रोमियो 16 - पहाड़ी महासुईव्यक्तिगत ढाल 1 हाऊं च़ाहा ऊ कि तुमै फीबे री इज़्ज़त कौरा, ज़ुण साथी विश्वासी बौइण और किंख्रिया शैहरा री कलिसिया री दासी आ। 2 और तुमु विश्वासी लोगु लै च़ांई, कि प्रभु दी तिंयारौ स्वागत कौरा। और ज़ेज़ी-केज़ी बुशा दी तिंया कै तुमारी ज़रूरत औली, तिंयारी मज़द कौरौ। कैलैकि तिंआऐ भी भौरीऊ री मतलब की मेरी भी मज़द की आ। 3 प्रिसका बौइण और भाई अक्विला ज़ो यीशु मसीह दी मुं आइलै काम कौरणै वाल़ै ई, तिउंलै मेरी ढाल आ। 4 तिंउऐ मेरी ताइंऐ आपणी ज़िन्दगी खौतरै दी पाई थी और सिरफ हाऊं नाईं, पर दुजी ज़ातीऊ री सारी कलिसिया भी तिऊंरौ धन्यबाद कौरा ई। 5 तिंया कलिसिया लै भी ढाल, ज़ो तिंउरै घौरा दी कौट्ठै हुआई। मैरै प्यारै इपैनितुसा लै ज़ुण मसीह लै आसिया परदेशा रौ पैहलौ विश्वासी आ, ढाल। 6 मरियमा लै ज़ुणिऐ तुमुलै भौरी मैहनत की आ, ढाल। 7 भाई अन्द्रुनीकुस और बौइण युनियासा लै ज़ुण मेरी ज़ाती रै ई, और मुं आइलै कैदा ई थै, तिउंलै भी ढाल। इऐ प्रेरिता दी मशहूर ई, और मुं कु पैहलै मसीह रै च़ेलै बौणै थै,। 8 अम्पलियातुसा लै, ज़ुण प्रभु दी मैरौ प्यारौ आ, ढाल। 9 उरबानुसा लै भी, ज़ुण मसीह दी मुं आइलै काम कौरणै वाल़ौ आ, और आमारै प्यारै इस्तखुसा लै भी ढाल। 10 अपिल्लेसा लै भी ज़ासरौ विश्वास पौरखिणै बासिऐ भी मसीह दी लगातार बौड़दै रौ, ढाल। अरिस्तुबुलुसा रै टौबरा लै भी ढाल। 11 मैरै ज़ाती रै हेरोदियोन भाई लै ढाल। नरकिस्सुसा रै टौबरा लै ज़ुण मसीह माथै विश्वास कौरा ई, ढाल। 12 त्रुफैना और त्रुफौसा बौइणा लै ज़ुणिऐ प्रभु दी भौरी मैहनत की आ, ढाल। प्यारी पिरसिसा लै ज़ुणिऐ प्रभु दी भौरी मैहनत की आ, ढाल। 13 रूफुसा लै ज़ुण परमेश्वरै खास काम कौरना लै च़ुनौ आ, और तेसरी मां ज़ुण मेरी भी मां ज़िणी आ, दुइया लै ढाल। 14 असुंक्रितुस और फिलगोन और हिर्मेस और पत्रुबास और हिर्मेस और तिऊं रै साथा रै विश्वासी भाईऊ लै भी, ढाल। 15 फिलुलुगुस और युलिया और नेर्युस और तेसरी बौइण, और उलुम्पास और तिंउरै साथा रै विश्वासी लोगु लै ढाल। 16 आपु मांझ़िऐ प्यारा कौरी गौल़ै मिलियौ ढाल कौरौ। तुमुलै मसीहा री सारी कलिसिया रै सारै विश्वासियु री तौरफा कु ढाल। आखरी बूश 17 आबै ओ साथी विश्वासी भाईओ, हाऊं तुमु कु औरज़ कौराऊ, तुमै तिऊं लोगु कु खौबरदार रौऔ, ज़ुण तुमु मांझ़िऐ फूट पा ई और ओरी शिक्षा रै ज़ौरिऐ तुमारी शिक्षा री खिलाफ तुमु विश्वासा दी कमज़ोर कौरा ई। तिऊंकु दूर रौ। 18 कैलैकि इणै लोग आमारै प्रभु मसीह रै नाईं, पर सै आपणै फाइदै लै सेवा कौरा ई। इऐ लोग मिठी-मिठी बुशा कौरी सिधै-साधै लोगु बहकावा ई। 19 तुमारी हुकम मानणै री खौबर सारै लोगु मांझ़िऐ फौइली गोई आ, एथीलै हाऊं तुमारै बारै दी खुशी मौनावाउ। पर हाऊं इणौ च़ाहा ऊ, कि तुमै भलाईलै बुद्धी वाल़ै, पर बुराई लै भोल़ै बौणी रौ। 20 शान्ति रौ परमेश्वर शैतान शिगरी तुमारै बांगणै थालै नाश कौरावा सा। आमारै प्रभु यीशु मसीह री बौड़ी दया तुमु माथै औन्दै थाका लागी। 21 मुं आइलै काम कौरणै वाल़ौ तीमुथियुसा री, और मेरी ज़ाती रै लुकियुस और यासोन और सोसिपत्रुसा री तुमुलै ढाल। 22 मेरी चिट्ठी लिखणेवाल़ै तिरतियुसा रौ प्रभु दी तुमुलै ढाल। 23 गयुस ज़ुण मेरी और कलिसिया री मैहमानबाज़ी कौरणै वाल़ौ आ तेसरी तुमुलै, ढाल। इरास्तुस ज़ो इलाकै रौ भण्डारी आ, और भाई क्वारतुसा री, तुमुलै ढाल। 24 हाऊं प्राथना कौराऊ कि आमारै प्रभु यीशु मसीह री बौड़ी दया तुमु सारेऊ माथै औन्दै थाकाली लागी। परमेश्वरा री स्तुति 25 आबै तुमुकै मेरी खुशी री खौबर ज़ो यीशु मसीह रै बारै दी आ परचार कौरीयौ तुमु विश्वासा दी मज़बूत कौरी सौका आ, कैलैकि भौरी पैहलै ओउलै इऐ खुश-खौबरी तुमु कु च़ोरुई थाकी। 26 पर आबै पौगड़ै हुइयौ ज़ो पैहला कु आ तेस परमेश्वरा रै हुकमा कौरी भविष्यवक्तु री किताबी रै ज़ौरिऐ सारी ज़ातीऊ कै बोली गौ आ, कि सै विश्वासा कौरी हुकम मानणै वाल़ै हुआ। 27 तेसी री सिरफ एक ई औकलमंद परमेश्वरा री यीशु मसीह रै ज़ौरिऐ जुगै-जुगै महिमा औन्दै थाकाली लागी। आमीन। |
This work is licensed under Creative Commons Attribution-ShareAlike 4.0 License.