प्रेरित 14 - बग़ल्याणी

इकुनियुमो रे पौलुस और बरनबास

¹ इकुनियुम नगरो रे एड़ा ऊआ कि पौलुस और बरनबास यहूदिया रे प्रार्थना रे कअरो रे साथे गये और एड़िया गल्ला कित्तिया कि यहूदी और यूनानिया बीचा ते कई जणे विश्वास कित्तेया।

² पर ना मानणे वाल़े यहूदिये दुजिया जातिया रे मन विश्वासी पाईया रे खलाफ उकसाए और फूट पैदा करी ती।

³ पौलुस और बरनबास बऊत दिनो तक तेती रये और प्रभुए पाँदे विश्वास करी की इम्मता साथे गल्ला करो थे और से तिना रे आथो साथे चिह्न और अचम्बे रे काम करवाओ था और आपणी कृपा रे वचनो पाँदे गवाई देओ था।

⁴ पर इलाके रे लोका बीचे फूट पड़ी गी थी और तेबे कुछ लोक यहूदिया रे कनारे और कुछ प्रेरिता री तरफा खे ऊईगे थे।

⁵ जेबे दूजी जाति और यहूदी तिना रा मजाक करने और तिना खे पत्थराव करने खे आपणे अधिकारिया समेत तिना पाँदे दौड़े,

⁶ तेबे तिना खे एसा गल्ला रा पता लगी गा और सेयो लूकाउनिया प्रदेशो रे लुस्त्रा और दिरबे रे नगरो रे और ओरे-पोरे रे प्रदेशो रे नठीगे

⁷ और तेती जाई की सुसमाचार सुनाणे लगे।

पौलुस लुस्त्रा और दिरबे रे

⁸ लुस्त्रा नगरो रे एक मांणू था बैठे रा, जो पैरा ते कमजोर था। से जन्मो तेई लंगड़ा था और कदी पनि चली रा था।

⁹ से पौलुसो खे गल्ला करदे ऊए सुणने लगी रा था और तिने एक टक लगाई की देखेया कि एसखे ठीक ऊणे रा विश्वास ए

¹⁰ और जोरे की बोलेया, “आपणे पैरा रे पारे सीदा खड़ा ऊई जा।” तेबे से उटकी की चलणे-फिरने लगेया।

¹¹ लोके पौलुसो पाँदे विश्वास करी की लूकाउनिया पाषा रे जोरे की बोलेया, “देवता आसा गे उतरी की आईगे रे।”

¹² तेबे तिने बरनबासो खे यूनानी देवते रा नाओं पाँदे ज्यूस और पौलुसो खे हिरमेस बोलेया, कऊँकि ये संदेश करने रे खास था।

¹³ ज्यूस तेस मन्दरो रा पुजारी था, जो तेसरे नगरो ते सामणे था। बेल और फूला रे आर फाटका पाँदे लगाई की लोका साथे बलिदान करना चाओ था।

¹⁴ पर बरनबास और पौलुस प्रेरिते जेबे सुणेया, तो तेबे तिने आपणे टाले फाड़े और पीड़ा रे लमखणे लगे और आक्का पाई की बोलणे लगे,

¹⁵ “ओ लोको! तुसे क्या लगी रे करने? आसे बी तो तुसा जेड़े दु:ख-सुख पोगणे वाल़े मांणू ए और तुसा खे सुसमाचार सुणाऊँए कि तुसे इना बेकारा रिया चीजा ते लग ऊई की जिऊँदे परमेशरो री तरफा खे फिरो, जिने स्वर्ग, तरती, समुद्र और जो कुछ तिना रे आए, से बणाया।

¹⁶ तिने बीते रे बखतो रे सब जातिया आपणी-आपणी बाटा रे चलणे दित्तिया।

¹⁷ तेबे बी तिने आपणे आपू खे बिना गवाओ ते नि छाडेया, पर से पला करदा रया और सर्गो ते बर्खा और फल़दार ऋतु देई की तुसा रे मनो खे रोटी और खुशिया ते परदा रया।”

¹⁸ ये बोली की बी तिने लोक बडिया मुश्किला ते रोके कि तिना खे बलिदान नि करो।

¹⁹ पर कुछ यहूदिये अन्ताकिया और इकुनियुम नगरो ते आयी की लोक आपणी तरफा खे करी ते और पौलुसो खे पात्थर बाए और तेसखे मरे रा समजी की नगरो ते बारे कसिटी की लयी गे।

²⁰ पर जेबे चेले आईकि तेसरे चऊँ कनारे खड़े ऊईगे, तेबे से उठी की नगरो खे चली गा और दूजे दिने बरनबासो साथे दिरबे खे चली गा।

सीरिया रे अन्ताकिया खे आऊणा

²¹ तेबे पौलुस और बरनबास तेस नगरो रे लोका खे सुसमाचार सुणाई की और बऊत सारे चेले बणाई की लुस्त्रा और इकुनियुमो रे ऊँदे ऊए अन्ताकिया नगरो खे वापस ऊईगे

²² और सेयो हर नगरो रे चेलेया रे मनो खे स्थिर (पक्का) करदे रये और ये उपदेश देंदे रओ थे कि विश्वासो रे बणे रे रओ और ये बोलदे रओ थे, “आसा खे बड़े क्ल़ेश उठाई की परमेशरो रे राज्य रे जाणा पड़ना”

²³ और तिने हर एक मण्डल़िया रे तिना खे बुजुर्ग ठईराए और बअरतो साथे प्रार्थना करी की सेयो प्रभुए रे आथो रे सम्बाल़ी ते, जेस पाँदे तिने विश्वास कित्तेया था।

²⁴ तेबे सेयो पिसिदिया प्रदेशो रे ऊँदे ऊए पंफूलिया प्रदेशो रे पऊँछे।

²⁵ तेबे पंफूलिया प्रदेशो रे पिरगा नगरो रे वचन सुणाई की अत्तलिया नगरो रे आए

²⁶ और तेथा ते सेयो जाह्जो रे अन्ताकिया नगरो रे आए, जेथा ते तिना खे परमेशरो री कृपा रे सम्बाल़ी की तेस कामो खे पेजेया था जेतेखे सेयो एबे पूरा करी की वापस आईगे।

²⁷ तेती पऊँछी की तिने मण्डल़ी कट्ठी कित्ती और तिना खे बताया कि परमेशरे आसा साथे रई की कितणे बड़े-बड़े काम कित्ते और दुजिया जातिया खे विश्वासो रा दरवाजा खोली ता।

²⁸ पौलुस और बरनबास चेलेया साथे बऊत दिन तक रये।