मरकुस 15 - पहाड़ी महासुई

पिलातुसा काऐ यीशु

¹ दोउत राची यहुदी शास्त्री, बौड़ै याजक और स्याणै लोग, ज़ो यहुदी फैसलै कौरणै वाल़ी खुंबल़ी रै ज़ौणै थै। तिंउऐ आपु मांझ़िऐ चौपड़ुइयौ यीशु तिदरु बानियौ पिलातुसा काऐ नियौं। (पिलातुस यहुदा परदेशा दी रोमी सरकारा रौ बौड़ौ आफसर थौ)

² पिलातुसै यीशु कु पुछ़ौ, “का तू यहुदी लोगु रौ राज़ौ ई?” यीशुऐ ज़वाब दैऔ, “ओ! तुमै ता आपु ई बोलदै लागै औन्दै।”

³ तैबै बौड़ै याजक यीशु माथै भौरी कुछ़ गलत आरोप लाइंदै लागै।

⁴ पिलातुसै यीशु कु औज़ौ पुछ़ौ, “का तू ज़वाब नाईं दैंदौ? इऐ लोग तैरै विरोधा ई भौरी कुछ़ ई बोलदै लागै औन्दै।”

⁵ तैबै भी यीशुऐ कुछ़ ना बोलौ। यीशु रै च़ुटुक रौइणै कु पिलातुस भौरी हैरान हुऔ।

मौरणै री सौज़ा रौ हुकम

⁶ हर साल ज़ैबै यहुदी लोग फसह रौ साज़ौ मौनावा थै तैबै रोमी सरकारा री तौरफा कु यहुदी लोगु रै बोलणै माथै एक कैदी आज़ाद हुआ थौ।

⁷ सेज़ै बौगतै बरअब्बा नावां रौ एक आदमी ज़ो कैदीऊ आइलै कैदा ई बन्द थौ, ज़ुणिऐ झ़ौगड़ै कौरदी बारै एकी रौ खून कियौ थौ।

⁸ तैबै सारी भीड़ पिलातुसा काऐ आगुड़ै डेइयौ तेसलै बोलदै लागै कि, “ज़िणौ तुमै हर साल कौरा ई। एज़ी बारै भी तिणौ कौरौ। आमुलै एक कैदी आज़ाद कौरौ।”

⁹ पिलातुसै तिउंलै ज़वाब दैऔ, “का तुमै च़ाहा ई कि हाऊं तुमुलै एस यहुदिऊ रौ राज़ौ आज़ाद कौरु?”

¹⁰ सेऊ ज़ाणा कि बौड़ै याजक लोग यीशु री मीश कौरा ई और सेऊ तैबै इऐ पकड़ाऔ आ।

¹¹ बौड़ै याजकुऐ भीड़ा रै लोगु लै बोलौ कि यीशु नाईं बल्कि बरअब्बा नावां रौ कैदी मांगौ। तैबै भीड़ा रै लोग मांगदै लागै कि बरअब्बा नावां रौ आदमी आज़ाद कौरौ।

¹² तैबै पिलातुसै पुछ़ौ कि, “हाऊं यहुदी लोगु रै राज़ै रौ का कौरु?”

¹³ भीड़ा रै लोगुऐ ज़ोरै बोलौ, “तेस झ़ांगणा लै क्रुसा माथै च़ड़ाऔ”

¹⁴ पिलातुसै बोलौ, “कैलै? तिणीऐ का बुरौ कियौ आ?” पर सै लोग औज़ौ भी ज़ोरै-ज़ोरै बोलदै लागै कि, “एस क्रुसा माथै च़ौड़ाऔ।”

¹⁵ तैबै पिलातुसै भीड़ा रै लोग खुश कौरना लै बरअब्बा नावां रौ कैदी आज़ाद कियौ। और यीशु रोमी सिपाईउ कै कोड़ै लाइणा लै और क्रुसा दी च़ड़ाउणा लै सांबी ऐरौ आ।

रोमी सिपाईउ रै ज़ौरिऐ यीशु री बेइज़्ज़ती

¹⁶ रोमी सिपाईउ ऐ यीशु पिलातुसा रै मैहला री खोल़ी भितै निऔं। तिऐ तिंउऐ सारै सिपाई कौठै कियै।

¹⁷ तैबै यीशु रौ मज़ाक उड़ाउणा लै यीशु कै एक बैंगनी रौंगा रौ च़ोगौ भिड़ाऔ ज़िणौ राज़ै लोग भीड़ा थै। और तिंउऐ यीशु रै मुंडा दी काँडेऊ रौ एक ताज़ बेलियौ लाऔ।

