मरकुस 2 - पहाड़ी महासुई

अधरौंगा वाल़ौ आदमी च़ांगौ कौरणौ

¹ कुछ़ दिना बासिऐ यीशु कफरनहूम गांवा दी वापिस आशौ। लोगुऐ शुणौ कि यीशु एकी घौरा दी आ।

² तैबै तिऐ एतरै लोग भौरुऐ कि दारा काऐ भी ज़ागाह नाईं थी। यीशु तिऊं काऐ परमेश्‍वरा रै वचना शुणाउंदै थौ लागौ औन्दौ।

³ तैबै तिदै च़ार आदमीउऐ च़ुंगियौ एक इणौ आदमी आणौ ज़ासकै आपणै ज़िसमा रौ केज़ौ भी आंग नाईं हिलाइया थौ।

⁴ भौरी लोगु री भीड़ा ई तिउंकै यीशु काऐ नाईं पउंच़ुऔ। एज़ी ताईं तिंउऐ उपरै स्वाणै पारै च़ौड़ियौ तेस घौरा रै छ़ापरा कु कुछ़ ज़ाण्दै गाड़ीयौ बिस्तरै रै च़ार कुणै दी लोऊल़ी बानियौ सेज़ौ बिमार आदमी यीशु काऐ धौनी उतारौ।

⁵ तैबै यीशु तिऊं च़ार लोगु रौ विश्वास देखीयौ बिमार आदमी लै बोलौ, “ओ गोश्टण, तैरै पाप माफ हुई गोऐ ई।”

⁶ तैबै ज़ो तिऐ यहुदी शास्त्री थै बोशै औन्दै, सै आपणै मौना दी सुंच़दै लागै कि,

⁷ “एऊ यीशु इणौ कैलै बोला आ? इयौ परमेश्‍वरा री बुराई कौरा आ! पाप ता सिरफ परमेश्‍वर ई माफ कौरा सा?”

⁸ यीशुऐ खरकच़ार तिउंरै मौना री बुशै ज़ाणीऔ बोलौ, “तुमै आपणै मौना दी का ई लागै औन्दै सुंच़दै?

⁹ आसान का सा? बिमार आदमी लै इणौ बोलणौ कि, ‘तैरै पाप माफ हुई गोऐ’ या इणौ बोलणौ कि, ‘खौड़ौ उठ, आपणौ बिस्तरौ च़ुंग और आण्डदै लाग्ग?’

¹⁰ एथीलै तुमुकै देखाउणा लै कि पाप माफ कौरणै रौ हक्क मुकै आ, ज़ुण परमेश्‍वरा री तौरफा कु भेज़ौ औन्दौ,” तैबै यीशुऐ तेस बिमार आदमी देखीयौ बोलौ,

¹¹ “हाऊं ताउंलै बोलाऊ, खौड़ौ उठ, आपणौ बिस्तरौ च़ुंग और घौरै डेऊ।”

¹² तैबै सेऊ आदमी खरकच़ार सारै लोगु काऐ उठौ और आपणै बिस्तरै च़ुंगियौ बाइरै डैऔ। तिऐ सारै लोग इणै देखीयौ हैरान हुऐ और इणै बोलीयौ परमेश्‍वरा री बौड़ाई कौरी, कि “इणौ आमुऐ पैहलै केबी ना देखौ।”

लेवी औटाउणौ

¹³ यीशु तेस घौरा कु गलील झ़िला रै डिका काऐ डैऔ। तैबै लोगु री भीड़ यीशु काऐ डेई। यीशु लागौ तिऐ तिउंलै शिक्षा दैंदै।

¹⁴ तेत बासिऐ यीशु दुजी ज़ागाह दी डैऔ। तैबै यीशुऐ हलफई रौ छ़ोहरु देखौ ज़ासरौ नाऊं लेवी थौ। सौ मामलै निणै वाल़ेऊ रै आड्डै माथै थौ बोशौ औन्दौ। यीशुऐ तेसलै बोलौ, “मुं पिछ़ु आश।” तैबै सौ उठीयौ यीशु पिछ़ु लागौ आण्डदै।

¹⁵ एकी दिनै तिणी मामलै निणै वाल़ै लेवीऐ यीशु आपणै घौरा दी रोटी खांदै औटाऔ। मामलै निणै वाल़ै और पापी लोग भी बोशै रोटी खांदै कैलैकि सै यीशु पिछ़ु च़ाला थै, यीशु रै च़ेलेऊ आइलै।

¹⁶ यहुदी शास्त्री ज़ासलै फरीसी भी बोला थै कैलैकि सै आपुलै धौर्मी सौमझ़ा थै, तिंउऐ देखौ कि यीशु मामलै निणै वाल़ेऊ और पापी लोगु आइलै रोटी खांदै लागौ औन्दौ। तैबै तिंउऐ यीशु रै च़ेलेउलै बोलौ, “यीशु कैलै खा सा इऊं मामलै निणै वाल़ेऊ और पापी लोगु आइलै रोटी?”

