प्रकाशित 12 - पहाड़ी महासुई

छ़ेउड़ी और बौड़ौ साप

¹ तैबै आसमाना दी एक बौड़ी निशाणी दिशी, मतलब एक छ़ेउड़ी ज़ुणिऐ सुरज थौ कौशटौ औन्दौ, और ज़ून तियांरै बांगणै थालै थी, और तियांरै मुंडा माथै बाराह तारेऊ रौ ताज़ थौ।

² सै गौरकड़ी हुई, और ज़ोरै-ज़ोरै औटाइया थी कैलैकि सै हौल़खिणै वाल़ी थी।

³ एक औज़ौ निशाणी आसमाना दी दिशी। और देखौ एक लाल रौंगा रौ अजगर थौ, ज़ासरै सात मूंड और सात शींग थै, और तेसरै मुंडा माथै सात राज़ा रै ताज़ थै।

⁴ तेसरी पूंछ़ै आसमाना रै तारेऊ री एक तिहाई रौ हिस्सौ झिड़ियौ धौतरी माथै पाई गौ, और सेऊ अजगर तिऐं छ़ेउड़ी काऐ ज़ो हौल़खिणै वाल़ी थी, खौड़ौ हुऔ ताकी ज़ैबै सै हौल़खिया ली ता तिंआरौ छ़ोहरु पोरु खाआ।

⁵ तैबै तियांरौ छ़ोहरु हुऔ ज़ो लोहै रै डिंगै कौरीऐ सौभी ज़ाती माथै राज़ कौरणै वाल़ौ थौ, और तिंआरौ सेऊ मांऊ तेबी ई परमेश्‍वरा काऐ और तेसरी राज़गाद्दी काऐ च़ुंगियौ नींई ऐरौ।

⁶ और सै छ़ेउड़ी तिऐं शुनशान ज़ागाह लै भागी गोई ज़ो परमेश्‍वरै तिंया कालै त्यार थी की ऐन्दी, कि तिऐ सै एक हज़ार दुई शौ साठ दिना झ़ांऊ पौल़ा-बौड़ा।

⁷ तैबै सौरगा दी लौड़ाई हुई, मीकाईल सौरगदूत और तेसरै सौरगदूत अजगरा आइलै लौड़णा लै निकल़ै। और अजगर और तेसरै दूत तेस आइलै लौड़ै,

⁸ पर सै नाईं ज़ितै, और सौरगा दी तिऊं कालै औज़ौ ज़ागाह नाईं रौई।

⁹ तैबै सेऊ बौड़ौ अजगर, मतलब सेऊ पुराणौ साप ज़ासलै इबलीस और शैतान बोलाई और सारौ सण्सार बहकाउणै वाल़ौ आ, धौतरी माथै लोटाल़ौ। और तेसरै दूत भी तेसी आइलै लोटाल़ै।

¹⁰ तैबै मुंइऐ सौरगा कु एज़ी बौड़ी हाक आशदै शुणी, कि आबै आमारै परमेश्‍वरा रौ छ़ुटकारौ और तागत और राज़्य और तेसरै मसीहा रौ हक्क पौगड़ौ हुऔ आ, कैलैकि आमारै भाईऊ माथै आरोप लाइणै वाल़ौ, ज़ो राच-दीन आमारै परमेश्‍वरा काऐ तिऊं माथै आरोप ला थौ, लोटाल़ी गौ।

¹¹ और सै गाबड़ु रै लोऊ री वज़ाह कु और आपणी गवाही रै वचना री वज़ाह कु तेसकु ज़िते ई, और तिंउऐ आपणै प्राण आच़्छ़ै नाईं ज़ाणै, इदरा झ़ांऊ कि मौत भी सहन की ई।

¹² एथीलै, ओ सौरगा, और तेथदी रौइणै वाल़ेउओ, मौगन रौऔ। ओ धौतरी, और समुन्दर, तुमुलै फिटकार! कैलैकि शैतान बौड़ै रोशा कौरी तुमु काऐ उतरियौ आशौ आ। कैलैकि ज़ाणा आ कि तेसरौ थोड़ौ ज़ेई बौगत औज़ौ रौ औन्दौ।

¹³ ज़ैबै अजगरै सौमझ़ौ की हाऊं धौतरी माथै शोटी गोअऊ, ता तिऐं छ़ेउड़ी पिछ़ु भागौ ज़ासरौ छ़ोहरु हुऔ थौ।

¹⁴ पर तिऐं छ़ेउड़ी कै बौड़ै उकाबा रै दुई पांखै दै, कि अजगरा काऐ कु उड़ियौ शुनशान ज़ागाह दी पौउंच़ा, ज़िऐ सै आधै बौगता झ़ांऊ धाचिआ।

¹⁵ और अजगरै तिऐं छ़ेउड़ी पिछ़ु आपणै मुंआ कौरी नौईं ज़िणौ पाणी बहाऔ, ताकी तिंआ छ़ेउड़ी एज़ी नौईं कौरी बाहावा।

¹⁶ पर धौतरीऐ तिऐं छ़ेउड़ी री मज़द की ई। और आपणौ मूंह खोलियौ तिऐं नौईं रौ पाणी ज़ो अजगरै आपणै मुंआ कौरी बहाऔ थौ, पीई गौ।

¹⁷ तैबै अजगर तिऐं छ़ेउड़ी लै रोशुऔ, और तिंआरी बौच़ी ऐन्दी औलादा काऐ, ज़ो परमेश्‍वरा रौ हुकम मानणा लै और यीशु री गवाही दैणा लै मज़बूत ई, लौड़दै डैऔ।

¹⁸ और सेऊ समुन्दरा रै बाल़ु माथै खौड़ौ हुऔ।