रोमियो 2 - पहाड़ी महासुईपरमेश्वरा रौ फैसलौ 1 तुमै सुंच़ाई कि तुमै दुजेऊ माथै आरोप लाई सौका ई पर तुमुकै, ज़ुण ओरीऊ माथै आरोप लाआ ई, एज़ी बुशा लै कोई बाहनौ नाईं आ। कैलैकि ज़ेज़ी बुशा दी तू दुजै माथै आरोप ला ई, सेज़ी बुशा दी आपुलै भी आरोपी बौणा ई, एथीलै कि तू ज़ो आरोप ला ई, आपु सेज़ौ काम कौरा ई। 2 आमै ज़ाणी सी कि, इणै-इणै काम कौरणै वाल़ेऊ लै परमेश्वरा री तौरफा कु ठीक-ठीक सौज़ा मिला सा। 3 और ओ आदमी, तू ज़ो इणै-इणै काम कौरणै वाल़ेऊ माथै आरोप लाआ ई, और आपु ई तेस काम कौरा ई ज़ेथरौ तू दुजै माथै आरोप ला ई। का इणौ सौमझ़ाई, कि तू परमेश्वरा री सौज़ा कु पोरु बौच़ाई? 4 का तू परमेश्वरा री भौलाई, और सहन कौरणै वाल़ी तागत, और सौबरा रौ धन बेकार नाईं ज़ाणदौ? और का तू नाईं सौमझ़दौ, कि परमेश्वरा री दया ताऊंल़ै मन बौदुल़णौ शिखावा सा? 5 कैलैकि तू ढीठ ई और पापा कु मन बदुल़णौ नाईं च़ांहादौ, तू आपुलै भौरी कठिण सौज़ा कौमाउंदै ई लागौ औन्दौ। पर भौरी रोशा रौ एक दीन आशणै वाल़ौ आ, ज़ेबी परमेश्वरा रौ सौच़्च़ौ फैसलौ पौगड़ौ हुणौ आ। 6 परमेश्वर हर एकी-एकी लै तेसरै कामा रै मुताबिक इनाम दिआ सा। 7 ज़ो आच़्छ़ै कामा दी पाक्कै रौइयौ महिमा, और इज़्ज़त, और सौदा री ज़िन्दगी री खोज़ा दी आ, तिउंलै परमेश्वर सौदा रौ ज़िन्दगी दिआ। 8 पर ज़ो मतलबी ई, और सौच़्च़ाई नाईं मानदै, पर सै बुरै काम कौरणै च़ाहा ई, तिऊं माथै परमेश्वर भौरी रोश और रोश पौगड़ौ कौरा सा। 9 दु:ख और संकट हर आदमी माथै ज़ो बुरौ कौरा सा, आशा लौ, पैहलै यहुदी लोगु माथै तैबै ओरीऊ माथै ज़ुण यहुदी नाईं। 10 पर महिमा, इज़्ज़त और शान्ति हर एकी लै मिला ली, ज़ो भौलौ कौरा सा, पैहलै यहुदी लोगु माथै तैबै ओरीऊ माथै ज़ुण यहुदी नाईं। 11 कैलैकि परमेश्वर सौभी आइलै एक ज़िणौ बर्ताव कौरा सा। 12 एथीलै की ज़ुणिऐ मुसा रै नियमा बिण पाइयौ पाप कियौ, ता सै बिणा नियमा कौरी परमेश्वरा कु सौज़ा पा आ लै, और यहुदिउऐ ज़ुणिऐ मुसा रै नियम पाइयौ पाप कियौ, तिउंरी सौज़ा नियमा रै ज़ौरिऐ हुआ। 13 कैलैकि परमेश्वरा रै काऐ नियम शुणनै वाल़ै धौर्मी नाईं, पर नियमा माथै च़ालणै वाल़ौ धौर्मी बौणा ई। 14 तैबै ज़ेबी दुजी ज़ाती रै लोग ज़ासकै नियम नाईं आसतै, पर स्वभाव कौरी नियमा री बुशा माथै च़ाला ई, तैबै मुसा रै नियम तिऊं कै नाईं हुइयौ भी सै इणौ साबित कौरा ई कि तिउंकै ज़िवा दी नियम ई। 15 सै परमेश्वरा रै नियमा री बुशै आपणै-आपणै ज़िवा दी लिखी औन्दी देखाल़ाई और तिउंरै मन भी गवाही दिआ, और तिउंरै बिच़ार आपु मांझ़िऐ आरोप ला ई, या तिऊं बिण गौलती वाल़ै चाणा ई। 