गलातियों 6 - बग़ल्याणी

एकी दूजे री मताद करो

¹ ओ साथी विश्वासियो! जे कोई मांणू केसी पापो रे पकड़ेया जाओ, तो तुसे जो पवित्र आत्मा री अगुवाईया रे चलोए, नरमाईया साथे एड़ेया खे तर्मो री बाटा रे फेर आऊणे रे मताद करो और आपणी बी चौकसी राखो, ताकि तुसे बी परीक्षा रे नि पड़ो।

² तुसे एकी-दूजे रा पार चको और ईंयां मसीह रा बिधान पूरी करो।

³ कऊँकि जे कोई आपणे आपू खे ए समजोआ कि आँऊ ओरी ते बढ़ी की ए तो से आपणे आपू खे तोखा देओआ। जबकि से कुछ बी निए।

⁴ पर हर एक जन आपणे ई कामो खे परखी लओ। जे से अच्छा ओगा तो तुसे आपणे कामो पाँदे दूजे रे कामो ते तुलना कित्ते बिना कमण्ड करी सकोए।

⁵ कऊँकि हर एकी मांणूए खे आपणा ई बोजा चकणा पड़ना।

⁶ जो लोक परमेशरो रे वचनो री शिक्षा पाओआ, सेयो लोक सब खरिया चीजा रे आपणे सिखाणे वाल़ेया खे शामिल करो।

⁷ तोखा नि खाओ, परमेशर मजाको रे नि उड़ाया जांदा, कऊँकि मांणूए जो कुछ बीजणा, सेई बाडणा।

⁸ कऊँकि जो आपणे शरीरो रे पापी सबाओ री तंईं बीजोआ, तेस शरीरो रेई जरिए विनाशो री फसल बाडणी। और जो पवित्र आत्मा खे बीजोआ, तेस पवित्र आत्मा रेई जरिए अनन्त जीवनो री फसल बाडणी।

⁹ आसे खरे काम करने रे इम्मत नि छाडिए, कऊँकि जे आसे टील्ले नि ऊए, तो ठीक बखतो पाँदे फसल बाडणी।

¹⁰ इजी री खातर जेथो तक मौका मिलो आसे सबी साथे पलाई करिए, खास करी की विश्वासी पाईया साथे पलाई करिए।

आखरी चेतावणी और अभिवादन

¹¹ देखो, मैं कितणे बड़े-बड़े अक्षरा रे तुसा खे आपणे आथो साथे लिखी राखेया।

¹² जो लोक शरीरो रा दखावा चाओए सेयो ई तुसा रा खतना करवाणे खे जोर पाओए, इजी खे की सेयो मसीह रे क्रूसो रे जरिए सताए नि जाओ।

¹³ कऊँकि खतना कराणे वाल़े आपू तो मूसे रा बिधानो पाँदे नि चलदे, पर तुसा रा खतना इजी खे करवाणा चाओए ताकि तुसा रे शरीरो री दशा पाँदे कमण्ड करी सको।

¹⁴ पर एड़ा नि ओ कि आऊँ किजी ओरी गल्ला पाँदे कमण्ड करुँ, बस म्हारे प्रभु यीशु मसीह रे क्रूसो रा, जेतेरी बजअ ते दुनिया मेरी नजरा रे और आऊँ दुनिया री नजरा रे क्रूसो पाँदे चड़ाई ता रा।

¹⁵ केसी रा खतना ऊई रा ओ या बिना खतने रा ओ इजी री कोई अहमियत निए। पर अहमियत इजी गल्ला रिये कि आसे पूरे तौरौ पाँदे नई सृष्टि बणी जाईए।

¹⁶ और जितणे एस नियमो पाँदे चलणे, तिना पाँदे और परमेशरो रे इस्राएलो पाँदे, शान्ति और कृपा ऊँदी रओ।

¹⁷ आगे कोई माखे दु:ख नि देओ, कऊँकि आऊँ प्रभु यीशुए रे दाग, आपणे शरीरो रे लयी की फिरदा रऊँआ।

¹⁸ ओ साथी विश्वासियो! आँऊ बिनती करूँआ कि म्हारे प्रभु यीशु मसीह री कृपा तुसा री आत्मा साथे रओ। आमीन्।