रोमियो 13 - पहाड़ी महासुई

राज़्य लै फर्ज़

¹ हर एक आदमी परधान अधिकारु रै अधीन रौआ लै, कैलैकि केज़ौ भी हक्क इणौ नाईं ज़ो परमेश्‍वरा री तौरफा कु ना औलौ। और ज़ो अधिकार ई, सै परमेश्‍वरा रै ज़ौरिऐ ई दैऔ औन्दै ई।

² एथीलै ज़ुण-कुण अधिकारा रौ बिरोध कौरा सा, सेऊ परमेश्‍वरा री विधी रौ बिरोध कौरा आ, और बिरोध कौरणै वाल़ौ सौज़ा पा सा।

³ अगर कुण आच़्छ़ै काम कौरा आ ता तेसकै आफसरु कु डौरणै री ज़ुरत नाईं आ। पर अगर कुण बुरै कामा कौरा आ ता तिणीऐ डौरनौ च़ांई। एथीलै अगर तू आफसरा कु निडर रौइणौ च़ाहा ई, ता आच़्छ़ौ काम कर और तेसरी तौरफा कु तुमारी तारीफ हुआ सा।

⁴ कैलैकि सेऊ तेरी भौलाई लै परमेश्‍वरा रौ सेवक आ। पर अगर तू बुराई कौरालौ, ता डर। कैलैकि तेसकै हक्क आ कि तुमुलै सौज़ा दिआ, और परमेश्‍वरा रौ सेवक आ। कि तेसरै रोशा रै मुताबिक बुरै काम कौरणै वाल़ेऊ लै सौज़ा दिया।

⁵ एथीलै अधीन नाईं रौइणौ सिरफ तेस रोशा कु, पर डौरा कु ज़ुरुरी आ, और मन भी इणी गवाही दिया सा।

⁶ एथीलै आपणै आफसरु कै मामलौ भी दैऔ, कैलैकि अधिकार छ़ाड़णै वाल़ै परमेश्‍वरा रै सेवक ई, और सै आपणौ फर्ज़ पुरौ कौरना लै कामा दी लागी रौआ ई।

⁷ एथीलै हर एकी रौ हक्क पोरु निपटाऔ, ज़ासकै मामलौ च़ांई, तेसकै मामलौ दैऔ। ज़ासकै रीण दैणौ जा, तेसकै रीण दैऔ। ज़ासरी इज़्ज़त कौरणी च़ांई। तेसरी इज़्ज़त कौरौ। ज़ुण बौड़ाई रै लायक आ, तेसलै बौड़ाई कौरौ।

एकी दुजै लै फर्ज़

⁸ आपु मांझ़िआ रौ प्यारा छ़ाड़ियौ और केज़ी बुशा दी कासी रौ करज़दार नाईं बौणौ। कैलैकि ज़ो दुजै आइलै प्यार छ़ाड़ा आ, तिणीऐ कानून पुरौ कियौ आ।

⁹ कैलैकि, मुसा रै नियमा दी भौरी हुकम थै ज़िणै, “गांदौ काम नाईं कौरणौ, खून नाईं कौरणौ, च़ोरी नाईं कौरणी, लाल़च़ नाईं कौरणौ,” और इऊं सौभी छ़ाड़ियौ और अगर केज़ौ भी हुकम औलौ ता सौभी रौ निचोड़ एज़ै हुकमा दी मिला सा कि, “आपणै पड़ोसी आइलै आपु ज़िणौ प्यार छ़ाड़ौ।”

¹⁰ प्यार पड़ोसी आइलै केज़ी बुराई नाईं कौरदौ, एथीलै ज़ुण प्यार कौरा आ सेऊ नियम पुरौ कौरा आ।

¹¹ और बौगता प्राणियौ इणौ ई कौरौ, एथीलै कि आबै तुमुलै निजा कु बिउज़णै रौ बौगत आशी गौ आ, कैलैकि ज़ेज़ै बौगतै आमुऐ विश्वास किऔ थौ, सेज़ै बौगतै रै बिच़ारा कु आबै आमारौ छ़ुटकारौ नज़दीक आ।

¹² राच भौरी बिती गोई आ, और दीन निकुल़णै वाल़ौ आ। एथीलै आमै न्यारै रै काम पोरु छ़ाड़ियौ सेज़ै औज़ार च़ुंगणै च़ाई ज़ेथरौ काम प्याशै दी हुआ आ।

¹³ ज़िणौ दुसै ढौभा ई, तिणी ई आमु सिधी च़ाल च़ांई च़ालणी। ना की लीलाक्रीड़ा, और सुरी पिणै दी, ना गान्दै कामा दी, और ना लुचपना दी, और ना झ़ौगड़ै और रागा दी।

¹⁴ पर प्रभु यीशु मसीह बच़ाव रै जुड़कै ज़िणौ भिड़ौ, और पापी च़ाल-च़लणा री इच़्छ़ा पुरी कौरणै री कोशिश नाईं कौरौ।