प्रकाशित 16 - पहाड़ी महासुईपरमेश्वरा रै रोशा री सात कटोरै 1 तैबै मुंइऐ परमेश्वरा रै घौरा दी कुण उंच़ी हाका कौरी तिऊं सात सौरगदूता लै इणौ बोलदै शुणौ, “डैऔ, परमेश्वरा रै रोशा रै सात कटोरै धौतरी माथै पेरौ।” 2 तैबै पैहलै सौरगदूतै डेइयौ आपणौ खोरु धौतरी माथै पेरौ। तैबै तिऊं लोगु रै, ज़ास माथै बुरै जानवरा री छ़ाप थी और ज़ो तिउंरी मूर्ती री पुज़ा कौरा थै, एकी रौंगा रौ बुरौ और दुःख दैणै वाल़ौ दुखणौ निकल़ौ। 3 दुजै सौरगदूतै आपणौ खोरु समुन्दरा दी पेरौ, और सेऊ मौरै औन्दै आदमी रै लोऊ ज़िणौ बौणी गौ, और समुन्दरा रौ हर एक ज़ीव मौरी गौ। 4 चिजै सौरगदूतै आपणौ खोरु नौईं और पाणी रै ज़ौल़ा माथै पेरौ और सेऊ लोऊ बौणी गौ। 5 तैबै मुंइऐ सेऊ सौरगदूत ज़ासकै सारै पाणी माथै हक्क थौ, परमेश्वरा लै इणौ बौल़दै शुणौ, “ओ पवित्र, ज़ो आसा और ज़ो थौ, तू फैसलौ ई और ताइंऐ एऊ फैसलौ कियौ। 6 कैलैकि तिंउऐ परमेश्वरा रै लोगु और भविष्यवक्तु रौ लोऊ बहाऔ थौ, और ताइंऐ तिउंलै लोऊ पिलाऔ। कैलैकि सै एथीरै लायक ई।” 7 तैबै मुंइऐ बेदी कु एज़ी हाक शुणी, “ओ, ओ सौभी कु शक्ति वाल़ौ प्रभु परमेश्वर, तैरै फैसलै ठीक और सौच़्च़ै ई।” 8 च़ारवै सौरगदूतै आपणौ खोरु सुरजा माथै पेरौ, और तेसकै लोगु आगी कौरी ज़ाल़णै रौ हक्क दैऔ। 9 लोग भौरी गौर्मी कौरी ज़ौल़ी गौऐ, और परमेश्वरा रै नावां री ज़ासकै इऊं परेशानी माथै हक्क आ, बुराई की ई पर तेसरी महिमा कौरना लै ज़िऊ नाईं बौदल़ौ। 10 पांज़ुवै सौरगदूतै आपणौ खोरु तेस जानवरा री राज़गाद्दी माथै पेरी गौ, और तेसरै राज़्य माथै न्यारौ छ़ाई गौ। लोग बेदणी कौरी आपणी-आपणी ज़ीभ चाकदै लागै, 11 और आपणै दुखा और दुखणै री वज़ाह कु सौरगा रै परमेश्वरा री बुराई कौरी। पर सेज़ी हालती दी भी तिंउऐ आपणै-आपणै ज़िऊ बुरै कामा कु नाईं बौदल़ौ। 12 छ़ौउवै सौरगदूतै आपणौ खोरु बौड़ी नौईं फुराता माथै पेरी गौ, और तेसरौ पाणी शुकी गौ ताकी पुर्वा री तौरफा रै राज़ै कालै बाट तयार हुआ। 13 तैबै मुंइऐ तेस अजगरा रै मुंआ कु, और तेस बुरै जानवरा रै मुंआ कु, और तेस झ़ुठी भविष्यवाणी कौरणै वाल़ै भविष्यवक्ता रै मुंआ कु चीन अशुद्ध आत्माऐं मानु-मिंडकै रै रुपा दी निकुल़दै देखै। 14 इऐ निशाणी देखाल़णै वाल़ी बुरी आत्मा आ, ज़ो सारी दुनिया रै राज़ेऊ कु निकल़ियौ एथीलै डिआई कि तिऊं सौभी कु शक्ति वाल़ै परमेश्वरा रै बौड़ै दिना री लौड़ाई लै कौठौ कौरा। 15 “देख, हाऊं च़ोरा ज़िणौ आशाऊ। आशीष वाल़ौ आ सेऊ, ज़ुण उज़ीई रौआ आ, और आपणै ज़ुड़केऊ ज़ागाह आ ताकी नांगी ना हाण्डा लौ, और लोग तेस नांगी नाईं देखाल़ै।” 16 और तिंउऐ सै सेज़ी ज़ागाह दी कौठै किऐ ज़ेथलै इब्रानी बोली दी हर-मगीदौन बौल़ा ई। 17 सातवै सौरगदूतै आपणौ खोरु बागुरा माथै पेरौ, और परमेश्वरा रै घौरा री राज़गाद्दी कु एज़ी बौड़ी बाच़ हुई कि, “सारौ कुछ़ हुई गौ आ!” 18 तैबै बिज़ल़ी च़ौमकी, और बाच़ और गुड़णौ हुऔ, और एक इणौ बौड़ौ भूइंच़ल़ आशौ कि ज़ेबी कु आदमी रौ ज़नम धौतरी माथै हुऔ, तेबी कु इणौ बौड़ौ भूइंच़ल़ केबी नाईं आशौ थौ। 19 एथीई कौरी बेबीलोना रै बौड़ै शैहरा रै चीन टुकड़ै हुई गौऐ, और ज़ाती-ज़ाती रै इलाकै ढौल़ी गौऐ। और बौड़ै बेबीलौना री याद परमेश्वरा कै आशी कि सेऊ आपणै रोशा री जलना री सूर तेसलै पिलावा। 20 सेज़ै बौगतै हर एक टापु समुन्दरा दी औच़ी गौऐ, और तिऐ कोई भी धारै-टिरै नाईं रौई। 21 सौरगा कु लोगु माथै ज़िवा भौरीयौ बौड़ै शौरु पौड़ै, और एथीलै कि एज़ी मुसीबत भौरी ई गौरकी थी, लोगुऐ शौरु री मुसीबता री वज़ाह कु परमेश्वरा री बुराई कौरी। |
This work is licensed under Creative Commons Attribution-ShareAlike 4.0 License.