प्रकाशित 15 - पहाड़ी महासुईआखरी मुसीबता आइलै सौरगदूत 1 तैबै मुंइऐ सौरगा दी एक औज़ौ बौड़ौ और नोखौ निशाण देखौ, मतलब सात सौरगदूत ज़ासकै सातिआ आखरी मुसीबत थी, आखरी एथीलै कैलैकि तिंउरै पुरै हुणै माथै परमेश्वरा रै रोश खातम औआ ई। 2 तैबै मुंइऐ आगी कु मिलै औन्दै शिशै ज़िणौ एक समुन्दर देखौ। और ज़ो तेस जानवरा माथै और तेसरी मूर्ती माथै और तेसरै नावां री गिनती माथै ज़ितौ औन्दौ थौ सै तेस शिशै रै समुन्दरा रै नज़दीक परमेश्वरा री वीणा कौरी खौड़ै देखै। 3 और सै परमेश्वरा रै सेवक मुसा रौ गेत, और गाबड़ु रौ गेत गाई-गाइयौ बोला थै, “ओ सौभी कु शक्ति वाल़ौ प्रभु परमेश्वर, तैरै काम महान और नोखै ई। ओ ज़ुगा-ज़ुगा रौ राज़ौ, तेरी च़ाल ठीक और सौच़्च़ी आ। 4 ओ प्रभु, कुण आ ज़ुण तांउकु नाईं डौरदौ, और तैरै नावां री महिमा नाईं कौरदौ? कैलैकि सिरफ तू ई पवित्र ई। सारी ज़ाती आशीयौ ताऊं काऐ ढाल कौरा ई, कैलैकि तैरै फैसलै रै काम पौगड़ै हुई गौऐ ई।” 5 इऊं लोगु रै गाइणै बासिऐ मुंइऐ देखौ कि सौरगा दी परमेश्वरा रौ घौर खुलौ औन्दौ थौ ज़ो ताम्बु ज़िणौ आ। 6 और सै सात सौरगदूत ज़ासकै सात दुःख थै, मलमला रै शुद्ध और च़ौमकणै वाल़ै जुड़कै भिड़ीयौ और हिकड़ा काऐ सुनै री गाची बानियौ परमेश्वरा रै घौरा कु निकल़ै। 7 तैबै तिऊं च़ारिया लोगु मांझ़िआ कु एकीऐ तिऊं सात सौरगदूता कै परमेश्वरा रै ज़ो सौदा ज़िउंदौ आ, रोशा कौरी भौरै औन्दै सुनै रै सात कटोरै दै। 8 परमेश्वरा री महिमा और तेसरी शक्ति री वज़ाह कु सेऊ परमेश्वरा रौ घौर धुंऐ कौरी भौरुई गौ, और ज़ेबी झ़ांऊ तिऊं सातिआ सौरगदूता रै सातिआ दुःख खातम नाईं हुऐ तेबी झ़ांऊ कोई भी परमेश्वरा रै घौरा दी नाईं डेई बौल़ौ। |
This work is licensed under Creative Commons Attribution-ShareAlike 4.0 License.