प्रकाशित 7 - पहाड़ी महासुई

इस्राइला रै 1, 44,000 लोग

¹ एथ बासिऐ मुंइऐ धौतरी रै च़ारिया भिलै च़ार सौरगदूत खौड़ै देखै। तिंउऐ धौतरी री च़ारिया भिला री बागुर थांबी ऐन्दी थी ताकी धौतरी या समुन्दर या केज़ै भी पेड़ा माथै बागुर ना च़ाला।

² तैबै मुंइऐ एक औज़ौ सौरगदूत ज़िउंदै परमेश्‍वरा री मुहर पाकड़ियौ पुरब दिशा कु उपरै आशदै देखौ। तिणीऐ तिऊं च़ारिया सौरगदूता लै ज़ासकै धौतरी और समुन्दरा रौ नुकसान कौरणै रौ हक्क थौ दैऔ औन्दौ, ज़ोरै हाकै मारीयौ बोलौ,

³ “ज़ेबी झ़ांऊ आमै आपणै परमेश्‍वरा रै सेवका रै कौपाल़ा दी मुहर ना लाई लै, तेबी झ़ांऊ धौतरी और समुन्दर और पेड़ा लै नुकसान ना कौरेऊ।”

⁴ ज़ास माथै मुहर लाई ऐन्दी आ मुंइऐ तिउंरी गिनती शुणी, मतलब इस्राइला री संताना रै सौभी गोत्रा मांझ़िया कु एक लाख दुई बियै च़ार हज़ार लोगु दी मुहर लाई ऐन्दी:

⁵ सौरगदूतु ऐ यहुदा रै गोत्रा मांझ़िआ कु बाराह हज़ारा माथै मुहर लाई ऐन्दी: रुबेना रै गोत्रा मांझ़िया कु बाराह हज़ारा माथै, गादा रै गोत्रा मांझ़िया कु बाराह हज़ारा माथै।

⁶ अशेरा रै गोत्रा मांझ़िया कु बाराह हज़ारा माथै, नपताली रै गोत्रा मांझ़िया कु बाराह हज़ारा माथै, मनश्शिहा रै गोत्रा मांझ़िया कु बाराह हज़ारा माथै,

⁷ शमौना रै गोत्रा मांझ़िया कु बाराह हज़ारा माथै, लेवी रै गोत्रा मांझ़िया कु बाराह हज़ारा माथै, इस्साकारा रै गोत्रा मांझ़िया कु बाराह हज़ारा माथै,

⁸ जबूलूना रै गोत्रा मांझ़िया कु बाराह हज़ारा माथै, युसुफा रै गोत्रा मांझ़िया कु बाराह हज़ारा माथै, और बिन्यामिना रै गोत्रा मांझ़िया कु बाराह हज़ारा माथै मुहर लाई ऐन्दी।

एक बौड़ी भीड़

⁹ एथ बासिऐ मुंइऐ देखौ, हर एक देश, गोत्र, ज़ाती और बोली बोलणै वाल़ेऊ मांझ़िया कु एक इणी बौड़ी भीड़, ज़ास कोई भी गिणी नाईं सौकदौ, शेते जुड़कै भिड़ीयौ और आपणै हाथा दी खज़ूरा रै शाऊंटै नीईंयौ राज़गाद्दी रै सामनै और गाबड़ु काऐ खौड़ी ई।

¹⁰ और बौड़ी बाच़ा कौरी औटाइयौ बोलाई, “छ़ुटकारै लै आमारै परमेश्‍वरा रौ, ज़ो राज़गाद्दी माथै आ बोशौ औन्दौ, और गाबड़ु री जय-जयकार औआ!”

¹¹ और सारै सौरगदूत तिऐं राज़गाद्दी और स्याणै और च़ारिया लोगु रै फिदीआलै खौड़ै ई। तैबै सै राज़गाद्दी रै सामनै धौनी लोटै। और परमेश्‍वरा लै ढाल कौरीयौ बोलौ,

¹² “आमीन! आमारै परमेश्‍वरा री बौड़ाई और महिमा, ज्ञान, धन्यबाद, इज़्ज़त और तागत और शक्ति जुगै-जुगै बौणी रौआ। आमीन!”

¹³ एथ माथै स्याणेऊ मांझ़िया कु एकीऐ मुलै बोलौ, “एऊ शेते जुड़कै भिड़ीयौ कुण आ? और किदरा कु आशौ आ?”

¹⁴ मुंइऐ तेसलै बोलौ, “ओ गुरु, तू ई ज़ाणाई।” तिणीऐ मुलै बोलौ, “एऊ सेऊ आ, ज़ो तेस महाक्लेशा मांझ़िया कु निकल़ियौ आशौ आ। इउंऐ आपणै-आपणै जुड़कै गाबड़ु रै लोऊ दी धोइयौ शेते किऐ ई।

¹⁵ एज़ी बज़ाह कु सै परमेश्‍वरा री राज़गाद्दी रै सामनै ई, और तेसरै घौरा दी राच-दीन तेसरी सेवा कौरा ई, और ज़ो राज़गाद्दी माथै आ बोशौ औन्दौ, सेऊ तिऊं माथै आपणौ ताम्बु लाआ।

¹⁶ सै तैबै भुखै और चिशै नाईं रौआ लै। और ना तिऊं माथै रूड़, ना कोई तौपिश पौड़ा ली।

¹⁷ कैलैकि गाबड़ु ज़ो राज़गाद्दी रै बिच़ा दी आ तिउंरी रखवाल़ी कौरा आ, और तिऊं ताज़ौ पाणी पिलाउणा लै नियां ज़ो लोगु लै ज़िन्दगी दिया आ। और परमेश्‍वर तिउंरी आखी कु सारै आशु घुशा आ।”