रोमियो 8 - पहाड़ी महासुई

पवित्र आत्मा रै ज़ौरिऐ ज़िन्दगी

¹ एथीलै ऐबै ज़ो यीशु मसीह दी आ, तिऊं माथै सौज़ा रौ हुकम नाईं। कैलैकि सै शरीरा रै मुताबिक नाईं पर आत्मा रै मुताबिक च़ाला ई।

² कैलैकि पवित्र आत्मै तुमुलै सै ज़िन्दगी देई आ ज़ो यीशु मसीह रै ज़ौरिऐ मिला और तुमै पाप और मौउता कु आज़ाद कौरी गौऐ।

³ कैलैकि ज़ो काम मुसा रै नियमा आमारै पाप वाल़ै च़ाल-च़लणा री वज़ाह कु कमज़ोर हुईऔ ना कौरी बौल़ै, सै काम परमेश्‍वरै किऐ ई। यानी की आपणौ छ़ोहरु आमु ज़िणै पापी शरीरा री बराबरी दी, और आमारै पापा री खातिर बौल़ी हुणा लै भेज़ीयौ, मसीह रै शरीरा दी पापा माथै सौज़ा रौ हुकम दैऔ।

⁴ एथीलै कि आमुदी ज़ुण पापी च़ाल-च़लणा ज़िणै नाईं पर पवित्र आत्मा रै ज़िणै च़ाला ई, नियमा री ज़ुरत पुरी च़ांई हुणी।

⁵ कैलैकि शरीरा रै इच़्छ़ा माथै हाण्डणै वाल़ौ आदमी शरीरा री बुशु माथै ज़िऊ ला ई। पर पवित्र आत्मा री इच़्छ़ा माथै हाण्डणै वाल़ौ आदमी पवित्र आत्मा री बुशु माथै ज़िऊ ला ई।

⁶ शरीरा री इच़्छ़ा माथै हाण्डणौ ता मौत आ, पर पवित्र आत्मा री इच़्छ़ा माथै हाण्डणौ ज़िन्दगी और शान्ति आ।

⁷ शरीरा री बुशु माथै ज़िऊ लाइणौ ता परमेश्‍वरा आइलै दुश्मनी छ़ाड़णी आ, कैलैकि ना ता पापी च़ाल-च़लण परमेश्‍वरा रै अधीन आ, और ना नियम मानी बौल़दौ।

⁸ और ज़ो पापी च़ाल-च़लणा रै वशा दी ई, सै परमेश्‍वर खुश नाईं कौरी बौल़दै।

⁹ पर ज़ेबी पवित्र आत्मा तुमु दी बौसा आ, ता तुमै पापी च़ाल-च़लणा रै वशा दी नाईं, पर पवित्र आत्मा रै वशा दी ई। अगर कास दी पवित्र आत्मा नाईं ता सेऊ मसीह रौ ज़ौणौ नाईं।

¹⁰ आबै एथीलै मसीह तुमु दी वासीआ आ, पापा री वज़ाह कु शरीरा रै मौरै औन्दै हुइयौ भी धार्मिकता री वज़ाह कु तुमारी आत्मा ज़िउंदी आ।

¹¹ अगर परमेश्‍वरा री आत्मा ज़ुणिऐ यीशु मौरै औन्दै मांझ़िया कु ज़िउंदौ किऔ आ, तुमु दी बौसौ औन्दी आ। ता ज़ुणिऐ मसीह मौरै औन्दै मांझ़िऐ कु ज़िउंदौ किऔ, सेऊ तुमारै नाश हुणै वाल़ै शरीरा लै भी आपणी आत्मा रै ज़ौरिऐ ज़ो तुमु दी बौसी औन्दी आ, ज़िउंदौ कौरा सा।

¹² एथीलै ओ साथी विश्वासी भाईओ, आमै शरीरा रै करज़दार नाईं, कि शरीरा रै मुताबिक आमै दीन काटी।

¹³ कैलैकि अगर तुमै पापी च़ाल-च़लणा रै ज़िणै दीन काटा लै, ता परमेश्‍वरा कु दूर हुणै ई, अगर पवित्र आत्मा री शक्ति कौरी पापी च़ाल-च़लण नाश कौरालै ता तुमै ज़िउंदै रौआ लै।

