मरकुस 4 - पहाड़ी महासुई

बीजा बौइणै वाल़ै रौ औनैणौ

¹ तेत बासिऐ यीशु तौंइऐ गलील झ़िला रै डिका काऐ शिक्षा दैंदै लागौ। तिऐ यीशु काऐ एती बौड़ी भीड़ कौठै हुई, कि यीशुऐ झ़िला दी एकी किश्ती दी पा पौड़ौ बोशणौ। और लोगु री भीड़ बोशी झ़िला रै डिका काऐ।

² यीशु तिऊं काऐ काआणी शुणाइयौ भौरी बुशै लागौ शिखाउंदै। तिणीऐ शिक्षा दैंदी बारै तिउंलै बोलौ,

³ “इऐं काआणी शुणौ। एक ज़िमदार बीजा बौइंदै निकल़ौ।

⁴ बीजा बौइंदी बारै कुछ़ बीज छ़ुटौ बाटा दी, सौ च़ुणौ च़ौड़कुऐ।

⁵ कुछ़ बीज फोकुऔ पथरिल़ी ज़मीना दी पर भौरी माटौ ना मिलणै री वज़ाह कु सौ बीज ज़ल्दी ता ज़ौमौ,

⁶ ज़ैबै ताती रूड़ लागी तैबै सै आंगुरै शुकै पोरु।

⁷ और कुछ़ बीज पौड़ौ झ़ाड़िऊ मांझ़िऐ। ज़िणी सौ बीज बौड़िंदै लागौ मातौल़ै दबाऔ झ़ाड़िउऐ। एज़ै कारण सौ बीज नाईं फौल़ौ।

⁸ पर कुछ़ बीज पौड़ौ आच़्छ़ै माटै माथै। सौ ज़ौमौ और ज़ौमियौ भौरी फौल़ौ। कुछ़ फौल़ौ तीस पाथै, कुछ़ साठ पाथै, और कुछ़ शौ पाथै।”

⁹ तैबै यीशुऐ तिउंलै बोलौ, “तुमै मेरी काआणी रौ मतलब सौमझ़णौ च़ाहा ई, ता तुमै ध्याना देइयौ सुंच़ेऊ कि तुमै का शुणाई।”

औनैणै बोलणै रौ मकसद

¹⁰ तेत बासिऐ ज़ैबै सै भीड़ तिऐ काआणी शुणियौ वापिस डेई गोई थी, तैबै यीशु रै बारह च़ेलै और कुछ़ औज़ौ लोगुऐ यीशु काऐ आशीयौ पुछ़ौ, “इऐं काआणी शुणाउणै रौ मतलब का सा?”

¹¹ तैबै यीशुऐ तिउंलै ज़वाब दैऔ, “इबी झ़ांऊ लोग नाईं ज़ाणा थै कि परमेश्‍वर आशीयौ लोगु रै ज़िवा दी राज़ कौरा आ। पर तुमुकै ता एस भेता रै बारै दी मुंइऐ सब कुछ़ आ बोलौ औन्दौ, पर ज़ासरै ज़िवा दी परमेश्‍वरा रौ राज़ नाईं, इऐ काआणी तिऊं लोगु लै आ।”

¹² इऐ बुशै सौच़्च़ी ई, ज़ो यशायाह भविष्यवक्तै बोली आ कि, “ज़ो लोग देखा ता ई रौंगै, पर शिखदै नाईं, और शुणा ता ई रौंगै, पर सौमझ़दै नाईं, इणै लोग ना ता बौदल़िंदै, ना ता इउंलै माफी मिलदी।”

औनैणै रौ मतलब

¹³ तौंइऐ यीशुऐ तिउंलै बोलौ, “का तुमै इऐं काआणी रौ मतलब नाईं सौमुझ़दै? तैबै तिऊं सारी काआणी किणै कौरीऐ सौमझ़ा ई?

