्यारे ज़ानथ, ज़ै मीं तुसन सेइं आए।

पापी मैन्हु माफ़ी

⁵ ते अगर केन्चे दुखी कियोरोईं, त अवं नईं बल्के (तैस सेइं बड़ी सखती न केरि) किछ-किछ तुस सब दुखी कियोरेथ।

⁶ एरे मैनेरे लेइ ई सज़ा ज़ै विश्वासी ढ्लान मरां बड़ेईं दित्ती, सुद्धी आए।

⁷ एल्हेरेलेइ इस करां इन रोड़ूए कि तैसेरो पाप माफ़ केरा; ते तैस तसल्ली देथ, एरू न भोए कि एरो मैन्हु उदैसी मां डुबे।

⁸ एल्हेरेलेइ अवं तुसन कां बिनती केरताईं, कि तैस अपने प्यारेरू सबूत देथ।

⁹ किजोकि मीं एल्हेरेलेइ भी लिखोरू थियूं, कि तुसन पेरखी, कि तुस मेरे सब गल्लां मन्नेरे लेइ तियार आथ या नईं।

¹⁰ ज़ैस तुस माफ़ केरतथ तैस अवं भी माफ़ केरताईं, किजोकि मीं भी ज़ैन किछ माफ़ कियोरूए, अगर कियेरू भोए, त तुश्शे वजाई सेइं मसीहेरे ठैरी भोइतां कियोरूए।

¹¹ कि शैतानेरो असन पुड़ दावो न च़ले, किजोकि अस तैसेरी चालन करां अनज़ान नईं।

त्रआसे मां पौलुसेरी बेदिली

¹² ते ज़ैखन अवं मसीहेरी खुशखबरी शुनाने त्रोआस नगरे मां अव, ते प्रभुए मेरे लेइ अक बत खोल्ली।

¹³ त मेरे मने मां चैन न भोइ, एल्हेरेलेइ कि मेरे विश्वासी ढ्ला तीतुसे तुश्शे एट्ठां कोई खबर घिन्तां न अव; ते अवं त्रोआसेरे विश्वासी लोकन करां अलग भोइतां अवं वापस मकिदुनिया इलाके मां अव।

मसीह मां ज़ींत ते जोश

¹⁴ परमेशरेरू शुक्र भोए, ज़ै मसीह मां सदा असन ज़ीतारे जशने मां च़लाते, ते अपने ज्ञानेरे खुशबू इश्शे ज़िरिये हर ठैरी फैलाते।

¹⁵ किजोकि अस परमेशरे कां मुक्ति मैलने बालां, ते नाश भोने बालन कां, दुइयां केरे लेइ मसीहेरी खुशबू आम।

¹⁶ केत्रा केरे लेइ त मरनेरे मुशक, ते केत्रन जो ज़िन्दगरे लेइ ज़िन्दगरी खुशबू, ते इन गल्लां केरे काबल कौने?

¹⁷ किजोकि अस तैन केरे ज़ेरे नईं, ज़ैना परमेशरेरू वचन पेइंसां केरे लेइ प्रचार केरतन, पन अस मनेरी सच़ैई सेइं, ते परमेशरेरे तरफां परमेशर हाज़र सेमझ़तां मसीह मां ज़ोतम।