¹⁷ यीशुऐ इणै शुणियौ तिउंलै बोलौ, “भौलै-च़ांगेउ लै डाक्टरा री ज़ुरत नाईं औन्दी, पर बिमार लोगु लै डाक्टरा री ज़ुरत हुआ सा। हाऊं धौर्मी लोगु नाईं बल्कि पापी लोगु औटाउंदै ऊ आशौ औन्दौ।”

ब्रौता रौ सवाल

¹⁸ यहुन्ना बपतिस्मौ दैणै वाल़ै रै च़ेलै और फरीसी थै ब्रौत कौरदै लागै औन्दै। तैबै सै यीशु काऐ आशीयौ यीशु लै बोलदै लागै, “यहुन्ना रै च़ेलै और फरीसी रै च़ेलै ता कौरा ई ब्रौत। पर तुमारै च़ेलै ब्रौत नाईं कौरदै। इणौ कैलै सा?”

¹⁹ यीशुऐ तिउंलै बोलौ, “ज़ेबी झ़ांऊ लाड़ौ साथा दी हुआ, का बराती ब्रौत कौरदै लागा ई? ज़ेबी झ़ांऊ लाड़ौ बरातीउ आइलै हुआ, सै खुश हुआई। एथीलै तिउंकै ब्रौत कौरणै री कोई ज़ुरत नाईं

²⁰ पर सेज़ै दीन आशालै, ज़ेबी लाड़ौ तिऊंकु अलग कौरालै, सेज़ै बौगता दी सै ब्रौत कौरा ई।”

²¹ यीशुऐ इणौ भी बोलौ, “केज़ौ भी आदमी नौऐं जुड़कै रौ टालकौ पुराणै जुड़कै दी नाईं लाइंदौ। नाईं ता धोइदीं बारै सेऊ नौऐं जुड़कै रौ टालकौ तेस पुराणौ जुड़कौ पोरु थोसियौ ज़ादड़ौ च़ीरा सा।”

²² यीशुऐ तिउंलै इणौ औनैणौ भी दैऔ, “कोई भी आदमी अंगुरा री सूर चाणना लै ताज़ै अंगुरा रौ रस पुराणै खाल़ढै दी नाईं छ़ाड़दौ। नाईं ता अंगुरा रौ रस दख बौगता बासिऐ फैलीयौ तेस पुराणौ खाल़ढौ भी पोरु च़ीरा, ज़ेथ कौरीऐ अंगुरा रौ रस और खाल़ढौ दुइया बरबाद हुआई। एथीलै ताज़ै अंगुरा रौ रस नौऐ खाल़ढै दी भौराई।”

आरामा रै दिना रौ भी प्रभु

²³ इणौ हुऔ कि एकी दिनै यीशु आपणै च़ेलेऊ आइलै आरामा वाल़ै दिना दी डोखरेऊ दी थौ लागौ औन्दौ डेउंदै। यीशु रै च़ेलेऊ कै थी भूख लागी औन्दी। तेस डोखरै दी थै गीऊं बौऔ औन्दै, सै च़ेलै लागै तिऊं गीऊं सै सीला चोड़ियौ खांदै।

²⁴ तैबै फरीसीउऐ यीशु लै बोलौ, “देखौ। ज़ेज़ौ काम आरामा रै दिना दी कौरणौ मौना सा, सेज़ौ काम तुमारै च़ेलै कैलै कौरा ई?”

²⁵ यीशुऐ तिउंलै बोलौ, “धौर्म शास्त्रा दी तुमुऐ ज़ुरुर पौढ़ौ औलौ कि ज़ेबी राज़ौ दाऊद और तेसरै साथी भुखै थै, तिउंकै खाणा लै कुछ़ भी नाईं थौ, तैबै दाऊदै का कियौ?

²⁶ आपणी ज़ुरता लै परमेश्‍वरा रै ताम्बु दी अबियातार नावां रै परधान याजका काऐ डेइयौ और तिऐ परमेश्‍वरा लै चड़ाई औन्दी भोगा री रोटी खाई और आपणै साथीऊ लै भी देई, ज़ो सिरफ याजक ई खा थै।”

²⁷ यीशुऐ तिउंलै इणौ भी बोलौ, “परमेश्‍वरै आरामा रौ दीन आमारै फाइदै लै चाणौ आ, ना कि आदमी आरामा रै दिना रै नियम मानणा लै चाणौ।”

²⁸ यीशुऐ इणौ भी बोलौ, “हाऊं आदमी रौ छ़ोहरु आरामा रै दिना रौ भी प्रभु ऊ।”