प्रकाशित 20 - पहाड़ी महासुईएकी हज़ारा बौरशा रौ राज़ 1 तैबै मुंइऐ सौरगा कु एक सौरगदूत उतुरदै देखौ, ज़ासरै हाथै दी अधोलोका री ताल़टी और एक बौड़ी शांगल़ थी। 2 तिणीऐ तेस अजगरा लै मतलब पुराणै सापा लै, ज़ो इबलीस और शैतान आ, सेऊ पाकड़ियौ हज़ार बौरशा लै बानी ऐरौ, 3 और तेस अधोलोका दी पाइयौ बन्द कौरी ऐरौ, और तेस माथै मुहर लाई कि एऊ हज़ार बौरश पुरै हुणै झ़ांऊ ज़ाती-ज़ाती रै लोगु औज़ौ नाईं पौरखा लौ। तेत बासिऐ ज़ुरुरी आ तेस कुछ़ बौगता लै औज़ौ खोला। 4 तैबै मुंइऐ राज़गादी देखी, और तिऊं माथै लोग बोशी गौऐ, और तिउंकै फैसलै कौरणै रौ हक्क दैऔ। मुंइऐ तिउंरी आत्मा भी देखी, ज़ासरै मूंड यीशु री गवाही दैणै और परमेश्वरा रै वचना री वज़ाह कु काटै औन्दै थै, और ज़ुणिऐ ना तेस जानवरा री, और ना तेसरी मूर्ती री पुज़ा की थी, और ना तेसरी छ़ाप आपणै कौपाल़ा और हाथा दी लाई थी। सै ज़िउंदै हुइयौ मसीह आइलै हज़ार बौरशा झ़ांऊ राज़ कौरदै रौऐ। 5 ज़ेबी झ़ांऊ इऐ हज़ार बौरश पुरै ना हुआ लै तेबी झ़ांऊ बाकी मौरै औन्दै लोग ज़िउंदै ना हुआ लै। एऊ ता पैहलौ ज़िउंदौ हुणौ आ। 6 आशीष वाल़ै और पवित्र ई सै, ज़ो एज़ै पैहलै ज़िउंदै हुणै रै साथा दी ई। इणेऊ माथै दुजी मौउता रौ कुछ़ भी हक्क नाईं, पर सै परमेश्वर और मसीहा रै याजक हुआई और तेस आइलै हज़ार बौरशा रौ राज़ कौरा ई। शैताना रौ बिनाष 7 ज़ैबै हज़ार बौरश पुरै हुआ लै ता शैतान कैदा कु पोरु छ़ाड़ाई। 8 सेऊ तिऊं ज़ातीऊ लै ज़ो पुरी दुनिया दी हुआ लै, मतलब गोग और मागोगा लै ज़ासरी गिनती समुन्दरा रै बाल़ु रै बराबर हुआ आ, बहकाइयौ लड़ाई लै कौट्ठै कौरना लै निकल़ा लौ। 9 सै सारै धौतरी माथै फैअलियौ परमेश्वरा रै लोगु री छ़ावनी और आच़्छ़ौ इलाकौ घेरा। और आग सौरगा कु उतरियौ तिऊं भस्म कौरा आ। 10 तिंउरौ बहकाउणै वाल़ौ शैतान आग और गन्धका री तिऐं झ़िला दी, ज़ासदी सेऊ जानवर और झ़ुठौ भविष्यवक्ता भी हुआ, तेथदी पा आ ई। और सै राची-दिनै सौदा झ़ांऊ दुखा दी तौड़फदै रौआ ई। बौड़ी शेती राज़गाद्दी और आखरी फैसलौ 11 तैबै मुंइऐ एक बौड़ी शेती राज़गाद्दी और सेऊ देखौ ज़ो तेथ माथै थौ बोशौ औन्दौ। तेस काऐ कु धौतरी और सौरग भागी गौऐ, और तिउंकै ज़ागाह नाईं मिली। 12 तैबै मुंइऐ छ़ोटै-बौड़ै सारै मौरै औन्दै राज़गाद्दी काऐ खौड़ै देखै, और किताब खोली गोई। तैबै औज़ौ एक किताब खोली, मतलब ज़िन्दगी री किताब। और ज़िणौ तिऊं किताबी दी थौ लिखौ औन्दौ, तिणी ई तिंउरै कामा रै मुताबिक मौरै औन्देऊ रौ फैसलौ कियौ। 13 समुन्दरै सै मौरै औन्दै ज़ो तेथदी थै देई गौऐ और मौत और अधोलोकै सै मौरै औन्दै ज़ो तेथदी थै देई गौऐ। और तिऊं मांझ़िआ कु हर एकी रौ तिंउरै कामा रै मुताबिक फैसलौ कियौ। 14 मौत और अधोलोक भी आगी री झ़िला दी पाऐ। इऐ आगी री झ़ील दुजी मौत आ। 15 और ज़ास कासी रौ नाऊं ज़िन्दगी री किताबी दी लिखौ औन्दौ नाईं मिला लौ, सेऊ आगी री झ़िला दी पाऔ। |
This work is licensed under Creative Commons Attribution-ShareAlike 4.0 License.