प्रकाशित 2 - पहाड़ी महासुई

इफिसुसा लै खुशी री खौबर

¹ तिणीऐ मुलै इणौ भी बोलौ, “इफिसुस शैहरा री कलिसिया रै दूता लै इणी खौबर लिख: हाऊं ऊ सेऊ ज़ुण आपणै सुल़टै हाथा दी सात तारै पाकड़ी छ़ाड़ाऊ, और सुनै री साता धुड़ुसा रै बिच़ा दी हांडा ऊ। हाऊं तुमुलै इणौ बोलाऊ।

² हाऊं तैरौ काम, और मैहनत, और तैरौ सौबर ज़ाणाऊ। और इणौ भी, कि तू बुरै लोगु नाईं देखी बौल़दौ। और ज़ुण आपुलै प्रेरित बोलाई, और आसतै नाईं, सै ताइंऐ पौरखियौ झ़ुठै पाऐ।”

³ और “तू सौबर कौरा ई, और मैरै नावां लै दु:ख झ़ेली-झ़ेलियौ खौड़ौ नाईं।

⁴ पर मुंइऐ तैरै खिलाफ इणौ बोलणौ आ कि तांइऐ आपणौ पैहलौ ज़िणौ प्यार छ़ाड़ी गौ आ।

⁵ एथीलै याद कर, कि तू किदरु लोटौ ई, और मन बौदुल़ और पैहलै ज़िणौ काम कर। और अगर तू मन नाईं बौदल़ा लौ, ता हाऊं, ताऊं काऐ आशीयौ तेरी धुड़ुस तिदरा कु पोरु हटाऊ।

⁶ पर हां, ताऊं दी एज़ी बूश ता आसती आ, कि तू नीकुलइऊ पिछ़ु हांडणै वाल़ै लोगु रै कामा कु नफरत कौरा ई, ज़ासकु हाऊं भी नफरत कौराऊ।

⁷ अगर सौमझ़णौ च़ाहा ई, ता तुमै ध्याना देइयौ सुंच़ेऊ कि आत्मा कलिसियाऊ लै का बोला आ। ज़ुण ज़िता लौ, हाऊं तेसलै तेस ज़िन्दगी रै पेड़ा कु ज़ो परमेश्‍वरा रै सौरगा दी ई, फल़ खाणा लै दिआऊ।”

स्मुरणा लै खुशी री खौबर

⁸ तिणीऐ मुलै इणौ भी बोलौ, “कि स्मुरणा शैहरा री कलिसिया रै दूता लै इणी खौबर लिख: कि ज़ो पैहलौ और आखरी आ ज़ो मौरी गौ थौ और आबै ज़िउंदौ हुई गौ आ, सेऊ इणौ बोला कि

⁹ हाऊं तैरौ दु:ख और गरीबी ज़ाणाऊ (पर आत्मिक बुशु दी तू सौच़्च़ी सेठ ई), और ज़ो लोग आपुलै यहुदी बोलाई और आसतै नाईं, पर शैताना री खुंबल़ी ई, हाऊं तिऊं री बुराई भी ज़ाणाऊ।

¹⁰ ज़ो दु:ख ताऊं झ़ेलणै जा लै, तिऊंकु नाईं डर कैलैकि शुण, शैतान तुमु मांझ़िआ कु कईउ ता ज़ेला दी पाइणै री ताकी दी आ। ताकी तुमै पौरखिया। और तुमुऐ दस दिना झ़ांऊ दु:ख जा ई झ़ेलणै: मौरणै झ़ांऊ विश्वासी रौऊ। ता हाऊं ताउंलै ज़िन्दगी रौ ताज़ दिआऊ।

¹¹ अगर सौमझ़णौ च़ाहा ई, ता तुमै ध्याना देइयौ सुंच़ेऊ कि आत्मा कलिसियाऊ लै का बोला आ। ज़ो ज़िता लौ, तेसलै सौदा री मौउता कु कोई नुकसान नाईं औन्दौ।”

पिरगमुना लै खुशी री खौबर

¹² तिणीऐ मुलै इणौ भी बोलौ आ कि, “पिरगमुन शैहरा री कलिसिया रै दूता लै इणी खौबर लिख: कि ज़ासकै तेज़ दुई धार वाल़ी तलवार आ, सेऊ इणौ बोला आ, कि

¹³ हाऊं इणौ ता ज़ाणाऊ कि, तू तिऐ रौआ ई ज़िऐ शैताना रौ राज़गादी आ, तू मैरै नावां माथै पाकौ रौआ ई। और मुं माथै विश्वास कौरणै री वज़ाह कु तिऊं सेज़ै दिना दी भी पिछ़ै ना मुड़ौ ज़ेबी मैरौ विश्वास वाल़ौ साथी अन्तिपास, तुमु मांझ़िऐ सेज़ी ज़ागाह दी झ़ांगौ ज़िऐ शैतान रौआ आ।

