रोमियो 10 - पहाड़ी महासुई

¹ ओ प्यारै साथी विश्वासिउओ, मैरै मौना री इच़्छ़ा और मैरै आपणै यहुदी लोगु लै परमेश्‍वरा कु मेरी प्राथना आ, कि परमेश्‍वर तिउंलै छ़ुटकारौ दिया।

² कैलैकि हाऊं तिऊं रै बारै दी गवाही दिआऊ ऊ, कि सै परमेश्‍वरा लै जोशिलै ता ई, पर तेसरी सेवा लै तिउंरी सौमझ़ गलत आ।

³ कैलैकि सै परमेश्‍वरा री नौज़री दी धोर्मी बौणना लै अणज़ाण हुइयौ आपणै तरिकै कौरीऐ धौर्मी बौणनै री कोशिश कौरा ई, पर परमेश्‍वरा री धार्मिकता रै वशा दी नाईं हुऐ।

⁴ कैलैकि मसीहै सेऊ मकसद पुरौ कियौ आ ज़ेथलै नियम थै दैऔ औन्दै। तेथरौ नौतिज़ौ इणौ आ कि ज़ुण-कुण मसीह माथै विश्वास कौरा, सेऊ परमेश्‍वरा री नौज़री दी धौर्मी बौणा आ।

छ़ुटकारौ सारेऊ लै आ

⁵ कैलैकि मुसा रै नियमा दी इणौ आ लिखौ औन्दौ कि, “हरेक आदमी परमेश्‍वरा री नौज़रीऐ धौर्मी बौणना लै सारै हुकम जा ई मानणै।”

⁶ परमेश्‍वरा री नौज़री दी धौर्मी बौणना लै विश्वासा रौ तरिकौ इणौ आ कि, “ताऐं आपणै मौना दी इणौ ना बोलणौ कि सौरगा माथै कुण च़ौढ़ा?” (मतलब कि मसीह तौल़ै उतारणा लै!)

⁷ या अधोलोका दी कुण उतरा? (मतलब मसीह मौरै औन्दै मांझ़िऐ कु ज़िउंदौ उपरै आणना लै।!)

⁸ पर सै इणौ बोला आ कि, “तू इऊं वचन आपणै मुंआ कौरी मानियौ आपणै ज़िवा दी अपणाई सौका ई।” एऊ सेज़ौ विश्वासा रौ वचन आ, ज़ेथरौ आमै परचार कौरी ई।

⁹ कि अगर तू आपणै मुआं कु यीशु प्रभु ज़ाणियौ माना लौ और आपणै ज़िवा कु विश्वास कौरालौ, कि परमेश्‍वरै सेऊ मौरै औन्दै मांझ़िआ कु ज़िउंदौ कियौ आ, ता तू पाकौ ई छ़ुटकारौ पा ई।

¹⁰ कैलैकि परमेश्‍वरा री नौज़री दी धौर्मी बौणना लै ज़िवा कौरी विश्वास कौरणौ, और छ़ुटकारै पाइणा लै जा मुआं कौरी मानणौ।

¹¹ कैलैकि पवित्रशास्त्र दी इणौ आ लिखौ औन्दौ, “कि ज़ुण-कुण तेस माथै विश्वास कौरालौ, सेऊ शौरमिंदौ ना हुआ लौ।”

¹² यहुदिऊ और दुजी ज़ातीऊ दी कुछ़ भी भेद नाईं, एथीलै कि सेऊ सौभी रौ प्रभु आ। और आपणै सौभी नाऊं निणै वाल़ेउल़ै छ़ुटकारौ आ।

¹³ कैलैकि, “ज़ुण-कुण प्रभु रौ नाऊं नियां लौ, सेऊ छ़ुटकारौ पा।”

¹⁴ पर मसीह, ज़ास माथै तिंउऐ विश्वास नाईं किऔ, सै तेसरौ नाऊं किणौ निंआई? और ज़ासरै बारै दी नाईं शुणौ तेस माथै कैलै विश्वास कौरी? और बिणा परचारक किणौ शुणी आ?

¹⁵ और अगर भेज़ी नाईं लै, ता किणौ परचार कौरी? ज़िणौ पवित्रशास्त्रा दी आ लिखौ औन्दौ, “कि केती बांठणै ई तिऊं लोगु रै बांगणै, ज़ो खुशी री खौबर आणियौ आशा ई।”

¹⁶ पर सौभीऐ तिऐं खुशी री खौबरी माथै विश्वास नाईं कियौ। यशायाह भविष्यवक्ता बोला आ कि, “ओ प्रभु, कुणिऐ भी आमारी खुशी री खौबरी माथै विश्वास कियौ आ?”

¹⁷ एथीलै विश्वास तैबै हुआ ज़ेबी वचन शुणाई और इऐ मसीहा रै वचन ई।

¹⁸ पर हाऊं बोलाऊ, यहुदी लोगुऐ मसीह रै वचन शुणौ ता ज़ुरुर कैलैकि पवित्रशास्त्रा दी इणौ आ लिखौ औन्दौ, “तिउंरी बाच़ सारी धौतरी माथै, और तिऊं रै वचन सारी दुनिया दी पौउंच़ी गौऐ ई।”

¹⁹ तैबै हाऊं बोलाऊ कि का इस्राइली लोग मसीह रै वचन ज़ाणा थै? पैहलै ता परमेश्‍वरै मुसा भविष्यवक्ता रै ज़ौरिऐ इणौ बोला आ कि, “हाऊं तुमु यहुदी लोगु रै ज़िवा दी ज़लन पैदौ कौराऊ, हाऊं, ज़ेबी तुमु दुज़ी ज़ाती रै लोगु लै मैरौ प्यार देखा लै। हाऊं तुमारै ज़िवा दी रोश पैदौ कौराऊ, तिऊं मुर्ख दुज़ी ज़ाती रै लोगु रै ज़ौरिऐ।”

²⁰ तैबै यशायाह बौड़ी हिम्मत्ती आइलै बोला आ कि, “परमेश्‍वर इणौ बोला आ, ‘ज़ो मुं नाईं लोड़ा थै, तिउंकै हाऊं मिली गो ऊ, और ज़ो मुं पुछ़ा भी नाईं थै, तिऊं माथै हाऊं पौगड़ौ हुई गौ ऊ।’ ”

²¹ पर इस्राइला रै लोगु रै बारै दी परमेश्‍वर यशायाह भविष्यवक्ता रै ज़ौरिऐ इणौ बोला आ, “हाऊं सारै दिनै आपणै हाथ एक हुकम ना मानणै वाल़ी और विवाद कौरणै वाल़ी ज़ौण पौरज़ा री भिलै छ़ाड़ौ फैलाई।”