रोमियो 9 - बग़ल्याणी

परमेशर और तिना रे चुणे रे लोक

¹ आऊँ मसीह रे सच बोलूँआ, चूठ नि बोलदा और मेरा विवेक बी पवित्र आत्मा रे गवाई देओआ

² कि माखे बऊत दु:ख ए और मेरा मन मेरे लोका री खातर दु:खदा रओआ।

³ कऊँकि आऊँ एथो तक चाऊँ था कि आपणे यहूदी पाईया खे, जो शरीरो ते मेरे टब्बरो रे ए, आपू ई मसीह ते श्रापित और लग ऊई जांदा।

⁴ सेयो बी मां ई जेड़े इस्राएली लोक ए। सेयो लोक बी परमेशरो रे चुणे रे गोदीपुत्र ए। परमेशरे आपणी महिमा तिना लोका पाँदे प्रकट कित्ती। तिने तिना लोका साथे वाचा बानी और आपणा बिधान दित्तेया। परमेशरो तिना लोका खे आपणी भक्ति करने खे और आपणा नौखा वादा पाणे खे खास अक्क दित्तेया।

⁵ मशुर पूर्वज बी तिना रेईए और मसीह बी शरीरो रे भावो ते तिना ई बीचा ते ऊआ। से परमेशर ए जो सबी पाँदे राज करोआ तेसरी तारीफ जुगो-जुगो ऊँदी रओ। आमीन्।

⁶ फेर बी ये नि समजणा चाईयो कि परमेशर आपणा बादा निबाणे रे असफल ऊईगा रा। कऊँकि इस्राएलो रे वंशो रे जन्म लणे वाल़े सब लोक सच्चे इस्राएली निए।

⁷ अब्राहमो रे वंशो रे जन्म लणे तेई सब परमेशरो री सच्ची ल्वाद नि बणी जांदे। कऊँकि परमेशरे अब्राहमो खे बोलेया, “जिना इसहाको रे वंशो ते जन्म लणा सेयो ई तेरे वंशो रे माने जाणे।”

⁸ इजी रा मतलब ये ए कि शरीरो ते जम्मे रे परमेशरो री ल्वाद निए, पर वादे रे जरिए जम्मे रेई अब्राहमो रे असली वंश गिणे जाओए।

⁹ कऊँकि वादे रा वचन ये ए, “आगले साल एस बखते मां फेर आऊणा और सारा रे एक पुत्र ऊणा।”

¹⁰ और बस येई नि, पर जेबे रिबका रे गर्भो रे एकी मर्द मतलब आसा रे पुर्वज इसहाको ते जुड़ुवा बच्चे थे।

¹¹ और एबुए तक ना बाल़क जमी रे थे और ना तिने कुछ पला या बुरा कित्तेया रा था कऊँकि परमेशरो री इच्छा, जो तेसरे चुणे रे मुताबिक ए, कर्मो री बजअ ते नि, पर बुलाणे वाल़ेया री बजअ ते बणी रओ।

¹² तिने बोलेया, “जेठा छोटे रा दास ऊणा।”

¹³ जेड़ा पवित्रो शास्त्रो रे लिखी राखेया, “मैं याकूबो खे प्यार कित्तेया, पर एसाव अप्रिय जाणेया।”

¹⁴ तो आसे क्या बोलूँ? क्या परमेशरो रे कअरे अन्याय ए? कदी पनि।

¹⁵ कऊँकि परमेशरे मूसे खे बोलोआ, “आऊँ जेस केसी पाँदे बी दया करना चाऊँ, तेस पाँदे दया करूँआ, और जेस केसी पाँदे कृपा करना चाऊँ, तेस पाँदे ई कृपा करूँआ।”

¹⁶ इजी खे ये माणूंआ री इच्छा या तेसरी मईणती पाँदे निर्भर नि करदे, बल्कि दया करने वाल़े परमेशरो पाँदे निर्भर रओए और जेसखे से चुणना चाओआ तेस पाँदे दया करोआ।

¹⁷ कऊँकि पवित्र शास्त्रो रे मिस्रो रे राजा फिरौनो खे बोलेया था, “मैं तूँ इजी खे राजा बणाया ताकि आऊँ तांदे आपणी सामर्थ दखाऊँ और मेरे नाओं रा प्रचार सारी तरतिया रे ओ।”