¹⁴ एथीलै कि ज़ेती लोग परमेश्‍वरा री आत्मा रै मुताबिक ज़िन्दगी ज़िवा ई, सै ई परमेश्‍वरा रै लोल़डै ई।

¹⁵ कैलैकि तुमुलै गुलामी री आत्मा नाईं मिली कि ज़ेथकु कि तुमै डौरदै लागा, पर पवित्र आत्मा आमु परमेश्‍वरा रै लोल़डै चाणा आ, ज़ासलै आमै, “ओ पापा, ओ बाब,” बोलीयौ औटाई।

¹⁶ पवित्र आत्मा आपु आमारी आत्मा आइलै गवाही दिआ सा, कि आमै परमेश्‍वरा रै लोल़डै ई।

¹⁷ और अगर लोल़डै ई, ता वारीस भी, पर परमेश्‍वरा रै वारीस और मसीह रै साथाई वारीस ई, ज़ैबै कि आमै तेस आइलै दुःख उठाई कि तेस आइलै महिमा भी पाई।

आशणै वाल़ै बौगता दी पौगड़ी हुणै वाल़ी महिमा

¹⁸ मुकै पाकौ पौतौ आ, कि एस बौगता रै दुःख और क्लेश परमेश्‍वरा री तिऐं महिमा रै नज़दीक, ज़ो आमु माथै पौगड़ी हुणै वाल़ी आ, कुछ़ भी नाईं।

¹⁹ कैलैकि सारी धौतरी रै लोग बौड़ी आश लाइयौ परमेश्‍वरा रै लोल़डै पौगड़ै हुणा लै ई ज़ागदै लागै औन्दै।

²⁰ कैलैकि परमेश्‍वरा रै ज़ौरिऐ चाणी ऐन्दी हर च़िज़ै आपणी किम्मत गंवाई गोई, इणौ नाईं आ, कि सै आपु कु इणौ च़ाहा थै पर परमेश्‍वरै इणै हुणा लै कियौ आ, तैबै भी एक आश आ

²¹ कि धौतरी भी आपु ई नाशा री गुलामी कु छ़ुटकारौ पाइयौ, परमेश्‍वरा री सन्तानु री और महिमा री आज़ादी हासिल कौरा।

²² कैलैकि आमै ज़ाणी ई, कि सारी धौतरी इबी झ़ांऊ ज़ेबी ओउलै आदमै पाप कियौ आ, मिलियौ ज़ोरै लेरा और दुखा दी पौड़ी औन्दी तौड़फा आ।

²³ सिरफ सृष्टी नाईं पर आमै भी ज़ासकै आत्मा रौ पैहलौ फल़ आ, आपु ई भितरा तौल़ै लेरी ई। पर आबै आमै ज़ागी कि परमेश्‍वर आमु आपणै लोल़डै चाणा, मतलब आमारै शरीरा लै तिऊं बुरै कामा कु छ़ुटकारौ दिया।

²⁴ उम्मीदा रै ज़ौरिऐ ता आमुलै छ़ुटकारौ मिलौ आ, पर ज़ेज़ी च़िज़ा री उम्मीद छ़ाड़ी ई ज़ैबै सै दिशाली तैबै सै आश कियै रौई? कैलैकि ज़ेज़ी च़ीज़ कोई देखदै आ लागौ औन्दौ तेसरी आश का कौरा सा?

²⁵ पर ज़ेज़ी च़ीज़ आमै नाईं देखदै, अगर तेसरी आश छ़ाड़ी ई, ता धीरजा कौरीयौ तेसरी बाट भी लोड़ी ई।

²⁶ इणै कौरी पवित्र आत्मा भी आमारी विश्वासा री कमज़ोरी दी मज़द कौरा आ, कैलैकि आमै नाईं ज़ाणदै, कि प्राथना किणै कौरी च़ांई कौरणी, पर पवित्र आत्मा आपु ई इणी डीईकरी-डीईकरीयौ ज़ो आमारी सौमझ़ी कु भी बाइरै आमुलै औरज़ कौरा आ।

