प्रकाशित 21 - पहाड़ी महासुईनौंवौ सौरग और नौईं धौतरी 1 तैबै मुंइऐ नौंउऔ सौरग और नौंउई धौतरी देखी, कैलैकि पैहलौ सौरग और पैहली धौतरी डेउंदै थाकी लागी, और समुन्दर भी नाईं रौऔ। 2 तैबै मुंइऐ पवित्र शैहर नौंवौ यरुशलेम सौरगा कु परमेश्वरा काऐ कु उतुरदै देखौ। सै तिंया लाड़ी ज़िणी थी ज़ो आपणै बोउटै लै सौज़ी औन्दी हुआ। 3 तैबै मुंइऐ राज़गाद्दी कु कोई उंच़ी बाच़ा दी इणौ औटाउंदै शुणौ, “देखौ, परमेश्वरा रौ डेरौ लोगु मांझ़िऐ आ। सेऊ तिऊं आइलै डेरौ कौरा, और सै तेसरै लोग औलै, और परमेश्वर आपु तिऊं आइलै रौआ, और तिऊंरौ परमेश्वर हुआ। 4 सेऊ तिउंरी आखी कु सारै आशु घुशा। और तेत बासिऐ मौउत नाईं रौउंदी, और ना शोक, ना लेरणौ, ना दुःख रौआ लौ। पैहली बुशै डेउंदै थाकी लागी।” 5 ज़ो राज़गाद्दी माथै थौ बोशौ औन्दौ, तिणीऐ बोलौ, “देख, हाऊं सारौ कुछ़ नौंउऔ कौराऊ।” तैबै तिणीऐ बोलौ, “पोरु लिख, कैलैकि एऊ वचन विश्वासा रै लायक और सौच़्च़ौ आ।” 6 तैबै तिणीऐ मुलै बोलौ, “इऐ बुशै पुरी हुई गोई आ। हाऊं अलफा और ओमेगा, शुरुवात और आखरी ऊ। ज़ुण-कुण भी चिशौ औलौ हाऊं तिंउलै सौदा री ज़िन्दगी दैणै वाल़ै पाणी रै ज़ौल़ा मांझ़िआ कु सेंत मेंत पिलावा ऊ।” 7 ज़ुण-कुण तिऊं सारी बुरी तागती ऊ हरावा लौ सेऊ इऊं च़िज़ा रौ वारीस हुआ लौ, और हाऊं तिंउरौ परमेश्वरा रौउलौ, और सेऊ मैरौ छ़ोहरु हुआ। 8 पर डरपोक, और अविश्वासिऊ, बुरै, और हत्यारै और गान्दै काम कौरणै वाल़ेऊ, और ज़ादु-टोन्है कौरणै वाल़ै, और मूर्ती पुज़णै वाल़ै, और सारै झ़ुठेऊ रौ हिस्सौ तिऐं झ़िला दी मिला ई ज़ो आग और गन्धका कौरी ज़ौल़दै रौआ ई: इऐ दुजी मौत आ। नौंवौ यरुशलेम 9 तैबै ज़ेज़ै सात सौरगदूता कै पिछ़लै दुखा कौरी भौरै औन्दै सात कटोरै थै, तिऊं मांझ़िआ कु एक मुकाऐ आशौ, और मुं आइलै बुशै लाइऔ बोलौ, “ओरु आश, हाऊं ताउंकै लाड़ी मतलब गाबड़ु री बोउटी देखाल़ा ऊ।” 10 तैबै तिणीऐ हाऊं आत्मा दी एक बौड़ी और उंच़ी टिरा माथै निऔं, और पवित्र इलाकौ यरुशलेम सौरगा कु परमेश्वरा काऐ कु उतुरदै देखाल़ौ। 11 परमेश्वरा री महिमा तेथदी थी, और तेसरौ प्याशौ भौरी किमत्ती ढोल़, मतलब बिल्लौरा रै ज़िणौ यशबा ज़िणी साफ थी। 12 तेसरी शहरपनाह भौरी उंच़ी थी, तेसरै बाराह बौड़ै दार और बौड़ै दारा माथै बाराह सौरगदूत थै। और तिऊं बौड़ै दारा माथै इस्राइलिऊ रै बाराह गोत्रा रै नाऊं थै लिखै औन्दै। 