प्रकाशित 14 - पहाड़ी महासुईगाबड़ु और तेसरै लोग 1 तैबै मुंइऐ देखौ, सेऊ गाबड़ु सिय्योन टिरा माथै खौड़ौ आ, और तेस आइलै एक लाख दुई बिऐ च़ार हज़ार लोग ई, ज़ासरै कौपाल़ा दी तेसरौ और तेसरै बाबा रौ नाऊं आ लिखौ औन्दौ। 2 और सौरगा कु मुकै एक इणी हाक शुणुई ज़िणौ पाणी रौ भौरी शोर और गुड़णै री हाक थी, और ज़ो हाक मुंइऐ शुणी सै इणी थी ज़िणी वीणा बाज़णै वाल़ै वीणा बाज़ा ई। 3 सै लोग राज़गाद्दी काऐ और च़ारिया लोगु और पुराणै भविष्यवक्ता काऐ एक नौंवौ गेत थै गाइंदै लागै औन्दै। तिऊं एक लाख दुई बिऐ च़ार हज़ार लोगु छ़ाड़ियौ, ज़ो धौतरी माथा कु खरीदियौ थै आणै औन्दै, कोई भी तेस गेत नाईं शिखी बौल़ा थै। 4 इऐ सै ई ज़ुण छ़ेउड़ीऊ आइलै अशुद्ध नाईं हुऐ, पर तिउंरी शादी नाईं हुई। इऐ सै ई, कि ज़ियै-कियै गाबड़ु डिआ आ, सै तेस पिछ़ु डिआई। इऐ ता परमेश्वरा लै फसला रै पैहलै फल़ हुणा लै लोगु मांझ़िया कु खरीदै औन्दै ई। 5 तिंउऐ केबी झ़ूठ नाईं बोलौ थौ, सै बेकसूर ई। चीन सौरगदूत 6 तैबै मुंइऐ एक औज़ौ सौरगदूत सौरगा दी उड़दै देखौ, ज़ासकै धौतरी माथै रौइणै वाल़ै हर एक ज़ाती लै, और गोत्र, और बोली, और लोगु कै शुणाउणा लै सौदा री खुश-खौबरी थी। 7 तिणीऐ बौड़ी बाच़ा दी बोलौ, “परमेश्वरा कु डौरौ, और तेसरी महिमा कौरौ, कैलैकि तेसरै फैसलै कौरणै रौ बौगत आशी गौ आ। तेसरौ भजन गाऔ, ज़ुणिऐ सौरग और धौतरी और समुन्दर और पाणी रै ज़ौल़ चाणै।” 8 तैबै तेत बासिऐ एक दुजौ सौरगदूत इणौ बोलीऔ आशौ, “आबै सेऊ नाश हुई गौ, सेऊ बौड़ौ बेबीलौना रौ शैहर नाश हुई गौ, तिणीऐ मानव ज़ाती कै आपणी सूर पिलाई ज़ेथरौ मतलब आ कि भौरी गान्दौ च़ाल-च़लण ज़ो तिणीऐ लोगु कै शिखाऔ कैलैकि तिणीऐ तिउंकै मूर्ती री पुज़ा कौरणी शिखाई।” 9 तैबै इऊं बासिऐ एक औज़ौ सौरगदूत बौड़ी हाका कौरी इणौ बोलीयौ आशौ, “कि ज़ुण-कुण तेस बुरै जानवर और तेसरी मूर्ती री पुज़ा कौरा, और आपणै कौपाल़ या आपणै हाथा दी तेसरी छ़ाप लाआ लौ,” 10 “ता सेऊ परमेश्वरा रै भौरी रोशा री सूर, ज़ो तेसरै रोशा रै कटोरै दी आ पाई ऐन्दी, पिया लौ, और पवित्र सौरगदूता काऐ और गाबड़ु काऐ आग और गन्धका री बैदणी दी पौड़ा आ। 11 और तिउंरी बेदणी रौ धुंऔ सौदा उठदै रौआ आ, और ज़ो तेस जानवर और तेसरी मूर्ती री पुज़ा कौरा ई, और ज़ो तेसरै नावां री छ़ाप लाआ ई, तेसकै राच और दीन च़ैन नाईं मिला लौ।” 12 परमेश्वरा रै लोगु री सौबर एथीई दी आ, ज़ुण परमेश्वरा रै हुकम माना ई, और यीशु माथै विश्वास छ़ाड़ाई। 13 तैबै मुंइऐ सौरगा कु एज़ी हाक शुणी, “लिख, इबी कु आशीष वाल़ै ई सै लोग ज़ुण प्रभु दी विश्वास कौरीयौ मौरा ई।” आत्मा बोला आ, “ओ, कैलैकि सै आपणी सारी मैहनता कु आरामा पा लै, और तेसरै काम तेसरै साथा दी औआ ई।” लौइणी 14 मुंइऐ देखौ, एक उज़ल़ौ बादल़ आ, और तेस बादल़ा माथै आदमी रै छ़ोहरु बाशीऐ कुण बोशौ औन्दौ आ, ज़ासरै मुंडा माथै सुनै रौ ताज़ और हाथा दी च़ोखी दाची आ। 15 तैबै औज़ौ एक सौरगदूतै परमेश्वरा रै घौरा कु निकल़ियौ तेसलै, ज़ुण बादल़ा माथै थौ बोशौ औन्दौ, बौड़ी बाच़ा दी हाकै मारीयौ बोलौ, “आपणी दाची लाइयौ लौउणौ शुरु कर, कैलैकि लौउणै रौ बौगत आशी ऐरौ आ, एथीलै कि धौतरी री फसल पाच़ी गोई आ।” 16 ता ज़ो बादल़ा माथै बोशौ औन्दौ थौ तिणीऐ धौतरी माथै आपणी दाची लाई, और धौतरी लौउणौ शुरु की एरी। 17 तैबै एक औज़ौ सौरगदूत तेस परमेश्वरा रै घौरा कु निकल़ौ ज़ो सौरगा दी आ, और तेसकै भी च़ोखी दाची थी। 18 तैबै एक औज़ौ सौरगदूत ज़ासकै आगी माथै हक्क थौ, बेदी कु निकल़ौ, और ज़ासकै च़ोखी दाची थी तेसलै उंच़ी बाच़ा दी बोलौ, “आपणी च़ोखी दाची लाइयौ धौतरी रै अंगुरा रौ जुबकु काट, कैलैकि सेऊ पाच़ी ऐरौ आ।” 19 तैबै तिणी सौरगदूतै धौतरी माथै आपणी दाची लाई और धौतरी रै अंगुरा रौ फल़ काटियौ आपणै परमेश्वरा रै रोशा रै बौड़ै रौसा रै कुण्डा दी पाई गौ। 20 और इलाकै कु बाइरै तेस रौसा रै कुण्डा दी अंगूर फैंच़ी गौऐ, और रौसा रै कुण्डा कु एतरौ लोऊ निकल़ौ कि घोड़ेऊ री लगामा झ़ांऊ पौउंच़ौ, और शौ कोसा झ़ांऊ बौई गौ। |
This work is licensed under Creative Commons Attribution-ShareAlike 4.0 License.