रोमियो 14 - पहाड़ी महासुईविश्वासी भाईऊ माथै आरोप नाईं लाऔ 1 अगर कुण विश्वासा दी कमज़ोर आ, ता तेस आपणी संगती दी अपणाऔ। पर तेसरै बिच़ारा रै बारै दी बैहंसबाज़ी नाईं कौरौ। 2 कैलैकि कुछ़ लोगु रौ विश्वास आ, कि सारौ कुछ़ खाणौ ठीक आ, पर ज़ो विश्वासा दी कमज़ोर आ, सेऊ साग पात ई खाआ। 3 और मांस खाणै वाल़ौ मांस नाईं खाणै वाल़ौ बेकार ना ज़ाणा, और नाईं खाणै वाल़ौ मांस खाणै वाल़ै माथै आरोप ना ला। कैलैकि परमेश्वर तिऊं दुइया अपणावा आ। 4 ता तुमुऐ कासी रै सेवका माथै आरोप नाईं च़ांई लाइणै। सेऊ च़ाऊ आच़्छ़ौ कौरा च़ाऊ बुरौ कौरा इऐ तेसरै मालिका री ज़िम्मेबारी आ। कैलैकि प्रभु तेसरै आच़्छ़ै कौरना लै मज़द कौरा सा। 5 तिणी ई कोई ता एकी दिना कु दुजौ दीन बौड़ियौ माना आ, और कोई सारै दीन एकी ई ज़िणै माना सा। हर एक आपणै ज़िवा दी पाकौ कौरालौ कि ज़िणौ सेऊ सुंच़ा सा तिणी कौरा आ। 6 ज़ो केज़ौ दीन माना सा, सेऊ प्रभु लै इज़्ज़त दैणा लै माना आ। ज़ुण कुछ़ भी खा सा, सेऊ प्रभु लै खाआ, कैलैकि सेऊ परमेश्वरा रौ धन्यबाद कौरा आ। और ज़ुण कुछ़ च़िज़ै नाईं खान्दौ, सेऊ प्रभु लै नाईं खान्दौ और सेऊ परमेश्वरा रौ धन्यबाद कौरा। 7 कैलैकि आमु मांझ़िऐ कु ना ता कोई आपुलै ज़िउंदौ और ना कोई आपुलै मौरदौ। 8 कैलैकि अगर आमै जीउंदै ई, ता प्रभु लै जीउंदै ई। और अगर मौरी ता प्रभु लै मौरी ई। च़ाऊ आमै ज़िवी या मौरी, आमै प्रभु रै ई। 9 कैलैकि मसीह एथीलै मौरौ और ज़िउंदौ भी हुऔ कि सेऊ मौरै औन्दै और ज़िउंदेऊ रौ, दुइया रौ प्रभु हुआ। 10 तू आपणै विश्वासी भाई माथै कैलै आरोप ला ई? या तू तैबै कैलै आपणै विश्वासी भाई बेकार ज़ाणाई? आमु सारेऊ रौ फैसलौ परमेश्वर ई कौरा आ। 11 कैलैकि पवित्रशास्त्रा दी आ लिखौ औन्दौ, “प्रभु बोला आ, मेरी ज़िन्दगी री शौपतै कि हर एक आदमी रै घुंडै मैरै सामनै झुकाई, और हर एक ज़ौणौ परमेश्वर माना ई।” 12 ता तैबै आमु मांझ़िऐ कु हर एक परमेश्वरा कै आपणौ-आपणौ लेखौ दिआ। आपणै भाई लै डुबाउणै रौ कारण नाईं बौणौ 13 एथीलै एथ बासी आमु एकी दुजै माथै आरोप नाईं जांदौ लाइणौ पर तुमै इणी ई आपणै ज़िवा दी ठाणौ कि कोई दुजै विश्वासी लै परमेश्वरा माथै विश्वास ना कौरणै री वज़ाह ना बौणा। 14 हाऊं ज़ाणाऊ, और प्रभु यीशु कु मुकै इणौ पाकौ हुऔ कि कोई भी खाणै री च़ीज़ आपकु आपुलै अशुद्ध नाईं। पर ज़ो तिंया च़ीज़ अशुद्ध सौमझ़ा आ, तेसलै अशुद्ध आ। 15 अगर तुमारौ विश्वासी भाई तुमु री रोटी री वज़ाह कु निराश हुआ आ, ता तैबै तू प्यारा री रीती कु नाईं च़ालदौ। अगर तुमारै खाणै री वज़ाह कु तुमारौ विश्वासी भाई परमेश्वरा माथै विश्वास कौरणौ पोरु छ़ाड़ा ता तेस खाणौ नाईं खा। कैलैकि मसीह तेस विश्वासी भाई लै भी मौरौ आ। 16 एथीलै ज़ो कुछ़ तुमै कौरा ई ता सेऊ आच़्छ़ौ आ पर ज़ुण एस बुरौ सौमझ़ा ता तुमै इणौ कौरणौ पोरु छ़ाड़ौ। 17 कैलैकि परमेश्वरा रै राज़ा दी खाणौ पिणौ एती ज़ुरुरी नाईं। पर ज़ुरुरी बूश इऐ आ कि परमेश्वरा आइलै धौर्मी ज़िन्दगी बिताउणी, शान्ति और पवित्र आत्मा दी खुशी मौनाउणी। 18 और ज़ुण-कुण इणी रीती कौरी मसीह री सेवा कौरा आ, परमेश्वर तेसकु खुश हुआ आ और लोग भी तेसरै बारै दी आच़्छ़ी बुशै लाइऔ तेसरी इज़्ज़त कौरा ई। 19 एथीलै आमै तिऊं आच़्छ़ी बुशु री कोशिषा दी लागी रौआ ज़ेथ कौरी लोग आपु मांझ़िऐ शान्ति दी रौआ और एकी दुजेऊ विश्वासा दी मज़बूत कौरा। 20 तुमारै खाणै री वज़ाह कु परमेश्वरा रै कामा दी रुकावट ना हुआ। याद छ़ाड़ौ कि खाणै री सारी च़िज़ै शुद्ध ई, अगर कुण तुमारै खाणै री वज़ाह कु पापा दी पौड़ा आ ता इणौ गलत आ। 21 भौलौ ता एऊ आ, कि तू ना मांस खाऐ और ना सूर पिऐ, ना कुछ़ इणौ कौरै, ज़ेथकु तैरौ भाई विश्वासा कु भौटकीऔ पापा दी पौड़ा। 22 तैरौ ज़ो विश्वास आ, तेस परमेश्वरा रै सामनै आपणै मौना दी छ़ाड़। भौलौ आ सेऊ, ज़ो तिंया बुशा दी, ज़ो सेऊ ठीक सौमझ़ा आ, आपुलै आरोपी नाईं बौणदौ 23 पर ज़ुण शक कौरा सा, और तैबै भी खा सा, ता सेऊ सौज़ा रौ हक्कदार हुआ आ, कैलैकि सेऊ विश्वासा कौरी नाईं खांदौ। और ज़ो कुछ़ विश्वासा कु नाईं आ, सेऊ पाप आ। |
This work is licensed under Creative Commons Attribution-ShareAlike 4.0 License.