रोमियो 5 - पहाड़ी महासुईपरमेश्वरा आइलै मेल-मिलाप 1 एथीलै आमै विश्वासा कौरी धौर्मी बौणै, कैलैकि ज़ो प्रभु यीशु मसीहै आमु आइलै कियौ आ तेसरै ज़ौरिऐ आमारौ परमेश्वरा आइलै शान्ति वाल़ौ रिश्तौ आ। 2 कैलैकि आमारै विश्वासा री वज़ाह कु तिऐं बौड़ी दया झ़ांऊ, ज़ासदी आमै बौणी ई, आमारी पौउंच़ भी हुई, और परमेश्वरा री महिमा और आशा दी खुशी मौनाई ई। 3 सिरफ एऊ ऊ नाईं, पर आमै दुखा दी भी खुशी मौनाई, इणै ज़ाणियौ की दुखा कु सौबर, 4 और सौबरा कु आच़्छ़ौ च़ाल-च़लण और आच़्छ़ै च़ाल-च़लणा कु भरोसौ पैदौ हुआ सा। 5 और भरोसै कु शौरम नाईं औन्दी, कैलैकि पवित्र आत्मा ज़ो परमेश्वरै आमुकै दैऔ औन्दौ आ तेथरै ज़ौरिऐ परमेश्वरा रौ प्यार आमारै ज़िवा दी पाऔ औन्दौ आ। 6 कैलैकि ज़ेबी आमै कमज़ोर ई थै, तैबै यीशु मसीह सेज़ै बौगता दी ज़ो लोग पापी थै तिउंरी ताईं मौरौ। 7 पर शायद ई कुण धौर्मी आदमी लै मौरा, इणौ ता मुश्कल़ आ, पर हुई सौका आ कि कुण आपणी मौरज़ी कौरी भौलै आदमी लै मौरा। 8 पर परमेश्वर आमु माथै आपणै प्यारा री भौलाई इणै कौरी पौगड़ी कौरा आ, कि ज़ेबी आमै पापी ई थै तेबी मसीह आमुलै मौरौ। 9 एथीलै ज़ैबै कि आमै, आबै तेसरै लोऊ री वज़ाह कु धौर्मी बौणै, ता तेसरै ज़ौरिऐ परमेश्वरा रै रोशा कु कैलै नाईं बौच़िलै? 10 कैलैकि ज़ेबी आमै परमेश्वरा रै दुश्मन हुणै री हालता दी थै ता तेसरै छ़ोहरु मौरणै रै ज़ौरिऐ आमारौ मेल-ज़ोल परमेश्वरा आइलै हुऔ तैबै मेल-ज़ोल हुइयौ तेसरी ज़िन्दगी री वज़ाह कु आमै छ़ुटकारौ कैलै ना पाइलै? 11 और सिरफ इणौ ई नाईं, पर आबै ता आमारै प्रभु यीशु मसीह रै ज़ौरिऐ परमेश्वरा आइलै आमारौ मेल-ज़ोल हुई गौ आ, एथीलै आमै परमेश्वरा दी खुश ई। आदमा रै ज़ौरिऐ मौत-मसीहा रै ज़ौरिऐ ज़िन्दगी 12 एथीलै ज़िणौ एकी आदमी रै ज़ौरिऐ पाप धौतरी दी आशौ, आदम ई सेज़ौ पैहलौ आदमी आ ज़ो परमेश्वरै चाणौ आ और आदमा रै पाप कौरणै रै ज़ौरिऐ मौत आशी, और इणै कौरी मौत सारै लोगु माथै आशी, एथीलै कि सौभीऐ पाप कियौ। 13 परमेश्वरै मुसा कै नियम दैणै कु पैहलै पाप धौतरी माथै थौ, पर ज़िऐ नियम नाईं, तिऐ पाप नाईं गिणीदौ। 14 तैबै भी आदमा कु मुसा झ़ांऊ लोगुऐ पाप कियौ और सै सारै मौरी गौऐ ज़ुणिऐ आदमा ज़िणौ हुकम नाईं मानियौ पाप नाईं कियौ। आदम मसीह रौ निशाण आ ज़ुण आशणै वाल़ौ थौ। 15 पर आदमा रै पाप और परमेश्वरा री बौड़ी दया दी भौरी फर्क आ, कैलैकि ज़ेबी एकी आदमी रै पापा री वज़ाह कु भौरी लोग मौरै, तिणी ई परमेश्वरा री बौड़ी दया और धार्मिकता रौ दाण ज़ो तिणीऐ आमुकै यीशु मसीह रै ज़ौरिऐ दैऔ आ भौरी सारै लोगु रै पाप माफ कौरना लै भौरी बौड़ौ दाण आ। 16 परमेश्वरा रौ दैऔ औन्दौ दाण आदमा रै पापा ज़िणौ नाईं आ। कैलैकि एकी गुनाह कौरी मौउता री सौज़ा आशी, पर च़ाऊ आमुऐ भौरी पाप किऐ ई, तैबै भी परमेश्वरै एक ई दाण देइयौ आमारै पाप माफ किऐ और आमै धौर्मी चाणै। 17 कैलैकि ज़ेबी एकी आदमी रै गुनाह री वज़ाह मौउतै सारै लोगु माथै राज़ कियौ, ता ज़ो लोग बौड़ी दया और धौर्मा रै ज़िणै वरदान भौरी का पा ई सै एक आदमी रै, मतलब कि यीशु मसीह रै ज़ौरिऐ पाकौ ई सौदा ज़िन्दगी दी राज़ कौरा ई। 18 एथीलै ज़िणौ एक गुनाह सौभी लोगु लै मौउता री सौज़ा री वज़ाह बौणी, तिणौ ई एक धार्मिकता रौ काम भी सौभी लोगु लै सौदा री ज़िन्दगी दैणा लै धौर्मी चाणनै री वज़ाह बौणौ। 19 कैलैकि ज़िणौ एकी आदमी रै हुकम ना मानणै कु भौरी लोग पापी बौणै, तिणी ई एक आदमी रै हुकम मानणै कु भौरी लोग धौर्मी बौणनै ई। 20 बासिऐ मुसा रै नियम देई ताकी लोग इणौ सौमझ़ी बौल़ा कि सै केती पापी ई। पर ज़िऐ पाप भौरी हुऔ, तिऐ बौड़ी दया तेसकु भी भौरी ज़ादौ हुऔ। 21 कि ज़िणौ पापै मौत फैलाइऔ सारै लोगु माथै राज़ कियौ, तिणौ ई आमारै प्रभु यीशु मसीह रै ज़ौरिऐ परमेश्वरा री बौड़ी दया भी सौदा री ज़िन्दगी लै धौर्मी चाणीऔ राज़ कौरा आ। |
This work is licensed under Creative Commons Attribution-ShareAlike 4.0 License.