²⁷ और मन परखुणै वाल़ौ परमेश्‍वर, पवित्र आत्मा रौ इरादौ ज़ाणा आ। कैलैकि सै परमेश्‍वरा रै पवित्र लोगु लै तेसरी री इच़्छ़ा रै मुताबिक औरज़ कौरा आ।

²⁸ और आमै ज़ाणी ई, कि ज़ेज़ै लोग परमेश्‍वरा आइलै प्यार कौरा ई, तिउंलै सारी बुशै मिलियौ भौलाई पैदी कौरा ई। यानी के तिउंलै ज़ो तेसरी इच़्छ़ा रै मुताबिक ई च़ुनै औन्दै।

²⁹ कैलैकि ज़ेज़ै तिणीऐ पैहलै कु च़ुनी गौऐ ई तिउंरै बारै दी इणौ इरादौ भी कौरी ऐरौ आ कि सै तेसरै छ़ोहरु यीशु ज़िणै हुआ ताकी यीशु विश्वासिऊ मांझ़िऐ ज़ेठौ बौणा।

³⁰ तैबै ज़ेज़ै परमेश्‍वरै पैहलै कु च़ुनै ई, सै औटाऐ भी, ज़ेज़ै तिणीऐ औटाऐ ई सै धौर्मी भी चाणै, और ज़ेज़ै धौर्मी चाणै ई तिउंलै महिमा भी देई।

परमेश्‍वरा रौ प्यार

³¹ इऊं सारी बुशै ध्याना दी छ़ाड़ियौ आमै एज़ै नौतिज़ै दी पौउंच़े ई, कि अगर परमेश्‍वर आमु भिलै आ, ता आमारौ बिरोधी कुण हुई सौका आ?

³² परमेश्‍वरै आपणौ एकलौतौ छ़ोहरु भी नाईं छ़ाड़ौ, पर आमु माथै बौड़ी दया कौरीयौ सेऊ भी आमु सौभी लै दैऔ। ता एती दैणै बासिऐ सेऊ आमुलै आपणै छ़ोहरु आइलै सारौ कुछ़ कैलै नाईं दैंदौ?

³³ परमेश्‍वरा रै च़ुनै औन्देऊ माथै आरोप कुण लाई बौल़ा आ? परमेश्‍वरै सेऊ आ ज़ो तिऊं धौर्मी चाणनै वाल़ौ आ।

³⁴ आमु माथै आरोप कुण लाई सौका आ? नाईं, कोई भी नाईं। कैलैकि सेऊ यीशु मसीह आ ज़ुणिऐ आपणी ज़िन्दगी आमुलै देई गोई, और मौरै औन्देऊ मांझ़िया कु ज़िउंदौ भी हुऔ, और परमेश्‍वरा री सुल़टी भिलै आ, और आमुलै औरज़ भी कौरा आ।

³⁵ आमु कुण मसीह रै प्यारा कु अलग कौरा सा? का दु:ख या मुसीबत, या झ़ौगड़ै या काल़, या नंगाई, या खौतरौ, या तलवार?

³⁶ ज़िणौ पवित्रशास्त्रा दी आ लिखौ औन्दौ, “कि ताउंलै आमै दीन भर मौउता खौतरै दी रौई, आमु झ़ांगणै वाल़ी भेरी ज़िणी गिणा ई।”

³⁷ पर इऊं सौभी बुशु दी आमै तेसरै ज़ौरिऐ ज़ुणिऐ आमुकु प्यार कियौ आ, आमुकै उम्मीदा कु भी बौड़ियौ ज़ीत आ।

^38-39 कैलैकि हाऊं पाकौ ज़ाणाऊ, आमु परमेश्‍वरा रै प्यारा कु, ज़ो आमारै प्रभु यीशु मसीह दी आ, कोई भी अलग नाईं कौरी बौल़दौ। ना मौत, ना ज़िन्दगी, ना सौरगदूत, ना बुरी आत्माऐं, ना आज़-कालकौ, ना आशणै वाल़ौ, ना तागत, ना उंच़ाई, ना गहराई और ना कोई धौतरी।