रोमियो 15 - पहाड़ी महासुईदुजेऊ री तरक्की कौरौ 1 ज़ुरुरी आ कि आमै ज़ुण विश्वासा दी मज़बूत ई, कमज़ोर लोगु री मज़द कौरु, ना कि सिरफ आपणौ ज़िऊ खुश कौरी। 2 आमु मांझ़िऐ कु हर एक आपणै साथी विश्वासी री भौलाई लै खुश कौरा, कि तेसरौ विश्वासा मज़बूत हुआ। 3 कैलैकि मसीहै आपणौ ज़िऊ खुश नाईं कियौ, पर ज़िणौ पवित्रशास्त्रा दी आ लिखौ औन्दौ कि, “तेरी बेइज़्ज़ती कौरणै वाल़ेउऐ मेरी बेइज़्ज़ती की आ।” 4 ज़ेती बुशै पैहलै कु पवित्रशास्त्रा दी लिखी ऐन्दी, सै आमुलै शिक्षा दैणा लै लिखी ई कि आमै सौबर और पवित्रशास्त्रा री शान्ति रै ज़ौरिऐ आश छ़ाड़ा। 5 हाऊं परमेश्वरा कु इणी प्राथना कौराऊ कि सेऊ तुमुलै सौबर, हौसलौ दिया, ताकी तुमै यीशु मसीह रै मुताबिक आपु मांझ़िऐ एक मन छ़ाड़ौ। 6 ज़िणै कौरी तुमै कौट्ठै मिलियौ एक आवाज़ा दी आमारै परमेश्वर, प्रभु यीशु मसीह रै बाब परमेश्वरा री बौड़ाई कौरौ। सौभीऊ लै खुशी री खौबर 7 एथीलै, तुमै एकी दुजै अपणाऔ ज़िणौ मसीह ऐ तुमै अपणाऐ ई। इणौ एथीलै कौरौ ताकी लोग परमेश्वरा री बौड़ाई कौरा। 8 हाऊं बोलाऊ कि मसीह यहुदिऊ रौ सेवक इणै देखाउणा लै बौणौ कि परमेश्वर आपणै वायदै पुरै कौरना लै सौच़्च़ौ आ, ज़ो तिउंरै स्याणेऊ आइलै थै कौरै औन्दै। 9 और दुजी ज़ाती रै लोग भी दया री वज़ाह कु परमेश्वरा री बौड़ाई कौरा। ज़िणौ पवित्रशास्त्रा दी आ लिखौ औन्दौ कि, “हाऊं दुज़ी ज़ाती रै लोगु मांझ़िऐ तैरौ धन्यबाद कौराऊ, और तैरै नावां रौ भजन गा ऊ।” 10 और तौंइऐ पवित्रशास्त्रा रै एकी ज़ागाह दी आ लिखौ औन्दौ, “ओ, दुज़ी ज़ाती रै सारै लोगुओ, तेसरी ज़ौण-पौरज़ा आइलै खुशी मनाऔ।” 11 और तौंइऐ पवित्रशास्त्रा रै एकी ज़ागाह दी आ लिखौ औन्दौ, “ओ, दुज़ी ज़ाती रै सारै लोगुओ, प्रभु री बौड़ाई कौरौ। ओ, राज़्य-राज़्य रै सारै लोगुओ। तेसरौ गुणगाण कौरौ।” 12 और तैबै यशायाह भविष्यवक्ता पवित्रशास्त्रा दी लिखा सा कि, “यिशै रौ एक वंश पौगड़ौ हुणौ आ, ज़ो दुजी ज़ातीऊ रै लोगु माथै राज़ कौरा आ, तेस माथै दुजी ज़ाती आश छ़ाड़ाई।” 13 हाऊं प्राथना कौराऊ कि परमेश्वर ज़ुण आशा रौ दाता सा, तुमु विश्वास कौरणै दी भौरी सारी खुशी और शान्ति कौरी भौरा, कि पवित्र आत्मा री शक्ति कौरी तुमारी आश बौड़दै थाका लागी। हिम्मत लिखणै रौ कारण 14 ओ मैरै साथी विश्वासिउओ, हाऊं आपु भी तुमारै बारै दी पाकौ ज़ाणाऊ, कि तुमै भी आपु ई भौलाई कौरी भौरीया और तुमै आच़्छ़ा कौरी ज़ाणा कि तुमुऐ का कौरणौ आ। और एकी दुजेऊ कै शिखाउंदै थाकौ लागी। 15 तैबै मुंइऐ किऐ-किऐ याद कौराउणा लै तुमुलै ज़ो बौड़ी दया कौरीयौ लिखौ, एऊ तिऐं बौड़ी दया री वज़ाह कु हुऔ, ज़ो परमेश्वरै मुकै देई आ। 16 ताकी हाऊं दुजी ज़ातीऊ लै यीशु मसीह रौ सेवक हुइयौ, परमेश्वरा री खुश-खौबरी री सेवा याजकु बाशीऐ कौरु। ज़िणै कौरी दुज़ी ज़ातीऊ रै लोग, पवित्र आत्मा रै ज़ौरिऐ पवित्र कौरीयौ परमेश्वरा लै च़ौड़ाइया ज़ेथ कौरी सेऊ खुश हुआ। 