प्रकाशित 9 - पहाड़ी महासुई1 ज़ैबै पांज़वै सौरगदूतै कौरनाल़ फुकरी ता मुंइऐ सौरगा कु धौतरी माथै एक तारौ लोटदै देखौ, और तेसकै अधोलोका री ताल़टी देई आ। 2 तिणीऐ पौइताल़ खोलौ, और अधोलोका कु बौड़ै कुण्डा रै ज़िणौ धुंऔ उठौ, और कुण्डा रै धुंऐ कौरी सुरजा रौ प्याशौ और सौरग नाईं थौ दिशदै लागै औन्दौ। 3 तेस धुंऐ मांझ़िऐ कु धौतरी माथै भौरी का किड़ै-किमलै टिड्डी निकल़ी, और तिउंकै सेई शक्ति देई ज़ो धौतरी रै बिच़्छ़ु दी औआ। 4 तिउंलै बोलौ कि ना धौतरी रै घास, ना कासी हरियाली, ना ता कासी पेड़ा रौ नुकसान कौरेऊ, सिरफ तिऊं लोगु रौ, ज़ासरै कौपाल़ा दी परमेश्वरा री मुहर नाईं आ। 5 तिउंकै लोगु झ़ांगणा लै ता नाईं पर पांज़ मिहनै झ़ांऊ दु:ख दैणै रौ हक्क दैऔ आ: और तिउंरी बौथा इणी थी ज़िणी बिच़्छ़ु रै काटणै कु लोगु कै हुआ आ। 6 सेज़ै बौगता दी लोग मौरणै रै तरिकै लोड़ाई पर सै नाईं मौरदै। और मौरणै री इच़्छ़ा कौरा ई, पर मौत तिऊंकु पोरु भागा ली। 7 सै टिड्डी इणै थै ज़िणै लौड़ाई लै त्यार कियै औन्दै घौड़ै औआ ई, और तिंउरै मुंडा माथै सुनै रै ज़िणै ताज़ थै। और तिंउरै मूंह लोगु ज़िणै थै। 8 तिंउरै बाल़ छ़ेउड़ीऊ रै बाल़ा ज़िणै और दांद बरागा रै दांदा ज़िणै थै। 9 तिंउऐ लोहै रै जुड़कै थै भिड़ै औन्दै: और तिंउरै पाखेऊ री बाच़ इणी थी ज़िणी रथ और भौरी घोड़ेऊ री लौड़ाई दी दौड़दी बारै औआ सा। 10 तिउंरी पूंछ़ बिच़्छ़ु ज़िणी थी, और तिऊंदी ज़ैहर थौ, और तिउंकै पांज़ मिहनै झ़ांऊ लोगु लै दु:ख दैणै री ज़ो शक्ति थी मिली ऐन्दी, सै तिंउरै पूंछ़ा दी थी। 11 अधोलोका रौ दूत तिऊं माथै राज़ौ थौ। तेसरौ नाऊं इब्रानी बोली दी अबद्दोन, और युनानी बोली दी अपुल्लयोन आ। 12 पैहलै मुसीबत टौल़ी एरी, शुणौ, आबै एथ बासिऐ दुई मुसीबत औज़ौ आशणै वाल़ी ई। 13 ज़ैबै छ़ौउवै सौरगदूतै कौरनाल़ फुकरी ता सुनै री बेदी ज़ो परमेश्वरा रै सामनै आ तिंयारै च़ारिया कुणै रै शिंगा मांझ़िया कु मुंइऐ इणी बाच़ शुणी, 14 ज़िणौ कोई छ़ौउवै सौरगदूता लै, ज़ासकै कौरनाल़ थी, बोलदै थौ लागौ औन्दौ, “तिऊं च़ार दूता लै ज़ो बौड़ी नौंई फुराता काऐ बानै औन्दै ई, तिऊं पोरु खोल।” 15 सै च़ार दूत खोली गौऐ ज़ो तेबी, और सेज़ै दिनै, और मिहनै, और बौरशा लै लोगु री एक तिहाई हिस्सै रै पोरु झ़ांगणा लै तैयार थै किऐ औन्दै। 16 तिंउरै फौज़ा रै सवारीऊ री गिनती एक बिऐ करोड़ थी। मुंइऐ तिउंरी गिनती शुणी। 17 और मुकै एज़ै दर्शणा दी घोड़ै और तिंउरै इणी सवारी दिशी ज़ासरै जुड़कै आग ई, और लाल रौंगा री गहरी आग, और गन्धका ज़िणी थी, और तिऊं घोड़ै रै मूंड़ बरागा ज़िणै थै। और तिंउरै मुंहा कु आग, धुंऔ और गान्दी बास निकल़ा थी। 18 इऊं चिनी ई माहामारीऊ मतलब आग, धुंऔ और गान्दी बासा कौरी, ज़ो तिंउरै मुंहा कु निकल़ा थी धौतरी माथा रै एक तिहाई हिस्सै रै लोग पोरु झ़ांगै। 19 कैलैकि तिऊं घोड़ेऊ री शक्ति तिंउरै मुंहा और तिउंरी पूंछ़ा दी थी। एथीलै कि तिउंरी पूंछ़ सापा ज़िणी थी, और तिऊं पूंछ़ा रै मूंड भी थै और इऊं कौरी सै टुका थै। 20 बाकी आदमीउऐ ज़ो तिऊं माहामारीऊ कौरी नाईं मौरै थै, आपणै हाथा रै कामा कु मन नाईं बौदल़ा, कि बुरी आत्मा री, सुनै और च़ांदी और पितल़ और ढोल़ और काठा री मुर्तिऊ री पुज़ा नाईं कौरौ, ज़ो ना देखदै, ना शुणदै, ना हाण्डी बौल़दै, 21 और ज़ो लोऊ, और ज़ादु-टोणो, और बुरै काम, और च़ोरी तिंउऐ कौरी थी, तिऊंकु ज़िऊ नाईं बौदल़ौ। |
This work is licensed under Creative Commons Attribution-ShareAlike 4.0 License.