¹⁴ सौ बीजा बौइणै वाल़ौ ज़िमदार इणौ आ, ज़िणौ परमेश्‍वरा रौ वचन शुणाउणै वाल़ौ आ।

¹⁵ ज़ो बीज बाटा दी पौड़ौ आ तेथरौ मतलब आ कि कुछ़ लोग परमेश्‍वरा रौ वचन ता शुणाई, पर आपणै ज़िवा दी ना छ़ाड़दै। सै केबी भी ना फौल़दै। ज़िणौ च़ड़कु बीज च़ुणा आ, तिणौ शैतान खरकच़ार आशीयौ तिंउरै ज़िवा कु परमेश्‍वरा रौ वचन च़ोरा आ।

¹⁶ और ज़ो बीज पथरियाल़ी ज़मीना दी पौड़ौ थौ तेथरौ मतलब इणौ आ कि कुछ़ लोग परमेश्‍वरा रौ वचन शुणियौ खरकच़ार खुशी कौरीऐ माना ई।

¹⁷ पर ज़ैबै विश्वासा री वज़ाह कु केज़ौ भी कौष्ट या सताव आशा, तैबै फेटी फशटा ई। कैलैकि सै आपणै ज़िवा दी परमेश्‍वरा रौ वचन नाईं बसाल़दै।

¹⁸ और ज़ो बीज झ़ाड़िऊ मांझ़िऐ पौड़ौ थौ, सौ खौड़ी ना उखरांदौ। तेथरौ मतलब इणौ आ कि कुछ़ लोग परमेश्‍वरा रौ वचन ता शुणाई।

¹⁹ बासिऐ धौतरी री च़िन्ता दी, रुपाऐ पैसै, दुजी च़िज़ेऊ रै लाल़च़ाई फौसियौ परमेश्‍वरा रै विश्वासा दी नाईं बौड़दै।

²⁰ ज़ो बीज आच़्छ़ी ज़मीना दी पौड़ौ थौ सौ भौरी फौल़ा आ। तेथरौ मतलब इणौ आ कि कुछ़ लोग परमेश्‍वरा रौ वचन आच़्छ़ा कौरीऐ शुणाई और तेस वचना माथै च़ाला भी और विश्वासा दी बौड़ा ई। इणै आदमी तेस बीजा बाशीऐ ई ज़ो बीज तीस पाथै, साठ पाथै और शौ पाथै फौल़ौ आ।”

दिऐ रौ औनैणौ

²¹ तैबै यीशुऐ तिउंलै इणौ भी बोलौ, “का लम्प पलंगा थाल छ़ाड़ना लै आणाई या बाल्टी थाल? नाईं, पर एथलै आणाई कि घौरा भितै उंच़ी ज़ागाह दी छ़ाड़ियौ लोगु कै प्याशौ लागा।

²² कैलैकि कोई भी च़ीज़ छ़िपी औन्दी ना आसती, ज़ो पौगड़ौ ना कौरियाली, और ना ई कुछ़ छ़ुपौंदौ आसतौ, ज़ो उज़ाल़ै दी ना आणियालौ।

²³ तुमै इऐं बुशै सौमझ़णौ च़ाहा ई, ता शुणौ, और सुंच़ौ, ज़ो कुछ़ भी हाऊं बोलाऊ।”

²⁴ यीशुऐ तौंइऐ तिउंलै बोलौ, “ज़ो कुछ़ हाऊं तुमुलै बोलाऊ भौरी ध्याना देइयौ शुणौ कैलैकि परमेश्‍वर तुमुलै एथकु भी ज़ादी सौमझ़ दिया आ।

²⁵ ज़ासकै कुछ़ आसा आ, तेसकै औज़ौ भी मिला, पर ज़ासकै ज़ादौ नाईं आसतौ, तेसकै ज़ो थोड़ौ-बौहत आसा आ, सौभी नाईं रौइंदौ कैलैकि सै सौमुझ़दै नाईं।”

ज़ौमणै वाल़ै बीजा रौ औनैणौ

²⁶ यीशुऐ तिउंलै बोलौ, “परमेश्‍वरा रौ राज़ इणौ आ ज़िणौ केज़ै ज़िमदारै ज़मीना दी बीज बौऔ आ।

