रोमियो 9 - पहाड़ी महासुई

परमेश्‍वर और तेसरै छ़ांटै औन्दै लोग

¹ हाऊं मसीह दी तुमुलै सौच़्च़ौ बोलाऊ, हाऊं झ़ूठ नाईं बोलदौ और मैरौ मन भी पवित्र आत्मा री गवाही दिया आ।

² कि मुलै भौरी दु:ख ई, और मैरौ ज़िऊ सौदा मैरै लोगु लै दुखदै थाका लागी,

³ कैलैकि हाऊं इदरा झ़ांऊ च़ाहा थौ कि आपणै यहुदी भाईऊ लै ज़ो मैरै आपणै ब्रादरी ई, आपु ई मसीह कु शापित हुआ।

⁴ सै इस्राइला रै लोग ई। ज़ो परमेश्‍वरा रै लोल़डै बौणना लै ई च़ुनै औन्दै। महिमा, वायदै, नियम और भौक्ती और विधी इऐ तिऊं रै ई।

⁵ तिउंरै स्याणै अब्राहम, इसहाक और याकूब ई। और आदमी हुणै रै नातै मसीह भी इस्राइली थौ। और सेऊ परमेश्‍वर आ ज़ुण सारी च़िज़ु माथै राज़ कौरा आ सेऊ सौदा री महिमा रै लायक आ! आमीन।

⁶ पर इणौ नाईं, कि परमेश्‍वर आपणै वायदै पुरै कौरणै दी नाकाम हुई गौ आ, एथीलै कि इस्राइला रै सारै वंशा रै लोग परमेश्‍वरा रै सौच़्च़ै लोग नाईं ई।

⁷ और अब्राहमा रै वंशा दी पैदै हुणै कु सारै परमेश्‍वरा रै सौच़्च़ै लोल़डै नाईं बौणदै, कैलैकि परमेश्‍वरै अब्राहमा लै थौ बोलौ औन्दौ, “कि ज़ुण इसहाका रै वंशा कु पैदै हुआ लै सेई तैरै वंश बौणनै ई।”

⁸ मतलब कि ज़ुण शरीरा री इच़्छ़ा कु पैदै हुआई सै परमेश्‍वरा री सन्तान नाईं, पर सिरफ वायदै री सन्तान ई अब्राहमा रै वंश मानिया ई।

⁹ कैलैकि वायदा रौ वचन एऊ आ, “कि आगलै बौरशै हाऊं एज़ै बौगतै दुज़ी बारै आशाऊ और तेबी सारा रौ एक छ़ोहरु हुणौ आ।”

¹⁰ और सिरफ इणौ ई नाईं, पर ज़ेबी रिबका आमारै बुज़ुर्ग इसहाका कु गौरकड़ी हुई ता तिंआरै गर्भा दी ज़ौंकर लोल़डै थै।

^11-12 और इबी झ़ांऊ तिउंरै दुइया छ़ोहरु रौ ज़नम भी नाईं हुऔ थौ। और तिंउऐ सेज़ै बौगता झ़ाऊं कुछ़ भौलौ-बुरौ काम भी नाईं कियौ थौ ज़ेबी रिबका लै इणौ बोलौ कि, “ज़ेठौ छ़ोहरु छ़ोटै छ़ोहरु रौ सेवक बौणनौ आ।” एऊ एथीलै हुऔ कि परमेश्‍वरा रौ इरादौ तिऊं छ़ांटणै रै मुताबिक बौणी रौआ। ज़ो आदमी रै कौरमा री वज़ाह कु नाईं पर औटाउणै वाल़ै रै फैसलै री वज़ाह कु आ।

¹³ ज़िणौ पवित्रशास्त्रा दी आ लिखौ औन्दौ कि, “परमेश्‍वरै एसावा कु ज़ादौ प्यार याकुबा आइलै कियौ आ।”

¹⁴ एथीलै आमै का बोलु लै? का परमेश्‍वर केबी कासी आइलै गलत कौरा आ? नाईं, केबी भी नाईं।

¹⁵ कैलैकि परमेश्‍वरै मुसा कु बोला आ, हाऊं ज़ास कासी माथै दया कौरणौ च़ाहा ऊ, तेस माथै दया कौराऊ, और ज़ास कासी माथै कृपा कौरणौ च़ाहा ऊ तेस माथै कृपा कौराऊ।

¹⁶ एथीलै इऐ ना ता च़ाहाणै वाल़ेऊ री, ना फेटै मारनै वाल़ेऊ री पर दया कौरणै वाल़ै परमेश्‍वरा री इच़्छ़ा आ।

¹⁷ कैलैकि पवित्रशास्त्रा दी परमेश्‍वरै मिस्र देशा रै राज़ै फिरौना कु बोलौ थौ कि, “मुंइऐ तू एज़ी ताइंऐ राज़ौ चाणौ ई, कि ताऊं दी हाऊं आपणी तागत देखाल़ु, और मैरै नावां रौ परचार सारी धौतरी माथै हुआ।”

¹⁸ एथीलै परमेश्‍वर ज़ास च़ाहा सा, तेस माथै दया कौरा सा। और ज़ास च़ाहा सा तेस काठौ चाणौ सा।

परमेश्‍वरा रौ रोश और तेसरी दया

¹⁹ ता ताऐं मुलै बोलणौ आ, ता, परमेश्‍वर आदमी माथै आरोप कैलै ला सा? पर कुण तेसरी इच़्छ़ा रौ बिरोध कौरी सौका सा?

