रोमियो 4 - पहाड़ी महासुईअब्राहमा रौ औनैणौ 1 आबै आमै यहुदी हुणै री वज़ाह कु आपणै बुज़ुर्ग अब्राहमा रै बारै दी का बोलु लै? कि केथरी वज़ाह कु सेऊ धौर्मी बौणौ? 2 कैलैकि अगर अब्राहम आच़्छ़ै कामा कौरी धौर्मी बौणा थौ, तैबै तेसकै घमण्ड कौरणै री वज़ाह हुआ थी, पर सेऊ परमेश्वरा काऐ आपणै आच़्छ़ै कामा रौ घमण्ड नाईं कौरी सौकदौ। 3 पवित्रशास्त्र का बोला सा? इणौ कि, “अब्राहमै परमेश्वरा माथै विश्वास किऔ, और सेऊ परमेश्वरा री नौज़री धौर्मी बौणौ।” 4 कामा कौरणै वाल़ै री मज़दुरी दैणी दाण नाईं, पर हक्क सौमझ़िया सा। 5 ज़ुण परमेश्वरा रै गुण पाइणा लै काम नाईं कौरदौ पर बुरै लोगु धौर्मी चाणनै वाल़ै माथै विश्वास कौरा आ तेसरौ विश्वास तेसलै धार्मिकता बौणा सा। 6 ज़ास परमेश्वर बिणा कामै धौर्मी चाणा सा, तेसलै दाऊद भी भौलौ बोला सा। 7 “भौलै ई सै, ज़ासरै बुरै काम परमेश्वरै माफ किऐ, और ज़ासरै पाप तिणीऐ पोरु बिसरी गौऐ। 8 भौलै ई सै आदमी ज़ासरै पापा रौ लेखौ परमेश्वर नाईं नियां लौ।” 9 ता एऊ भौलौ वचन, का खतना वाल़ेऊ लै ई, या बिण खतना वाल़ेऊ लै भी? आमै तिणौ थाकी बोलदै लागी ज़िणौ पवित्रशास्त्रा दी आ लिखौ औन्दौ, “अब्राहमै परमेश्वरा माथै विश्वास किऔ, और सेऊ परमेश्वरा री नौज़री धौर्मी बौणौ।” 10 तैबै एऊ केबी हुऔ आ? खतनै री हालता दी या बिणा खतनै री हालता दी? खतनै री हालता दी नाईं पर बिणा खतनै री हालता दी। 11 बिण खतनै रै बौगतै अब्राहमा विश्वासा रै ज़ौरिऐ ज़ो धौर्मी बौणौ, तेस माथै छ़ाप ज़िणी खतनै रौ निशाण लाऔ। इणै कौरीऐ सेऊ तिऊं सारेऊ रौ भी बाब बौणौ, ज़ेथ कौरी तेसरौ भी विश्वास तेसलै धौर्मी गिणीया। 12 और अब्राहम खतना किऐ औन्देऊ रौ भी बाब बौणौ, ज़ो ना सिरफ खतना माथै आश छ़ाड़ाई, पर आमारै बाब अब्राहमा रै तेस विश्वासा री लीया दी च़ाला ई, ज़ो तेसकै खतनै कु पैहलै हासिल थौ। विश्वासा रै ज़ौरिऐ वायदौ मिलणौ 13 परमेश्वरै अब्राहम और तेसरै वंशा कु वायदौ कियौ कि सै धौतरी रै हक्कदार हुणै ई एऊ एथलै नाईं हुऔ कि अब्राहमै नियमा रौ पालन कियौ आ पर एथीलै कि तिणीऐ विश्वास कियौ और सेऊ परमेश्वरा री नौज़री दी धौर्मी बौणौ। 14 कैलैकि अगर नियम मानणै वाल़ै ई हक्कदार ई, ता विश्वास बेकार और वायदौ बेअसर साबित हुऐ। 15 कैलैकि नियमा रौ नौतिज़ौ ता परमेश्वरा रौ रोश आ, पर ज़िऐ नियम नाईं तिऐ नियम चोड़णै रौ सवाल पैदौ नाईं हुन्दौ। 16 एथीलै वायदौ विश्वासा रै ज़ौरिऐ हासिल हुआ। एऊ मुफ्तिऐ दैऔ औन्दौ दाण आ। अगर आमुकै अब्राहमा ज़िणौ विश्वास आ, तैबै च़ाऊ आमै मुसा रै नियमा ज़िणै ज़िउलै या नाईं ज़िउलै, तैबै भी आमै एस ज़ुरुर हासिल कौरी सौकी। कैलैकि अब्राहम तिऊं सारै विश्वास कौरणै वाल़ेऊ रौ बाब आ, 17 ज़िणौ पवित्रशास्त्रा दी आ लिखौ औन्दौ, “कि मुंइऐ तू भौरी ज़ातीऊ रौ बाब चाणौ ई,” परमेश्वरा री नौज़रीऐ अब्राहम आमारौ बाब आ तिंउऐ परमेश्वरा माथै विश्वास किऔ आ ज़ुण मौरै औन्देऊ ज़िउंदौ कौरा सा, और ज़ेज़ी बुशै आसती ई नाईं, तिऊंरौ नाऊं इणौ निआं आ, कि मानौ कि सै आसती ई। 18 तिणीऐ निराशा दी भी आश छ़ाड़ियौ विश्वास किऔ, एथीलै कि तेस वचना रै मुताबिक कि, “तैरौ वंश इणौ औलौ,” सेऊ भौरी ज़ातीऊ रौ बाब हुआ। 19 सेऊ ज़ो शौ बौरशा रौ थौ, आपणै मौरै औन्दै ज़िणै शरीर और सारा रै गौरबा री मौरी औन्दी ज़िणी हालत ज़ाणीऔ भी विश्वासा दी कमज़ोर नाईं हुऔ। 20 और ना ता अविश्वासी हुइयौ परमेश्वरा रै वायदै माथै शक किऔ, पर विश्वासा दी पाकौ हुइयौ परमेश्वरा री महिमा की। 21 और पाकौ ज़ाणौ, कि ज़ेज़ी बुशा रौ परमेश्वरै वायदौ कियौ आ, परमेश्वरा कै तिऐं पुरी कौरणै री भी शक्ति आ। 22 तेसरै विश्वासा री वज़ाह कु, एऊ तेसलै धार्मिकता गौणुऔ। 23 और एऊ वचन, “कि विश्वास तेसलै धार्मिकता गौणुई गौ, ना सिरफ तेसी लै थौ लिखौ औन्दौ, 24 बल्कि आमु कालै भी।” अगर आमै परमेश्वरा माथै विश्वास कौरुलै, ज़ुणिऐ आमारौ प्रभु यीशु मौरै औन्दै मांझिया कु ज़िउंदौ किऔ ता आमै भी विश्वासा री वज़ाह कु धार्मिक मानिणै ई। 25 यीशु आमारै पापा री ताइंऐ पाकड़ुऔ, और आमु धौर्मी चाणना लै परमेश्वरै सेऊ ज़िउंदौ भी किऔ। |
This work is licensed under Creative Commons Attribution-ShareAlike 4.0 License.