इब्रानियों 8 - बग़ल्याणी

यीशु म्हारा प्रदान पुरोईत

¹ इना गल्ला रा निचोड़ ये ए कि आसा गे एक एड़ा प्रदान पुरोईत ए, जो स्वर्गो पाँदे परमेशरो रे महान् सिंहासनो रे दाँणे कनारे बैठेया राए।

² आसा रा प्रदान पुरोईत महा पवित्र जगा और तेस सच्चे तम्बूओ रे सेवक ए, जो किने मांणूए नि, बल्कि परमेशरे बणाई राखेया।

³ हर एक प्रदान पुरोईतो खे पापो री माफिया खे पेंट और बलिदान चढ़ाणे खे नियुक्त करेया जाओआ, इजी खे जरूरी ए कि आसा रे प्रदान पुरोईत यीशुए गे बी कुछ चढ़ाणे खे ओ।

⁴ जे यीशु मसीह तरतिया पाँदे ऊँदा तो से कदी पुरोईत नि ऊँदा, कऊँकि एती मूसे रा बिधानो रे मुताबिक पेंट चढ़ाणे वाल़े पुरोईत तो आए।

⁵ ये सेयो पुरोईत ए जो सिर्फ स्वर्गो रिया चीजा रे प्रतिरूप और टवांवे री आराधना करोए। कऊँकि जेबे मूसा तम्बू बनाणे वाल़ा था, तो तेसखे ये चेतावणी मिली, “देख जो नमूना ताखे सीनै पाह्ड़ो पाँदे दखाया था, तिजी रे मुताबिक सब कुछ बनाणा।”

⁶ पर एबे जो पुरोईतो रा काम यीशु मसीह खे दित्तेया राए, से ओरी पुरोईता खे दित्ते रे पुरोईता रे कामो ते बऊत बढ़ी की ए। कऊँकि से ओर बी खरी वाचा रा बचोला ठईरेया, जो ओर खरे वादे रे सहारे बानी राखी।

⁷ जे से पईली वाचा निर्दोष ऊँदी, तो दूजी वाचा री जरूरत ई नि ऊँदी।

⁸ पर परमेशर लोका पाँदे दोष लगाई की बोलोआ, “प्रभु बोलोआ, देखो, सेयो दिन आओए कि मां इस्राएलो रे लोका साथे और यहूदा रे लोका साथे, नई वाचा बानणी।

⁹ ये तेसा वाचा जेड़ी नि ऊणी, जेड़ी मैं तिना रे बाप-दादेया साथे, तेस बखते बानी थी, जेबे आऊँ तिना रा आथ पकड़ी की तिना खे मिस्र देशो ते निकयाल़ी की ल्याया, कऊँकि सेयो मेरी वाचा पाँदे स्थिर नि रये और मैं तिना री खबर-सम्बाल़ नि लयी। प्रभु येई बोलोआ।

¹⁰ फेर प्रभु बोलोआ कि जो नई वाचा मां तिना दिना ते बाद इस्राएलो रे कराने साथे बानणी, से ये कि मां आपणा बिधान तिना रे मनो रे पाणी और से तिना रे दिलो रे लिखणी और आऊँ तिना रा परमेशर ठईरना और सेयो मेरे लोक ठईरने

¹¹ हर एकी आपणे देशवासियो खे और आपणे पाईया खे ये शिक्षा नि देणी कि ‘तूँ प्रभुए खे पछयाण।’ कऊँकि छोटे ते बड़े तक सबी आऊँ पछयाणी लणा।

¹² कऊँकि मां तिना रे बुरे काम माफ करने और तिना रे पाप फेर याद नि करने।”

¹³ नई वाचा री स्थापना रे तिने, पईली वाचा पुराणी ठराई और जो चीजा पुराणिया और खराब ऊई जाओईया, तिना रा खत्म ऊणा जरूरी ए।