13 पुर्वा री तौरफा दी चीन बौड़ै दार, उतरा री तौरफा दी चीन बौड़ै दार, दक्षिणा री तौरफा दी चीन बौड़ै दार, और पश्चिमा री तौरफा दी भी चीन बौड़ै दार थै। 14 इलाकै री शहरपनाह री बाराह पौई थी, और तिऊंदी गाबड़ु रै बारह प्रेरिता रै नाऊं थै लिखै औन्दै। 15 ज़ो मुं आइलै बुशै लाइंदै थौ लागौ औन्दौ तेसकै इलाकै और तेसरै बौड़ै दार और तेसरी शहरपनाह नापणा लै सुनै रौ एक गज़ थौ। 16 सेऊ इलाकौ च़ार कुणै दी थौ बौसौ औन्दौ और तेसरी लम्बाई, च़ौड़ाई रै बराबर थी। और तिणीऐ तेस गज़ा कौरी सेऊ इलाकौ नापौ, ता साड़ै सात शौ कोसा रौ निकल़ौ तेसरी लम्बाई और च़ौड़ाई और उंच़ाई बराबर थी। 17 तिणीऐ तेसरी शहरपनाह आदमी रै मतलब सौरगदूता रै नावां कौरी नापौ, ता एक शौ दुई बिऐ च़ार हाथ निकल़ौ। 18 तेसरी शहरपनाह यशबा री थी बौणी औन्दी, और इलाकौ इणै च़ोखै सुनै रौ थौ ज़ो साफ शिशै रौ थौ बौणौ औन्दौ। 19 तिऊं इलाकै री पौई भौरी रौंगा रै किमत्ती ढोल़ा कौरी थी सौज़ाई ऐन्दी। पैहली पौई यशबा री, दुजै नीलमणी री, चीजी लालड़ी री, च़ौथी मरकता री, 20 पांज़वी गोमेदका री, छ़ौउवी माणिक्या री, सातवी पीतमणि री, आठवी पेरिजा री, नौंवी पुखराजा री, और दसवी लहसनिऐ री, ग्यारवी धूम्रकान्ता री, और बारुवी याकूता री थी। 21 बारह बौड़ै दार बाराह मोतिऊ रै थै: एक-एक बौड़ै दार एक-एक मोती रौ थौ चाणौ औन्दौ। इलाकै री सौड़क साफ शिशै ज़िणै च़ोखै सुनै री थी 22 मुंइऐ तेसदी कोई मन्दिर नाईं देखौ, कैलैकि सारेऊ कु शक्ति वाल़ौ प्रभु-परमेश्वर और गाबड़ु तेसरौ घौर ई। 23 तेस इलाकै दी सुरज और ज़ुना रै प्याशै री ज़ुरत नाईं, कैलैकि परमेश्वरा रै प्याशै कु तेसदी प्याशौ आ लागदै लागौ औन्दौ, और गाबड़ु तेसरौ दिवौ आ। 24 धौतरी रै लोग तेसरै प्याशै दी आण्डा-फिरा ई, और धौतरी रै राज़ै आपणै-आपणै प्याशै रौ समान तेसदी आणाई। 25 तेसरै बौड़ै दार केबी भी दुसै बन्द नाईं औन्दै, और तिऐ राच नाईं औन्दी। 26 लोग धौतरी रौ प्याशौ और सुखा रौ समान तेसदी आणाई। 27 पर तेसदी कोई खराब च़ीज़, या गान्दै काम कौरणै वाल़ौ, या झ़ूठ बोलणै वाल़ौ किणै तरिकै कौरी नाईं डेई बौल़दौ, पर सिरफ सै लोग ज़ासरै नाऊं गाबड़ु रै जीवना री किताबी दी ई लिखै औन्दै। |
This work is licensed under Creative Commons Attribution-ShareAlike 4.0 License.