²⁰ ओ गोश्टण, तू कुण ई, ज़ो परमेश्‍वरा कु बैंहस-बाज़ी कौरा ई? का चाणी औन्दी च़ीज़ आपणै चाणनै वाल़ै लै बोली सौका आ, कि ताइंऐ हाऊं इणौ कैलै चाणौ ऊ?

²¹ का कुम्हारा कै माटै माथै हक्क नाईं, कि एक ई माटै रै पिन्टै कु एक ओखर खास कामा लै, और दुजौ रोज़कै कामा लै चाणा?

²² अगर परमेश्‍वर आपणै रोश देखाउणा लै या आपणी तागत पौगड़ी कौरना रै मकसदा कु भौरी सौबरा कौरी रोशा रै सै ओखर सहन किऐ, ज़ो नाश हुणा लै त्यार थै, ता एथदी कुण रुकावट पाई सौका आ?

²³ तिणीऐ इणौ एथीलै कियौ कि सेऊ दया रै इणै ओखरु माथै आपणी महिमा री शान पौगड़ी कौरणी च़ाहा थौ, ज़ो तिणीऐ पैहला कु तिऐं महिमा लै त्यार कियौ थौ।

²⁴ मतलब कि दया रै ओखर आमै ई ज़ो तिणीऐ ना सिरफ यहुदिऊ मांझ़िआ कु, पर दुजी ज़ातीऊ मांझ़िआ कु भी च़ुनै ई।

²⁵ ज़िणौ परमेश्‍वर होशे भविष्यवक्ता री किताबी दी दुज़ी ज़ातीऊ रै बारै दी बोला सा, “ज़ो मेरी ज़ौण-पौरज़ा नाईं थी, तिउंलै हाऊं आपणी ज़ौण पौरज़ा बोलाऊ। और ज़ो मुलै प्यारै नाईं थै, तिउंलै हाऊं प्यारै बोलाऊ।”

²⁶ और, “ज़ेज़ी ज़ागाह दी परमेश्‍वरै इणौ बोलौ थौ कि, ‘तुमै मेरी ज़ौण-पौरज़ा नाईं ई,’ सेज़ी ई ज़ागाह दी ‘परमेश्‍वर तिउंलै आपणी सन्तान बोला आ।’ ”

²⁷ और यशायाह भविष्यवक्ता इस्राइल लोगु रै बारै दी ज़ोरै औटाइयौ बोला आ, “च़ाऊ इस्राइला लोगु री गिनती समुन्दरा रै बाल़ु ज़िणी भौरी औली, तैबै भी तिऊं मांझ़िऊ कु थोड़ै लोग बौच़ाई।

²⁸ कैलैकि प्रभु आपणौ वचन धौतरी माथै पुरौ कौरीयौ, सारै लोगु रौ फैसलौ भौरी शिगरी कौरा आ।”

²⁹ ज़िणौ यशायाह भविष्यवक्तै पैहलै भी बोलौ थौ, “अगर सारेऊ कु शक्ति वाल़ौ प्रभु आमुलै केज़ौ भी वंश नाईं छ़ाड़दौ, ता आमै सदोम और अमोरा ज़िणै नाश हुणै थै।”

इस्राइला रौ अविश्वास

³⁰ एथीलै आमै का बोलु लै? इणौ कि ज़ो दुजी ज़ाती रै लोग ज़ो भौलाई रै काम नाईं कौरा थै, तिंउऐ विश्वासा रै ज़ौरिऐ परमेश्‍वरा कु भौलाई पाई।

³¹ पर इस्राइला रै लोग, ज़ो परमेश्‍वरा आइलै धौर्मी बौणना लै मुसा रै नियम मानणै री कोशिश कौरा थै पर सै कामयाब नाईं हुऐ।

³² इयौ किणौ हुई सौका आ? एथीलै कि सै विश्वासा कु नाईं, पर मानौ आच़्छ़ै कामा कौरी मुसा रै नियम लोड़ाई। तिंउऐ बांगणै ढोल़ा दी लागै और सै लोटी गौऐ,

³³ ज़िणौ पवित्रशास्त्रा दी आ लिखौ औन्दौ, “देखौ, हाऊं यरुशलेम शैहरा दी एक इणौ ढोल़ और डोकौ छ़ाड़ाऊ सै लोगु लोटाल़ा ई, पर ज़ुण तेस माथै विश्वास कौरालौ सेऊ केबी भी नाईं शौरमिंदौ।”