याकूब 4 - बग़ल्याणी

दुनिया साथे दोस्ती

¹ तुसा बीचे लड़ाईया और चगड़े केथा ते आईगे? पक्का तिना बुरिया इच्छा ते जो तुसा रे अंगा रे लड़दे-चगड़दे रओए।

² जेबे तुसे इच्छा राखोए पर तुसा खे मिलदा नि तो तुसे अत्या करने खे त्यार ऊई जाओए। तुसे दूजे री चीजा हड़पणे री इच्छा राखोए और जेबे तुसा खे कुछ नि मिलदा, तेबे तुसे जल़ी की लड़दे-चगड़दे रओए। तुसा खे इजी खे नि मिलदा, कऊँकि तुसे परमेशरो ते मांगदे नि।

³ तुसे माँगोए और फेर बी तुसा खे मिलदा नि, कऊँकि बुरी इच्छा ते माँगोए, ताकि आपणे भोग-बिलासो रे उड़ाई देओ।

⁴ ओ अविश्वासी लोको! क्या तुसे नि जाणदे कि दुनिया री चीजा साथे दोस्ती राखणी, परमेशरो साथे बैर राखणा रे बराबर ए? तो जो कोई दुनिया रा दोस्त बणना चाओआ, से आपणे आपू खे परमेशरो रा बैरी बणाओआ।

⁵ क्या तुसे ये समजोए कि पवित्र शास्त्र बेकारो रेई बोलोआ कि जिने परमेशरे आत्मा आसा रे पीतरे बसाई राखी, से बड़ी इच्छा राखोआ कि आसे सिर्फ तेसरी ई आराधना करिए।

⁶ से तो ओर बी कृपा देओआ, तेबेई तो पवित्र शास्त्रो रे ये लिखी राखेया, “परमेशर कमण्डिया रा बरोद करोआ, पर जो दीन ए तिना पाँदे कृपा करोआ।”

⁷ इजी री खातर परमेशरो रे अधीन ऊई जाओ और शैतानो रा मुकाबला करो, तो से तुसा गे ते नठी जाणा।

⁸ परमेशरो नेड़े आओ, तो से बी तुसा रे नेड़े आऊणा। ओ पापियो! आपणी जिन्दगिया ते पापो खे दूर करो और ओ दोगले लोको! आपणे दिलो खे पवित्र करो।

⁹ आपणे पापो री बजअ ते दु:खी ओ, शोग करो, रोओ। तुसा री आस्सी शोगो रे और तुसा री खुशी उदासिया रे बदली जाओ।

¹⁰ प्रभुए सामणे दीन बणो, तो तेस तुसे आदरो जोगे बनाणे।

पाईया पाँदे दोष लगाणा

¹¹ ओ प्यारे साथी विश्वासियो! एकी-दूजे री निन्दा नि करो, जो आपणे पाईया री निन्दा करोआ या पाईया पाँदे दोष लगाओआ, से बिधानो री निन्दा करोआ और बिधानो पाँदे दोष लगाओआ, तो तूँ बिधानो पाँदे चलणे वाल़ा निए, पर तेस पाँदे हाकिम ठईरेया।

¹² बिधान देणे वाल़ा और हाकिम एक ईए, जेसखे बचाणे और नाश करने री सामर्थ ए। तूँ कूणे जो आपणे पड़ोसिया पाँदे दोष लगाएया?

कमण्डो रे खलाफ चेतावणी

¹³ तुसे जो ये बोलोए, “आज या काल आसे केसी ओरी नगरो रे जाई की तेती एक साल बिताऊँगे और व्यापार करी की फाईदा ऊठाऊँगे।”

¹⁴ पर ये नि जाणदे कि काल क्या ऊणा। सुणी तो लओ कि तुसा री जिन्दगी आयी ई क्या? तुसे तो मानो प्वाफो जेड़े ए, जो थोड़ी देरा खे दिशोआ और तेबे राची जाओआ।

¹⁵ इजी रे बदले तुसा खे ये बोलणा चाईयो, “जे प्रभु चाओगा, तो आसे जिऊँदे रऊँगे और ये कि से काम बी करूँगे।”

¹⁶ पर एबे तुसे आपणी त्वाल़िया पाँदे कमण्ड करोए; एड़ा सारा कमण्ड बुरा ओआ।

¹⁷ इजी री खातर जो कोई पलाई करना जाणोआ और करदा नि, तेसखे ये पाप ए।