मरकुस 11 - पहाड़ी महासुई

यीशु रौ यरुशलेमा दी ज़ीत आशणी

¹ यीशु और तेसरै च़ेलै यरुशलेम शहरा कु दख पिछ़ुड़ै जैतून नावां री पहाड़ी दी पौउंच़ै। तिऐ दुई गाऊं थै, ज़ासरै नाऊं बैतफगै और बैतनिय्याह थै। तैबै यीशुऐ आपणै च़ेलेऊ मांझ़िऐ कु दुई च़ेलै इणै बोलीयौ भेज़ै कि

² “आपणै सामनै वाल़ै गाऊं दी डैयौ तिऐ पौउंच़ियौ तेबी तुमुकै खाम्बै दी एक गौधेटु मिला बानौ औन्दौ ज़ास माथै इबी झ़ांऊ कोई ना बोशौ। तेस खोलिऔ ओरु आणेऊ।

³ अगर तुमु कु कुण पुछ़ा लौ, ‘एस खोलियौ केशी निआं ई?’ तैबै तुमै बोलीयौ, ‘एसरी प्रभु कै ज़ुरत आ। प्रभु एस गौधेटु शिगरी ई भेज़ा ओरु।’ ”

⁴ तैबै सै च़ेलै डेई गौऐ। डेइयौ तिंउऐ बाटा काऐ एक घौरा रै दारा दी एक गौधेटु देखौ बानौ औन्दौ। तैबै च़ेलै तेस गौधेटु काऐ डेइऔ तेस खोलदै लागै।

⁵ तिऐ ज़ेज़ै लोग थै सै च़ेलेऊ लै बोलदै लागै कि, “तुमै का कौरा ई? एस गौधेटु कैलै खोलाई?”

⁶ यीशुऐ ज़िणौ तिउंलै बोलौ थौ तिंउऐ तिणौ बोलौ तिऊं लोगु लै। इणौ शुणियौ तिऊं आदमीऐ सेऊ गौधेटु निणै दैऔ।

⁷ च़ेलेऊ ऐ सेऊ गौधेटु यीशु काऐ आणौ तेस माथै आपणै जुड़कै बिछ़ाऐ। तैबै यीशु तेस गौधेटु माथै बोशौ।

⁸ डेउंदै-डेउंदै भौरी लोगुऐ आपणै-आपणै शौल, च़ादरु बाटा दी बिछ़ाऐ। कुछ़ लोगुऐ ता डोखरै दी डेइयौ हौरी-हौरी डाल़ी आणी काटियौ, तैबै बिछ़ाई यीशु रै स्वागता लै बाटा ई धौनी। (ज़िणौ खास लोगु रै स्वागता लै यहुदी लोग कौरा ई)

⁹ ज़ो लोग यीशु आइलै औगाड़िऐ-पिछ़ाड़िऐ थै लागै औन्दै आण्डदै सै ज़ै ज़ै कार कौरदै लागै कि, “होसाना! तुमै प्रभु रै नाऊं कौरीऐ आशै ई। तुमारी ज़ै ज़ै हो!

¹⁰ ज़िणौ पुराणै ज़मानै दी दाऊद राज़ौ थौ, तुमै भी आमारै राज़ै ई। होसाना! सौरगा दी परमेश्‍वरा री बौड़ाई हो!”

¹¹ तैबै यीशु यरुशलेमा शहरा दी पौउंच़ौ। तिऐ सेऊ परमेश्‍वरा रै घौरा दी डैऔ। और तिणीऐ तिऐ सारौ कुछ़ देखौ। और आपणै च़ेलेऊ आइलै राच बिताउंदै शहरा कु बाइरै बैतनिय्याह गाऊं दी आशौ, कैलैकि तेबी ब्याल़ हुई गोई थी।

बिणा फौल़ा रौ फेड़ु रौ पेड़

¹² दुजै दिनै यीशु और तेसरै च़ेलै बैतनिय्याह गांवा कु यरुशलेम शहरा लै डेउंदै लागै। बाटा दी डेउंदै-डेउंदै लागी यीशु कै भूख।