17 एथीलै हाऊं यीशु मसीह री वज़ाह कु परमेश्वरा री सेवा माथै गौरव कौरी सौका ऊ। 18 कैलैकि तिऊं बुशै छ़ाड़ियौ मुकै ओर केज़ी बुशु रै बारै दी बोलणै री हिम्मत नाईं, ज़ो मसीहै दुजी ज़ातीऊ री अधीनता लै वचन, और करम, 19 और च़िन-च़मतकार और नोखै कामु री शक्ति कु, और पवित्र आत्मा री शक्ति कु मैरै ज़ौरिऐ किऐ। इदरा झ़ांऊ कि मुंइऐ यरुशलेमा कु नीईंयौ च़ारौ तौरफ इल्लुरिकुमा झ़ांऊ मसीह री खुशी-खौबरी रौ पुरौ-पुरौ परचार कियौ। 20 पर मैरै ज़िवा री च़ाहा इणी आ, कि यीशु मसीह रै नावां रौ परचार तिऐ शुणाऊ ज़िऐ इबी झ़ाऊं यीशु मसीह रै बारै दी कोइऐ ना शुणौ, ताकी इणौ ना च़ांई हुऔ, कि दुजै री पौई माथै घौर चाणु। 21 पर ज़िणौ पवित्रशास्त्रा दी आ लिखौ औन्दौ, तिणी ई च़ांईं हुऔ, “ज़ासकै मसीह रै बारै दी नाईं आ बोलौ औन्दौ, सै ई देखा ई और ज़ुणिऐ नाईं शुणौ, सै ई सौमझ़ाई।” 22 एथीलै हाऊं तुमु काऐ आशणै लै घौड़ी-घौड़ी रुकौ। रोमा लै डेउणा लै पौलुसा री योजना 23 पर एस इलाकै दी ज़ुणिऐ मसीह रै बारै दी इबी झ़ाऊं नाईं शुणौ थौ तिउंकै मुंइऐ खुशी-खौबरी शुणाउणै रौ काम पुरौ कौरी गौ आ। और आबै भौरी सालै पौखणै बासिऐ तुमु काऐ बेसबरी कौरी मिलणौ च़ाहा ऊ। 24 एथीलै ज़ेबी हाऊं स्पेन देशा लै डेउलौ ता तुमु बाटीऐ मिलियौ डियाऊ कैलैकि मुकै पुरी आश आ, कि तेस सफरा दी हाऊं तुमु कु मिला ऊ, और ज़ेबी तुमारी संगती कु मैरौ मन कुछ़ भौरीया लौ, ता हाऊं च़ाहा ऊ कि तुमै मैरै औगांऊ रै सफरा दी मेरी मज़द कौरा। 25 पर इबी ता मुइंऐ यरुशलेम शैहरा रै विश्वासिऊ री सेवा कौरना लै यरुशलेमा लै डेउणौ आ। 26 कैलैकि मकिदुनीया और अखाया परदेशा रै लोगु कै इणौ आच़्छ़ौ लागौ, कि यरुशलेमा रै विश्वासी लोग ज़ो गरीब ई कुछ़ पैसै कौठै कौरु। 27 तिंउऐ इणौ खुशी कौरी कियौ, पर सै यरुशलेमा रै लोगु रै करज़दार ई, कैलैकि अगर दुज़ी ज़ाती रै लोग तिऊं री आत्मिक आशीषा दी साथी हुआ लै, ता तिउंलै भी ठीक आ, कि गरीबु री दाण देइयौ मज़द कौरा। 28 एथीलै हाऊं एस काम पुरौ कौरीयौ यरुशलेमा लै डियाऊ और ज़ो दाण तिउंलै कौट्ठै आ कियौ औन्दौ तेस तिउंकै दियाऊ तेथ बासिऐ हाऊं तुमु काऐ आशीयौ स्पेन देशा लै डियाऊ। 29 और हाऊं ज़ाणाऊ, कि ज़ेबी हाऊं तुमु काऐ आशु लौ, ता तुमु आइलै मसीहा री किम्मती आशीष बांटाऊ। 30 और ओ प्यारै साथी विश्वासिउओ, हाऊं प्रभु यीशु मसीह रै नावां कु तुमु कु औरज़ कौराऊ कि तुमै मुं आइलै परमेश्वरा कु प्राथना कौरीयौ लगातार मिलियौ रौ, पवित्र आत्मा रै प्यारा रै ज़ौरिऐ। 31 कि हाऊं यहुदिया इलाकै रै अविश्वासिऊ कु बौच़ियौ रौऊ, और मेरी सै सेवा ज़ो यरुशलेमा लै आ, विश्वासी लोगु कै ठीक लागा। 32 और हाऊं परमेश्वरा री इच़्छ़ा कु तुमु काऐ खुशी आइलै आशीयौ तुमु आइलै आराम कौरु। 33 हाऊं प्राथना कौराऊ कि शान्ति रौ परमेश्वर तुमु सौभी आइलै साथाई रौआ, आमीन। |
This work is licensed under Creative Commons Attribution-ShareAlike 4.0 License.