¹⁸ तैबै सै लोग “यहुदिऊ रै राज़ै री ज़ै ज़ै” बोलीयौ यीशु रौ मज़ाक उड़ाउंदै लागै।

¹⁹ सिपाई घौड़ी-घौड़ीयै यीशु मुंडा दी छिवांटी री लाइंदै लागै। और यीशु माथै थुकदै भी लागै। और सै मज़ाका दी यीशु रै सामनै धौनी झुकियौ ढाल कौरदै लागै

²⁰ ज़ैबै तिंउऐ आच़्छ़ा कौरीऐ मज़ाक उड़ाऔ तैबै सिपाइउऐ सै बैंगनी रौंगा रै जुड़कै उतारीयौ तेसकै तेसी रै जुड़कै भिड़ाऐ। और क्रुसा माथै च़ड़ाउणा लै तेस शहरा कु बाइरै निऔं।

यीशु क्रुसा माथी च़ौड़ाउणौ

²¹ यीशु क्रूस आपणै काछ़ा माथै च़ुंगियौ आण्डदै थौ लागौ औन्दौ। तैबै बाटा दी सिपाइउऐ एक आदमी पाकड़ौ ज़बर ज़ौस्ती तेसकु क्रूस च़ुंगाउणै भेज़ौ। सौ आदमी कुरेन नावां रै शहरा रौ रौइणै वाल़ौ थौ। सौ गांवा कु आशदै थौ लागौ औन्दौ। तेस आदमी रौ नाऊं शमौन थौ ज़ो सिकन्दर और रूफुस नावां रै दुई छ़ोहरु रौ बाब थौ।

²² क्रुसा माथै च़ड़ाउणा लै एक ज़ागाह थी ज़ासरौ नाऊं गुलगुता थौ। गुलगुता रौ मतलब आ खोपड़ी ज़िणी ज़ागाह। तिंउऐ यीशु तिऐ आणौ।

²³ क्रुसा माथै च़ड़ाउणा कु पैहलै बेदणी मिटाउणा लै तिंउऐ अंगुरा रै रसा दी मुर्र नावां री ज़ौड़ी-बुटी मिलाइयौ यीशु लै पिलाउणा री कोशिश की पर यीशुऐ नाईं पियौ

²⁴ तैबै तिंउऐ यीशु क्रुसा माथै च़ौड़ाऔ। और तेसरै जुड़कै बांटणा लै कि कासकै का मिला आ चिट्ठी पाई।

²⁵ दोअती लगभग नौ बाज़ै तिंउऐ यीशु क्रुसा माथै च़ड़ाऔ।

²⁶ क्रुसा माथै एक तख्ती भी टांगी ज़ासदी यीशु लै लिखौ औन्दौ थौ कि, “यहुदी लोगु रौ राज़ौ।”

²⁷ यीशु आइलै दुई डाकु भी थै ज़ो अलग अलग क्रुसा माथै थै च़ड़ाऐ औन्दै। एक थौ यीशु री सुल़टी भिलै और एक थौ उल़टी भिलै।

²⁸ ज़िणौ पवित्रशास्त्रा दी भौरी पैहलै यीशु रै बारै दी भविष्यवाणी कौरीयौ लिखौ थौ कि, “सौ कैदीऊ मांझ़िऐ गिणौ आ,” सेज़ौ वचन पुरौ हुऔ आ।

²⁹ तिऐ बाटा दी आशणै-डेउणै वाल़ै लोग भी यीशु री बेइज़्ज़ती थै कौरदै लागै औन्दै। सै आपणै मुंडा हिलाई-हिलाइयौ थै बोलदै लागै औन्दै कि, “आड़ै, परमेश्‍वरा रौ घौर ढाल़ीयौ चिजै दिना दी तेस चाणनै वाल़ौ!

³⁰ आबै क्रुसा कु उतरियौ देखाऊ और आपु ता बौच़।”

³¹ तिणी ई यहुदी शास्त्री और बौड़ै याजक भी यीशु रौ मज़ाक उड़ाइयौ बोलदै लागै कि, “इणीऐ ता दुजै लोग बौच़ाऐ ई आबै आपु ना बौच़ी बौल़दौ।

³² इयौ आपुलै मसीह और इस्राइला रौ राज़ौ माना आ। अगर इयौ आमारै सामनै क्रुसा कु उतरा लौ ता आमै भी एस माथै विश्वास कौरी ई।” यीशु आइलै ज़ो दुइया भिलै डाकु थै टांगै औन्दै सै भी यीशु रौ मज़ाक उड़ाउंदै थै लागै औन्दै।

यीशु रै प्राण छ़ाड़णै

³³ दुसै लगभग बारह बाज़ै सारै देशा दी न्यारौ हुऔ और चिआ घंटै झ़ांऊ न्यारौ थौ।

³⁴ दुसकै चिआ बाज़ै यीशुऐ ज़ोरै आपणी बोली दी बोलौ, “इलोई, इलोई लमा शबक्तनी?” ज़ासरौ मतलब आ, “मैरै परमेश्‍वर! मैरै परमेश्‍वर! ताऐं हाऊं कैलै छ़ाड़ी ऐरौ ऊ?”