²⁷ बीजा बौइयौ कुछ़ दिना बासिऐ तिणीऐ देखौ कि सौ बीज़ ज़ौमियौ बौड़ौ हुऔ औन्दौ। तेसकै पौतौ भी ना लागौ कि इयौ किणौ हुऔ आ।

²⁸ ज़बीन आपु थी लागी औन्दी फसल पैदौ कौरदै। पैहलै निकल़ै आंगुरै, तेत बासिऐ सीलै, तेत बासिऐ सीलेऊ मांझ़िऐ त्यार गुल़ै।

²⁹ ज़ैबै फसल त्यार हुई तेबी तिणीऐ मुंज़ुरदार भेज़ै कैलैकि फसल काटणै रौ बौगत आशी गौ थौ।”

राई रै बीजा रौ औनैणौ

³⁰ यीशुऐ तिउंलै इणौ भी बोलौ, “हाऊं तुमु काऐ परमेश्‍वरा रै राज़ा रै बारै दी किणौ बोलु लै? केज़ै औनैणै देइयौ तेसरै बारै दी सौमझ़ाऊ लै?

³¹ परमेश्‍वरा रौ राज़ राई रै दाणै ज़िणौ आ। राई रौ बीज देखणा लै ता सारै छ़ोटै बीजा मांझ़िया कु भौरी छ़ोटौ हुआ सा।

³² पर ज़ेबी तेस बौआ ई, तैबै ज़ौमियौ सौ बीज एती बौड़ौ पौधौ बौणा कि च़ौड़कु भी तेस थाल आशीयौ बसेरौ कौरा ई।”

³³ यीशु इणै औनैणौ देई-देइयौ परमेश्‍वरा रौ वचन सौमझ़ावा थौ, ज़ेती तिऊं लोगु री सौमझ़ थी।

³⁴ यीशु बिणा औनैणै देइयौ तिउंलै कुछ़ भी शिक्षा नाईं दिया थै, पर ज़ेबी सेऊ और च़ेलै एखुली थै तैबै सेऊ तिऊं काऐ सारी बुशेऊ रौ मतलब बोला थौ।

बागुर शान्त कौरणौ

³⁵ सेज़ै दिना दी ज़ेबी ब्याल़ हुई, तैबै यीशुऐ आपणै च़ेलेऊ लै बोलौ, “आशौ आमै झ़िला पारभिलै डेई।”

³⁶ लोगु री भीड़ा छ़ाड़ियौ च़ेलै यीशु आइलै सेज़ी किश्ती दी डेवै ज़ेथदी यीशु पैहलै कु बोशौ औन्दौ थौ किश्ती नीईंयौ झ़िला पारभिलै डेवै। और तिऊं आइलै औज़ौ भी लोग काइयै किश्ती दी च़ाल पौड़ै।

³⁷ तेबी खरकच़ार भौरी तेज़ बागुर लागौ, इदरा झ़ांऊ कि पाणी रै छ़ालै कौरीऐ किश्ती भी पुरी भौरुई।

³⁸ तिंया ताकै यीशु किश्ती दी पिछ़ली भिलै शिराणै माथै मुंडा छ़ाड़ियौ सुतदै थौ लागौ औन्दौ। तैबै च़ेलेउऐ यीशु ज़गाऔ और डौरी-डौरीयौ यीशु लै बोलौ, “ओ गुरु! का तुमुकै फिकर ना आसती कि आमै डुबदै ई लागै औन्दै?”

³⁹ यीशु खौड़ौ हुऔ और आपणै हुकमा देइयौ बागुर और पाणी रै छ़ालै लै बोलौ, “शान्त हुऊ, पोरु घट!” इणै बोलदा बेर हुई बागुर शान्त हुऔ और पाणी रै छ़ालै तेबी ई बंद हुऐ।

⁴⁰ तैबै यीशुऐ च़ेलेऊ लै बोलौ, “तुमै कैलै डौरै ई? का तुमुकै आज़ा झ़ांऊ मुं माथै विश्वास ना हुऔ?”

⁴¹ सै च़ेलै भौरी डौरै और आपु मांझ़िऐ बोलदै लागै, “इयौ कुण औलौ इणौ पा? पाणी रै छ़ालै बागुर भी एसरौ हुकम माना ई।”