¹⁴ पर मुंइऐ तैरै खिलाफ कुछ़ बोलणौ आ, कैलैकि तैरै बाटीऐ कुछ़ इणै ई, ज़ो बिलामा री शिक्षा माना ई, ज़ुणिऐ छ़ोहरु इस्राइलिऊ काऐ ठोकरा रौ कारण छ़ाड़णौ शिखाऔ, कि सै मूर्ती काऐ च़ड़ाई ऐन्दी भैंटा री च़िज़ै खा, और गान्दै काम कौरा।

¹⁵ तिणी ई तैरै बाटीऐ केती ता इणै ई, ज़ो नीकुलइऊ री शिक्षा माना ई।

¹⁶ एथीलै मन बौदल़ौ अगर नाईं बौदल़ा लै, ता हाऊं शिगरी आशाऊ, और तिऊं लोगु रै खिलाफ तलवारा कौरी लौड़ाऊ ज़ो मैरै मुंआ कु निकल़ा आ।

¹⁷ अगर सौमझ़णौ च़ाहा ई, ता तुमै ध्याना देइयौ सुंच़ेऊ कि आत्मा कलिसियाऊ लै का बोला आ। ज़ुण ज़िता लौ, तेसलै हाऊं छ़ुपै औन्दै मन्ना मांझ़िआ कु दिआऊ, और तेसकै एक शेतौ ढोल़ भी दिआऊ। और तेस ढोल़ा माथै एक नाऊं लिखौ औन्दौ हुआ, तेस सिरफ सेऊ ई ज़ाणी सौका ज़ुण तेस ढोल़ नियां लौ।”

थुआतुरा लै खुशी री खौबर

¹⁸ तिणीऐ मुलै इणौ भी बोलौ कि, “थुआतीरा शैहरा री कलिसिया रै दूता लै इणी खौबर लिख कि, परमेश्‍वरा रौ छ़ोहरु ज़ासरी आखी आगी ज़िणी ई, और ज़ासरै बांगणै आच़्छ़ै पितल़ा ज़िणै ई, इणौ बोला आ, कि

¹⁹ हाऊं तैरै काम, प्यार, विश्वास, और सेवा, और सौबर ज़ाणाऊ, और इणौ भी कि पिछ़लै काम पैहलै कु बौड़ियौ ई।

²⁰ पर मुंइऐ तैरै बारै दी इणौ बोलणौ आ, कि तू तिऐं छ़ेउड़ी इज़ेबेल रौअणै दिआई ज़ुण आपुलै भविष्यवाणी कौरणै वाल़ी बोला आ, और मैरै सेवकु गान्दै काम कौरना लै, और मूर्ती काऐ च़ड़ाई ऐन्दी भैंटा री च़िज़ै खाणा लै शिखाइयौ बिश्वाशा आ।

²¹ मुंइऐ तियांलै मन बौदुल़णै रौ मौकौ दैऔ, पर सै गान्दै कामा कु मन बौदुल़णौ नाईं च़ांइदी।

²² देख, हाऊं तिऐं च़ारपाई माथै पा ऊ। और ज़ो तिंया आइलै गान्दै काम कौरा ई अगर सै भी तिंया ज़िणै गान्दै काम कु मन नाईं बौदल़ा लै ता तिऊं बौड़ै दुखा दी पाऊ।

²³ और हाऊं तिंआरै लोल़डै पोरु झ़ांगाऊ। और तैबै सारी कलिसिया ज़ाणा ली कि हिकड़ौ और ज़िवा रौ परखणै वाल़ौ हाऊं ऊ: और हाऊं तुमु मांझ़िआ कु हर एकी लै तेसरै कामा रै मुताबिक इनाम दिआऊ।

²⁴ पर तुमै थुआतीरा रै बाकी लोगु कै, ज़ेती एज़ी शिक्षा नाईं मानदै, तिऊं बुशै ज़ेथलै शैताना री गैहरी बुशै बोलाई, नाईं ज़ाणदै, इणौ बोलाऊ, कि हाऊं तुमु माथै औज़ौ भार नाईं पांइदौ।

²⁵ पर हां, ज़ो तुमुकै आसा सा, तेस मुं आशणै झ़ांऊ पाकड़ी छ़ाड़ौ।

²⁶ ज़ो ज़िता लौ और मैरै कामा रै ज़ौरिऐ आखरी झ़ांऊ कौरदै रौआ लौ, हाऊं तेसकै ज़ाती-ज़ाती रै लोगु माथै हक्क दिआऊ,

²⁷ हाऊं तिउंकै राज़ कौरना लै सेज़ौ हक्क दियाऊ ज़ेज़ौ कि मैरै बाबै मुकै आ दैऔ औन्दौ। तिऊंरौ राज़ लोऐ ज़िणौ पाक्कौ औणौ आ ज़ो चुटदौ नाईं और तिउंरै दुश्मन चुटै औन्दै माटै रै ओखरा ज़िणै औणै ई।

²⁸ और हाऊं तिउंकै तिउंरी ज़ीत देखाउणा लै दोतकौ तारौ भी दियाऊ।

²⁹ अगर सौमझ़णौ च़ाहा ई, ता तुमै ध्याना देइयौ सुंच़ेऊ कि आत्मा कलिसियाऊ लै का बोला आ।”