¹³ दख दूर यीशुऐ एक फेड़ु रौ पेड़ देखौ ज़ो हौरौ भौरौ थौ। यीशुऐ सुंच़ौ कि एस पेड़ा कु कुछ़ खाणा लै मिला लौ। ज़ेबी यीशु तेस पेड़ा काऐ डैऔ, यीशु कै तेस पेड़ा दी पाचा-पाच मिलै। तेस पेड़ा दी फौल़ नाईं थै कैलैकि सेऊ बौगत फौल़ा रौ नाईं थौ।

¹⁴ यीशुऐ तेस पेड़ा देखीयौ तेसलै बोलौ, “आज़ा कु तैरौ फल़ कोई ना खान्दौ कैलैकि तू आज़ा कु नाईं फौल़दौ।” इऐ बूश च़ेलेउऐ भी शुणी।

परमेश्‍वरा रै घौरा कु सामाना बेच़णै वाल़ै गाड़नै

¹⁵ तैबै यीशु और तेसरै च़ेलै यरुशलेम शहरा दी आशै। सेऊ तिऐ परमेश्‍वरा रै घौरा ई डैऔ। तिऐ खौल़ै दी कुछ़ लोग समाना बेच़दै थै लागै औन्दै। यीशु तिऊं समाना बेच़णै वाल़ै लोगु बाइरै गाड़दै लागौ, पैसेऊ री औदल़ी-बौदल़ी कौरणै वाल़ेऊ री भी यीशुऐ रेढ़ी पौल्टी। तिऐ ज़ेज़ै लोग भैंटा च़ौड़ाउणा लै कबुतर और दुजी च़ीज़ बेच़ा थै तिंउरै बोशणै रै पाटड़ै भी पोरु पौल्टै।

¹⁶ यीशुऐ केज़ौ भी आदमी समाना कौरी खौल़ै बाटीऐ नाईं दै डेउणै।

¹⁷ तैबै यीशु शिक्षा दैंदै लागौ कि, “धौर्म शास्त्रा ई इणौ आ लिखौ औन्दौ कि ‘मैरौ घौर सारी ज़ातीऊ रै लोगु कालै प्राथना कौरणै रौ घौर आ।’ पर तुमुऐ ता ज़ादै पैसेऊ लै समाना बेच़ीयौ एऊ लुटणै वाल़ेऊ रौ आड्डौ चाणी ऐरौ आ।”

¹⁸ इणै शुणियौ बौड़ै याजक, और यहुदी शास्त्री लोग यीशु झ़ांगणै रै बारै दी सुंच़दै लागै। कैलैकि सै तेस देखीयौ डौरा थै, कि सारै लोग तेसरी शिक्षा शुणियौ हैरान थै।

¹⁹ ब्याल़कै, न्यारै हुईऔ, यीशु और तेसरै च़ेलै तेस शहरा छ़ाड़ियौ वापिस बैतनिय्याह गांवा लै डिआ थै।

शुकै औन्दै फेड़ु रै पेड़ा कु शिक्षा

²⁰ दुजै दिनै यीशु और तेसरै च़ेलै यरुशलेम शहरा भिलै थै डेउंदै लागै औन्दै। तिदै बाटा दी तिंउऐ सेऊ फेड़ु रौ पेड़ ज़ौड़ी कु शुकौ औन्दौ देखौ, ज़ासलै यीशुऐ फिटकार दैऔ थौ।

²¹ पतरसा कै याद आशौ कि यीशुऐ तेस पेड़ा लै का बोलौ थौ। तैबै पतरसै यीशु लै बोलौ, “ओ गुरु देख! एज़ौ फेड़ु रौ पेड़, ज़ासलै तुमुऐ फिटकार दैऔ थौ, एऊ शुकी गौ आ।”

