रोमियो 3 - पहाड़ी महासुई1 तैबै तुमारै यहुदी हुणै रौ का फाइदौ और खतनै री का किम्मत आ? 2 ओ, एथरी भौरी किम्मत आ। सारेऊ कु ज़ादौ ज़ुरुरी इणौ कि यहुदिऊ कै मुसा और भविष्यवक्ता रै लिखै औन्दै सारै वचन ई सांबै औन्दै। 3 अगर कुछ़ यहुदी परमेश्वरा आइलै विश्वास वाल़ै नाईं ता का हुऔ? का तिउंरै विश्वास चोड़णै कु परमेश्वरा री सौच़्च़ाई नाश हुआ आ? 4 नाईं! केबी भी नाईं, पर परमेश्वर सौदा सौच़्च़ौ बोला आ और हर एक आदमी झुठौ बौणा, ज़िणौ पवित्रशास्त्र परमेश्वरा रै बारै दी बोला आ, “कि ज़ेथ कौरी तू आपणी बुशा दी धौर्मी बौणा और फैसलै कौरदी बारै तू ज़िता लौ।” 5 एथीलै अगर आमारै बुरै काम परमेश्वरा री धार्मिकता बौणा सा, ता आमै का बोली ई? का इणौ परमेश्वरा लै गलत आ कि सेऊ रोशीआ और आमुलै सौज़ा दिया? (एस ता हाऊं आदमी री रीती माथै बोलाऊ) 6 नाईं, केबी भी नाईं। अगर परमेश्वर यहुदिऊ रौ फैसलै कौरना लै ठीक नाईं, ता सेऊ धौतरी रै लोगु रौ फैसलौ किणौ कौरा सा? 7 पर परमेश्वर किणौ मैरौ एक पापी ज़िणी बदनामी और फैसलौ कौरी सौका आ अगर मेरी बेइमानी कु तेसरी सौच़्च़ाई च़ौमका और तेसलै औज़ौ भी महिमा दिया? 8 तैबै कैलै ना बोलु लै, “च़ालौ! आमै बुरै काम कौरी ज़ेथकु भौलाई पौगड़ी हुआ?” ज़िणौ कुछ़ लोग आमारी बदनामी कौरीयौ आमु माथै आरोप लाआ ई, और कुछ़ लोग बोलाई, कि आमुकै इणी शिखावा ई। इणै लोग सौज़ा रै हक्कदार हुआई। कोई भी धौर्मी नाईं 9 तैबै आमै का बोलु लै? का आमै यहुदी दुजेऊ कु आच़्छ़ै ई? नाईं! केबी भी नाईं। कैलैकि आमुऐ यहुदिऊ और दुजी ज़ातीऊ माथै एऊ आरोप लाई ऐरौ आ कि सै सारै पापा रै वशा दी ई। 10 ज़िणौ पवित्रशास्त्रा दी आ लिखौ औन्दौ, “परमेश्वरा री नौज़री दी कोई भी धौर्मी नाईं, एक भी नाईं। 11 कोई भी इणौ नाईं आसतौ ज़ुण इणौ सौमझ़ा कि ठीक का सा, कोई भी परमेश्वर लोड़णै वाल़ौ नाईं। 12 सारै परमेश्वरा कु दूर डेई गौऐ ई, सारै परमेश्वरा लै बेकार बौणी गौऐ, कोई भौलाई कौरणै वाल़ौ नाईं, एक भी नाईं। 13 तिउंरी बुशै खुली ऐन्दी कब्रा कु आशणै वाल़ै बासा ज़िणी ई तिउंरी ज़ीभ झ़ुठा कौरी भौरुई औन्दी तिंउरै ओठा कु सापा रौ बीश च़ुड़ा आ। 14 और तिउंरी बोली श्राप और कौड़ुवै कौरी भौरुई औन्दी। 15 सै दुजेऊ पिटणा लै और झ़ांगणा लै भौरी तेज़ ई। 16 ज़िऐ भी सै डियाई तिऐ बुराई और दु:ख आणाई। 17 तिउंकै इणौ पौतौ नाईं आ कि शान्ति दी किणै ज़िवा ई। 18 तिंउदी परमेश्वरा रौ डौर आसतौ नाईं।” 19 आमै ज़ाणी ई, कि नियम ज़ो कुछ़ बोला सा तिऊंकु बोला आ, ज़ो नियमा रै वशा दी, एथीलै कि हर एकी आदमी बाहनै चाणनै कु रोका, और धौतरी रै सारै लोग परमेश्वरा काऐ आरोपी ई। 20 कैलैकि नियम मानणै रै ज़ौरिऐ कोई आदमी परमेश्वरा काऐ धौर्मी नाईं बौणदौ, एथीलै मुसा रै नियमा आमुकै देखावा कि आमै पापी ई। विश्वासा कौरी धार्मिकता 21 पर आबै हालात इणै ई कि बिण नियमा रै परमेश्वरा री धार्मिकता पौगड़ी हुई गोई ज़ेथरै बारै दी पवित्रशास्त्र और भविष्यवक्ता बोला थै। 22 मतलब परमेश्वरा री इऐ धार्मिकता, ज़ो यीशु मसीह माथै विश्वास कौरणै दी सारै विश्वास कौरणै वाल़ेऊ लै आ। कैलैकि सारै लोग एक बराबर ई। 23 एथीलै कि सारेउऐ पाप कियौ और परमेश्वरा री महिमा कु दूर ई। 24 पर परमेश्वरा री बौड़ी दया कौरी तेस छ़ुटकारै रै ज़ौरिऐ ज़ो यीशु मसीह दी आ, सारै मुफ्तिऐ धौर्मी चाणा ई। 25-26 परमेश्वरै यीशु मसीह आमारी ताइंऐ बौल़ी च़ौड़णा लै भेज़ौ। यीशु मसीहीऐ आपणी ज़िन्दगी री बौल़ी एथीलै देई ताकी तेस माथै विश्वास कौरीयौ आमै परमेश्वरा काऐ आशी बौल़ु। और भौरी पैहलै परमेश्वरै इणै देखाउणा लै कियौ कि सेऊ सौबर छ़ाड़णै दी और पापीऊ माफ कौरना लै ठीक थौ। एथ कौरी इणौ भी पौतौ लागा की परमेश्वर ठीक आ ज़ेबी सेऊ तिऊं लोगु अपणावा ज़ुण यीशु माथै विश्वास कौरा ई। 27 ता घमण्ड कौरणौ किऐ रौऔ? तेसरी ता ज़ागाह नाईं, केज़ै काइदै-कानूना री वज़ाह का कु? का नियमा मानियौ? नाईं, यानी की यीशु माथै विश्वासा री वज़ाह कु। 28 एथीलै आमै एज़ै नतीज़ै माथै पहुंच़ी ई, कि आदमी बिण नियमा, विश्वासा रै ज़ौरिऐ धौर्मी बौणा सा। 29 का परमेश्वर सिरफ यहुदिऊ रौ ई आ? का दुजी ज़ातीऊ रौ नाईं आ? ओ, दुजी ज़ाती रौ भी आसती आ। 30 कैलैकि एक ई परमेश्वर आ, ज़ो खतना वाल़ेऊ विश्वासा दी और बिणा खतना वाल़ेऊ भी विश्वास रै ज़ौरिऐ धौर्मी चाणा सा। 31 ता का आमै नियम विश्वासा रै ज़ौरिऐ बेकार चाणी सी? नाईं! केबी भी नाईं, पर नियमा री किम्मत सौमझ़ी ई। |
This work is licensed under Creative Commons Attribution-ShareAlike 4.0 License.