प्रकाशित 4 - पहाड़ी महासुई

सौरगा ई आराधना

¹ एज़ी बुशु बासिऐ ज़ो मुंइऐ देखौ, ता का देखाऊ कि सौरगा दी एक दार खुलौ औन्दौ आ। और ज़ो मुंइऐ पैहलै कौरनाल़ री बाच़ा कु आपु आइलै बुशै लाइंदै शुणौ थौ, सेऊ ई बोला सा, कि इदै उपरै आश: और हाऊं सेज़ी बुशै ताउंकै बोलाऊ, ज़ेथरौ इऊं बुशु बासिऐ पुरौ हुणौ ज़ुरुरी आ।

² और खरकच़ार हाऊं आत्मै आपणै वशा दी कौरी गौ। औज़ौ का देखाऊ, कि एक राज़गद्दी सौरगा दी बौणी आ औन्दी, और तिऐं राज़गद्दी माथै कोई बोशौ औन्दौ आ।

³ और ज़ो तेथ माथै बोशौ औन्दौ आ, सेऊ यशब और माणिक्या मतलब हिरै और किम्मती पात्थर, और तिऐं राज़गद्दी रै च़ारौ तौरफा दी मरकता ज़िणौ एक मेघधनुष दिशा सा।

⁴ और तिऐं राज़गाद्दी रै च़ारौ तौरफा दी दुई बिऐ च़ार राज़गाद्दी ई। और इऊं राज़गद्दी माथै पुराणै स्याणै लोग शेतै जुड़कै भिड़ीयौ ई बोशै औन्दै, और तिऊं रै मुंडा माथै सुनै रै ताज़ ई।

⁵ और तिऐं राज़गद्दी कु बिज़ल़ी और गुड़णौ निकल़ा आ और राज़गद्दी काऐ सात दिवै ई ज़ौल़ै औन्दै, इऐ परमेश्‍वरा री सात आत्माऐं ई।

⁶ और तिऐं राज़गद्दी काऐ एक फौर्श थौ ज़ो समुन्दर ज़िणौ बौड़ौ और शिशै ज़िणौ साफ आ, और राज़गद्दी रै बिच़ा दी और च़ारौ तौरफा दी च़ार आदमी ई, ज़ासरै आगै-पिछ़ै आखी ई।

⁷ पैहलौ आदमी बरागा ज़िणौ आ, और दुजौ आ बाशटु ज़िणौ, चिजै आदमी रौ मूंह आ आदमी ज़िणौ, और च़ौथौ आदमी आ उड़दै उकाबा ज़िणौ।

⁸ और च़ारिया लोगु रै छ़ौ-छ़ौ पांखै ई, और च़ारिया भिलै, और भितै आखी ई आखी आ। और सै राची दोउती बिण आराम कौरीयौ इणौ बोलदै थाका ई लागी, पवित्र, पवित्र, पवित्र प्रभु परमेश्‍वर, सौभी कु शक्ति वाल़ौ, ज़ो थौ, और ज़ो आसा, और ज़ो आशणै वाल़ौ आ।

⁹ और ज़ैबै सै आदमी तेसरी, महिमा और सेवा और धन्यबाद कौरा ई। ज़ो राज़गद्दी माथै आ बोशौ औन्दौ, और सौदा ज़िउंदौ आ।

¹⁰ तैबै एक बिऐ च़ार स्याणै आदमी राज़गाद्दी माथै बोशणै वाल़ै काऐ धौनी पौड़ै, और तेसकै ज़ो सौदा ज़िउंदौ आ ढाल कौरी। और आपणौ-आपणौ ताज़ राज़गाद्दी काऐ इणौ बोलीयौ धौनी पाई,

¹¹ ओ आमारै प्रभु, और परमेश्‍वर, तू ई महिमा, सेवा, शक्ति रै लायक ई। कैलैकि ताइंऐ सौभी च़िज़ै चाणी और सै तेरी ई मौरज़ी री थी, और चाणी ई।