¹⁸ तो परमेशर जेस पाँदे चाओआ, तेस पाँदे दया करोआ और जेसखे चाओआ, तेसखे हठी बणाई देओआ।

परमेशरो रा रोष और तिना री कृपा

¹⁹ तेबे कुछ लोका माखे बोलणा, “जे एड़ा ए तो परमेशरो किंयाँ आसा खे दोषी ठराई सकोआ? कऊँकि कोई बी तिना खे रोकी नि सकदा जो से करना चाओआ।”

²⁰ ओ पाई! पला तूँ कुण ए, जो परमेशरो ते बईस करी करोआ? क्या कअड़ी री चीज, कअड़णे वाल़ेया खे बोली सकोई कि तैं आऊँ एड़ी कऊँ बणाई राखी?

²¹ क्या कम्मारो खे माट्टिया पाँदे अक्क निए कि एक ई चाको पाँदो ते, एक पांडा खास कामो रे इस्तेमालो खे और दूजा हर रोज इस्तेमाल करने खे बणाओ?

²² हालाँकि परमेशरो खे आपणा रोष और आपणी सामर्थ प्रगट करने रा अक्क ए, फेर बी से तिना लोका साथे बऊत ई सब्र राखोआ, जिना पाँदे तिना रा रोष आओआ और जो विनाशो खे त्यार कित्ते थे।

²³ तिने एड़ा इजी खे कित्तेया कि दया रे तिना पांडेया पाँदे आपणी महिमा री शान प्रकट करना चाओ था जो तिने पईले तेई तेसा महिमा खे त्यार कित्ते।

²⁴ मतलब आसा पाँदे जिने तिने ना बस यहूदिया बीचा ते, बल्कि दूजी जातिया बीचा ते बी बुलाया।

²⁵ जेड़ा परमेशर होशे भविष्यवक्ता री कताबा रे बी दुजिया जातिया रे बारे रे बोलोआ, “जो मेरी प्रजा नि थी, तिना खे मां आपणी प्रजा बोलणा और जो प्यारी नि थी, तिना खे प्यारा बोलूँगा।”

²⁶ और, “एड़ा ऊणा कि जेते जगा रे तिना खे एड़ा बोलेया था कि ‘तुसे मेरी प्रजा निए,’ तेते जगा रे सेयो ‘जिऊँदे परमेशरो री ल्वाद ऊणे।’ ”

²⁷ और यशायाह भविष्यवक्ता इस्राएली लोका रे बारे रे आक्का पाई की बोलोआ, “चाए इस्राएलिया रे ल्वादा री गिणती समुद्रो रे बालूए रे बराबर ओ, तेबे बी तिना बीचा ते थोड़े ई बचणे।

²⁸ कऊँकि प्रभुए आपणा वचन तरतिया रे पूरा करी की धार्मिकता ते चट ई तरतिया रे लोका रा न्याय करना।”

²⁹ जेड़ा यशायाह भविष्यवक्ते पईले बी बोलेया था, “जे सेनाओं रा प्रभु, आसा खे कोई वंश नि छाडदा, तो आसे सदोमो जेड़े ऊई जाणे थे और गमोरा जेड़े ठईरने थे।”

इस्राएलो रा अविश्वास

³⁰ तो आसे क्या बोलूँ? ये कि दूजी जाति, जो तर्मो खे नि टोल़ो थे, तिना खे धार्मिकता मिली, मतलब तेसा धार्मिकता खे जो विश्वासो ते ए।

³¹ पर इस्राएली लोक जो तर्मो रे बिधानो खे टोल़दे ऊए, तर्मी बणने रे सफल नि ऊए।

³² किजी खे? इजी री खातर कि सेयो विश्वासो ते नि, पर मानो अच्छे कामा ते तेसखे टोल़ोए, तिने तेस ठोकरा रे पात्थरो पाँदे ठोकर खाई।

³³ जेड़ा पवित्र शास्त्रो रे लिखी राखेया, “देखो, आऊँ सिय्योन नगरो रे एक ठोकर लगणे रा पात्थर और ठोकर खाणे री जान राखूँआ और जेस तेस पाँदे विश्वास करना, से शर्मिंदा नि ऊणा।”