प्रकाशित 8 - पहाड़ी महासुई

सातवी मुहर और सुनै री धुड़ुस

¹ ज़ैबै गाबड़ुऐ सातवी मुहर खोली, ता सौरगा दी आधै घंटै झ़ांऊ शान्ति रौई।

² तैबै मुंइऐ सै सातिआ सौरगदूत देखै ज़ो परमेश्‍वरा रै सामनै खौड़ै रौआ ई, और तिउंकै सात कौरनाल़ देई।

³ तैबै एक औज़ौ सौरगदूत सुनै री धुड़ुसा कौरी आशौ, और बेदी काऐ खौड़ौ हुऔ। और तेसलै भौरी धूप दैऔ ताकी सेऊ सारै पवित्र लोगु री प्राथना तिऐं सुनै री बेदी माथै च़ड़ावा, ज़ो राज़गाद्दी काऐ आ।

⁴ तेस धूपा रौ धुंऔ परमेश्‍वरा रै लोगु री प्राथना कौरी सौरगदूता रै हाथा कु परमेश्‍वरा काऐ पौंउच़ौ।

⁵ तैबै सौरगदूतै धुड़ुस नीईंयौ तेथदी बेदी री आग भौरी, और धौतरी माथै पाई। ता गुड़णौ और बाशणौ, और बिज़ल़ी और भूइंच़ल़ औन्दै लागै।

सात कौरनाल़

⁶ तैबै सै सातिआ सौरगदूत ज़ासकै सात कौरनाल़ थी, तिऊं फुकुरना लै त्यार हुई गौऐ।

⁷ पैहलै सौरगदूतै कौरनाल़ फुकरी, और लोऊ दी मिलै औन्दै शौरु और आग पैदी हुई, और धौतरी माथै पाऐ। और धौतरी रौ एक हिस्सौ पोरु ज़ौल़ौ, और पेड़-पौधेऊ रौ भी एक हिस्सौ ज़ौल़ौ, और सारौ हौरौ घास भी ज़ौल़ौ पोरु।

⁸ दुजै सौरगदूतै कौरनाल़ फुकरी, ता ज़िणौ कि आगी रौ ज़ौल़दै लागौ औन्दौ एक बौड़ौ पहाड़ समुन्दरा दी पाऔ। और समुन्दरा रौ एक तिहाई हिस्सौ लोऊ हुई गौ,

⁹ और समुन्दरा रै एक तिहाई हिस्सै रै ज़ीव-ज़न्तु मौरी गौऐ, और एक तिहाई हिस्सै दी पाणी रै ज़हाज़ नाश हुई गौऐ।

¹⁰ चिजै सौरगदूतै कौरनाल़ फुकरी, और एक बौड़ौ तारौ ज़ो मशाला रै ज़िणौ ज़ौल़ा थौ, सौरगा कु चुटौ, और नौईं रै एक तिहाई हिस्सै माथै, और पाणी रै ज़ौल़ा माथै पौड़ौ।

¹¹ तेस तारै रौ नाऊं नागदौना सा। और एक तिहाई हिस्सै रौ पाणी नागदौना ज़िणौ कौड़ुऔ हुई गौ, और भौरी का आदमी तेस पाणी रै कौड़ुवै हुणै री वज़ाह कु पोरु मौरै।

¹² च़ौथै सौरगदूतै कौरनाल़ फुकरी, और सुरजा रौ एक तिहाई हिस्सौ, और ज़ुना रौ एक तिहाई हिस्सौ और तारेऊ रै एक तिहाई हिस्सै माथै परेशानी आशी, इदरा झ़ांऊ कि तिऊंरौ एक तिहाई हिस्सौ न्यारौ हुई गौ और दिना री एक तिहाई दी प्याशौ नाईं रौऔ, और तिणी ई राची दी भी।

¹³ ज़ैबै मुंइऐ औज़ौ देखौ, ता सौरगा रै बिच़ा दी एक उकाब उड़दै और उंच़ी बाच़ा दी इणौ बोलदै शुणौ, “तिऊं चीन सौरगदूता री कौरनाल़ा री बाच़ा री वज़ाह, ज़ो इबी झ़ांऊ फुकुरना लै ई रौई ऐन्दी, धौतरी दी रौइणै वाल़ै माथै फिटकार, फिटकार, फिटकार!”