²² यीशुऐ बोलौ, “तुमै हैरान कैलै हुआई? परमेश्‍वरा माथै विश्वास कौरौ।

²³ हाऊं तुमुलै सौच़्च़ौ बोलाऊ कि ज़ुण इऐं पहाड़ी लै बोलालौ कि, तू उठ, समुन्दरा दी डेऊ। और सै शक ना कौरालै आपणै ज़िवा दी, पर आपु कौरालै इणौ विश्वास कि ज़िणौ मुंइऐ बोलौ आ तिणौ हुऔ आ, तैबै परमेश्‍वर तेसलै तिणी ई कौरा आ।

²⁴ कैलैकि हाऊं तुमुलै बोलाऊ कि ज़ो कुछ़ तुमै प्राथना दी मांगा ई, विश्वास कौरौ कि सेऊ तुमुलै मिली ऐरौ आ तैबै परमेश्‍वर तुमुलै तिणी कौरा आ।”

²⁵ यीशुऐ औज़ौ बोलौ कि, “ज़ेबी तुमै प्राथना कौरना लै त्यार हुआई, अगर तेबी तुमुकै याद आशा कि कुणिऐ तुमुलै बुरौ कियौ आ, तैबै पैहलै तेस माफ कौरौ ताकी सौरगा रौ परमेश्‍वर भी तुमारै पाप माफ कौरा।

²⁶ अगर तुमै दुजेउरी गौलती माफ नाईं कौरालै, तैबै परमेश्‍वर भी तुमारै पाप माफ नाईं कौरदौ।”

यीशु रै हक्‍का माथी सवाल

²⁷ तैबै यीशु और तेसरै च़ेलै यरुशलेम शहरा दी आशीयौ परमेश्‍वरा रै घौरा रै खौल़ा ई डैऔ। तिऐ यहुदी शास्त्री, बौड़ै याजक और स्याणै लोग तेस काऐ आशै।

²⁸ सै यीशु कु स्वाल पुछ़दै लागै कि, “ज़ो कुछ़ ताइंऐ ईज़ कियौ आ, एऊ केज़ै हक्‍का कौरी कौरौ आ? इणै कौरणै रौ हक्क ताउंकै कुणिऐ दैऔ आ?”

²⁹ तैबै यीशुऐ तिउंलै बोलौ, “हाऊं भी तुमु कु एक स्वाल पुछ़ाऊ, तुमै पैहलै तेस स्वाला रौ ज़वाब दैऔ, तैबै हाऊं भी तुमुलै बोलाऊ कि हाऊं ज़ो कौराऊ कासरै हक्क कौरीऐ कौराऊ।

³⁰ तुमै मुकै ज़वाब दैऔ कि यहुन्ना बपतिस्मौ दैणै वाल़ौ कासरै बोलणै माथै बपतिस्मौ दिआ थौ? परमेश्‍वरा रै बोलणै माथै या लोगु रै बोलणै माथै दिआ थौ?”

³¹ इणै शुणियौ सै लोग आपु मांझ़िऐ चौपड़िंदै लागै, “अगर आमै बोलु लै कि ‘परमेश्‍वरा रै बोलणै माथै, तैबै इणीऐ बोलणौ आ इणौ कि तुमुऐ तेस माथै विश्वास कैलै ना कियौ?’

³² अगर आमै बोलु लै कि ‘लोगु रै बोलणै माथै, तैबै लोग रोशिणै ई’ कैलैकि इऐ लोग माना ई इणौ कि यहुन्ना परमेश्‍वरा री तौरफा कु आशौ औन्दौ भविष्यवक्ता आ।”

³³ तैबै तिंउऐ यीशु लै ज़वाब दैऔ, “आमै नाईं ज़ाणदै।” यीशुऐ भी तिउंलै बोलौ, “हाऊं भी तुमुकै नाईं बोलदौ कि ज़ो हाऊं कौराऊ, तेस कासरै हक्क कौरीऐ कौराऊ।”