16 इयौ सब कुछ़ तेबी साफ हुणौ आ ज़ेबी परमेश्वर मुं कौरी शुणाई औन्दी खुशी री खौबरी रै मुताबिक यीशु मसीह रै ज़ौरिऐ आदमी री छ़ुपी ऐन्दी बुशु रौ फैसलौ कौरा सा। यहुदी और कानून 17 आपणै बारै दी सुंच़ौ तुमै ज़ुण आपुलै यहुदी बोलाई, और नियमा माथै भरोसौ छ़ाड़ाई, और घमण्ड कौरा ई कि तू परमेश्वरा रौ खास आदमी ई। 18 तुमै परमेश्वरा री मौरज़ी ज़ाणाई और नियमा री शिक्षा शिखीयौ आच़्छ़ी बुशै ज़ाणाई। 19 तुमुकै भरोसौ आ कि, “हाऊं शेड़ेऊ कै बाट देखाउणै वाल़ौ, और न्यारी दी भौटकै औन्देऊ रौ प्याशौ ऊ, 20 और हाऊं ज़ासकै औकल नाईं तिउंकै शिखाउणै वाल़ौ, और लोल़डेऊ लै शिक्षा दैणै वाल़ौ ऊ।” तुमै पुरौ भरोसौ कौरा ई कि मुसा रौ नियम पुरौ ज्ञान, और सौच़्च़ाई दिया आ। 21 पर तू ज़ो ओरी कै शिखावा ई, आपुकै नाईं शिखाउंदौ। तू ज़ो च़ोरी ना कौरणै री शिक्षा दिआई, आपु ई च़ोरी कौरा ई। 22 तू ज़ो बोलाई, गांदौ काम नाईं कौरणौ, ता आपु ई गांदौ काम कैलै कौरा ई? तू ज़ो मूर्ती कु नफरत कौरा ई, ता तू आपु ई मन्दिर कैलै लुटा ई? 23 तू ज़ो मुसा रै नियमा रै बारै दी घमण्ड कौरा ई, का नियम नाईं मानियौ, परमेश्वरा री बेइज़्ज़ती कौरा ई? 24 एथीलै ज़िणौ कि पवित्रशास्त्रा दी आ लिखौ औन्दौ कि, “तुमु यहुदिऊ री वज़ाह कु, दुजै लोग ज़ुण यहुदी नाईं ई, परमेश्वरा रै बारै दी बुरी बुशै बोलाई।” 25 अगर तू नियमा माथै च़ाला लौ ता, तैबै खतना कौरी फाइदौ ता आसा, पर अगर तू नियम नाईं माना लौ ता, तैबै तैरौ खतना बिणा खतना ज़िणौ हुई गौ। 26 एथीलै अगर बिणा खतना वाल़ौ आदमी नियम मानदै थाका लौ लागी, तैबै परमेश्वर इणै लोगु तिणी नौज़रीऐ देखा आ ज़िणै खतना किऐ औन्देऊ देखा आ। 27 और ज़ेज़ौ आदमी शरीरा रै रुपा दी बिणा खतना वाल़ौ रौआ, और नियम माना आ, सेऊ तुमु आरोपी चाणा आ ज़ुण तुमै खतना किऐ औन्दै ई और मुसा रै लिखै औन्दै नियम तुमुकै ई पर नियम मानदै नाईं। 28 कैलैकि इणौ नाईं आ कि तू ज़ौनमा कु यहुदी ई, पर पौगड़ै रुपा दी यहुदी दिशा ई। और नाईं सेऊ खतना सा, ज़ो पौगड़ौ आ, और शरीरा दी आ। 29 पर सौच़्च़ौ यहुदी सेऊ आ, ज़ासरौ ज़िऊ परमेश्वरा आइलै ठीक आ। और सौच़्च़ौ खतना सिरफ मुसा रै नियम मानणै कु नाईं पर परमेश्वरा री आत्मा रै कामा रै ज़ौरिऐ ज़िवा रौ बदुल़णौ आ। इणै लोगु री बौड़ाई लोगु कौरी नाईं पर परमेश्वरा री तौरफा कु हुआ सा। |
This work is licensed under Creative Commons Attribution-ShareAlike 4.0 License.