³⁵ तिऐ ज़ो लोग खौड़ै थै, कुछ़ लोगुऐ इणै शुणियौ गलत सौमझ़ियौ बोलौ, “शुणौ! इयौ एलियाह भविष्यवक्ता लै आ औटाइंदै लागौ औन्दौ।”

³⁶ एक आदमी फेटा मारीयौ एक स्याइचूश सिरकै दी भिज़ाइयौ एक लाम्बै डिंगै दी बानियौ यीशु लै दैऔ ताकी यीशु तेस चुशियौ पिया। तिणीऐ बोलौ कि, “देखी एरी कि एलियाह गुरु एस क्रुसा कु उतारदै आशा कि नाईं।”

³⁷ यीशुऐ औज़ौ राड़ मारी और तेबी प्राण छ़ाड़ै।

³⁸ तिंया ताकै परमेश्‍वरा रै घौरा भितै सारेऊ कु शुद्ध ज़ागाह दी सामनै ज़ो पौरदौ थौ, सेऊ माथा कु तौल़ झ़ांऊ च़ीरुइयौ दुई भिलै हुऔ।

³⁹ यीशु काऐ ज़ो रोमी सिपाईउ रौ आफसर थौ तिणीऐ देखौ कि, यीशु किणौ मौरौ आ, तैबै तिणीऐ बोलौ, “सौच़्च़ी ई, इयौ आदमी परमेश्‍वरा रौ छ़ोहरु थौ।”

⁴⁰ कुछ़ छ़ेउड़ी दुरा कु थी लागी ऐन्दी देखदै। इऐ छ़ेउड़ी गलील परदेशा कु थी यीशु आइलै यरुशलेमा दी आशी औन्दी, तिऊं मांझ़िऐ मगदल गांवा री एक मरियम थी और दुजी याकूब और योसेसा री आमा मरियम थी, और सलोमी नावां री एक छ़ेउड़ी भी थी।

⁴¹ औज़ौ भी मोकती छ़ेउड़ी थी तिऐ। ज़ेबी यीशु गलील परदेशा दी थौ तेबी इऐ सारी छ़ेउड़ी तेस पिछ़ु डेइयौ तेसरी सेवा कौरा थी।

यीशु ओडाच़ी दी छ़ाड़णौ

⁴² ज़ैबै ब्याल़ हुई एरी ता एथीलै कि तैयारी रौ दीन थौ, ज़ो आरामा रै दिना कु एक दीन पैहलै हुआ थौ।

⁴³ तेबी अरमतिया रै रौइणा वाल़ौ युसुफ आशौ ज़ो बौड़ी खुंबल़ी रौ खास ज़ौणौ थौ और आपु भी परमेश्‍वरा रै राज़ा री बाट लोड़ा थौ तिणीऐ हिम्मत छ़ाड़ियौ पिलातुसा कु यीशु रौ मौड़ौ मांगौ।

⁴⁴ पिलातुस हैरान हुऔ कि यीशु एती शिगरी किणौ मौरौ आ। तैबै तिणीऐ सेऊ आफसर औटाऔ ज़ुणिऐ यीशु क्रुसा माथै च़ड़ाऔ थौ। पिलातुसै आफसरा कु पुछ़ौ का यीशु मौरी गौ आ?

⁴⁵ ज़ेबी तिणी रोमी सिपाईउ रै आफसरै बोलौ कि यीशु मौरी गौ आ तैबै पिलातुसै यीशु रौ मौड़ौ निणै दैऔ।

⁴⁶ तैबै युसुफै लाठै रौ कापड़ौ खरीदियौ आणौ। और यीशु रौ मौड़ौ क्रुसा कु धौनी गाड़ीयौ तेस लाठै दी मेटौ और तैबै एक ओडाच़ी दी छ़ाड़ौ ज़ो ढोकै दी काटियौ थी चाणी ऐन्दी और सै ओडाच़ी एक बौड़ै पात्थरा कौरीऐ बंद कौरी।

⁴⁷ मगदल गांवा री मरियम, और योसेसा री आमा मरियम, दुइया देखदै थी लागी औन्दी कि यीशु रौ मौड़ौ किऐ छ़ाड़ाई।