मत्ती 9 - पहाड़ी महासुई

अधरौंगा वाल़ौ आदमी च़ांगौ कौरणौ

¹ तैबै यीशु किश्ती दी च़ौड़ियौ पारभिलै डैऔ, और आपणै इलाकै दी आशौ।

² और देखौ, भौरी लोग एक आदमी बिस्तरै दी आणौ ज़ासकै आपणै ज़िसमा रौ केज़ौ भी आंग नाईं हिलाइया थौ। यीशुऐ तिऊंरौ विश्वास देखीयौ, तेस बिमार आदमी लै बोलौ, “ओ गोश्टण, हिम्मत छ़ाड़। तैरै पाप माफ हुई गौऐ ई।”

³ एथ माथै कई शास्त्रिउऐ सुंच़ौ, “एऊ ता परमेश्‍वरा री बुराई कौरा सा?”

⁴ यीशुऐ तिउंरै मौना री बुशै ज़ाणीऔ बोलौ, “तुमै लोग आपणै-आपणै मौना दी बुरौ कैलै सुंच़दै लागै औन्दै?

⁵ आसान का सा? बिमार आदमी लै इणौ बोलणौ कि तैरै पाप माफ हुऐ या खौड़ौ उठ आपणौ बिस्तरौ च़ुंग और हांडदै लाग?

⁶ पाप माफ सिरफ परमेश्‍वर ई कौरी बौल़ा आ। तुमुकै देखाउणा लै कि पाप माफ कौरणै रौ हक्क मुकै आ, ज़ुण परमेश्‍वरा री तौरफा कु भेज़ौ औन्दौ,” तैबै यीशुऐ तेस बिमार आदमी देखीयौ बोलौ,

⁷ “हाऊं ताउंलै बोलाऊ, खौड़ौ उठ, आपणौ बिस्तरौ च़ुंग और घौरै डेऊ।”

⁸ लोग इणौ देखीयौ डौरी गौऐ और परमेश्‍वरा री बौड़ाई कौरदै लागै ज़ुणिऐ आदमी लै इणौ हक्क दैऔ सा।

मत्ती आपु आइलै औटाउणौ

⁹ तिदरा कु औगाड़िऐ डेइयौ यीशुऐ मत्ती नावां रै एकी आदमी लै ज़ो मामलै निणै वाल़ै रै आड्डै माथै थौ बोशौ औन्दौ सेऊ देखौ, और तेसलै बोलौ, “मुं पिछ़ु आश।” सेऊ उठीयौ यीशु पिछ़ु हांडदै लागौ।

¹⁰ और ज़ेबी यीशु मत्ती रै घौरा दी रोटी खांदै बोशौ ता तिऐ भौरी मामलै निणै वाल़ै और पापी लोग आशीयौ यीशु और तेसरै च़ेलै आइलै रोटी खांदै बोशै।

¹¹ इणौ देखीयौ फरीसीउऐ यीशु रै च़ेलेऊ लै बोलौ, “तुमारौ भविष्यवक्ता मामलै निणै वाल़ै और पापी लोगु आइलै रोटी कैलै खा पिआ आ?”

¹² इणौ शुणियौ यीशुऐ तिउंलै बोलौ, “डाक्टरा री ज़ुरत भौलै-च़ांगेउ लै नाईं पर बिमार लोगु लै औआ सा।

¹³ एथीलै तुमै डेइयौ एथरौ मतलब शिखौ ‘हाऊं बौल़ी नाईं पर दया च़ाहा ऊ।’ कैलैकि हाऊं धौर्मी लोगु नाईं पर पापी लोगु औटाउंदेऊ आशौ ऊ।”

ब्रौता (उपवासा) रौ सवाल

¹⁴ तैबै यहुन्ना रै च़ेलेउऐ यीशु काऐ आशीयौ बोलौ, “का मतलब आ कि आमै और फरीसी एती ब्रौत छ़ाड़ी ई, पर तैरै च़ेलै ब्रौत नाईं छ़ाड़दै?”

¹⁵ यीशुऐ तिउंलै बोलौ, “का बराती, ज़ेबी झ़ांऊ लाड़ौ तिऊं आइलै आ, ब्रौत कौरी सौका ई? पर सै दीन आशालै ज़ेबी लाड़ौ तिऊंकु अलग कौरालै, सेज़ै बौगता दी सै ब्रौत कौरा ई।”

¹⁶ “केज़ौ भी आदमी नौऐं जुड़कै रौ टालकौ पुराणै जुड़कै दी नाईं लाइंदौ। नाईं ता धोइदीं बारै सेऊ नौऐं जुड़कै रौ टालकौ तेस पुराणौ जुड़कौ पोरु थोसियौ ज़ादड़ौ च़ीरा सा। और सेऊ टालकौ पुराणै जुड़कै आइलै मेल भी नाईं खान्दौ।

¹⁷ कोई भी आदमी अंगुरा री सूर चाणना लै ताज़ौ अंगुरा रौ रस पुराणै खाल़ढै दी नाईं छ़ाड़दौ। नाईं ता अंगुरा रौ रस दख बौगता बासिऐ फैलीयौ तेस पुराणै खाल़ढै रौ थोउलौ भी पोरु च़ीरा ज़ेथ कौरीऐ अंगुरा रौ रस और खाल़ढौ दुइया बरबाद हुआ आ। पर नौउंऔ अंगुरा रौ रस नौउंऐ खाल़ढै दी भौराई और सै दुइया बौच़ी रौआ ई।”

मौरी औन्दी छ़ोटी और बिमार छ़ेउड़ी

¹⁸ यीशु तिऊं आइलै एज़ी बुशै लाइंदै थौ लागौ औन्दौ, कि देखौ, एक आराधनालय रै मुख्यै आशीयौ यीशु कै ढाल की और बोलौ, “मेरी मांई इबी मौरी आ, पर च़ाल आपणौ हाथ तिंआ माथै छ़ाड़, ता सै ज़िउंदी हुआ सा।”

¹⁹ यीशु उठीयौ आपणै च़ेलै आइलै तेस पिछ़ु डेई गौऐ।

²⁰ और देखौ, एक छ़ेउड़ीऐ ज़ासदी बाराह बौरशा ओउलै लोऊ बौइणै री बिमारी थी सै यीशु रै नज़दीक आशी,

²¹ कैलैकि सै आपणै मौना दी बोला थी, “अगर हाऊं यीशु रै जुड़कौ छ़ूंऊं लै ता हाऊं ठीक हुआ ऊ।” तैबै तिंआऐ यीशु पिछ़ु आशीयौ यीशु रै जुड़कै छ़ुऐं

²² यीशुऐ मुड़ियौ सै देखी और बोलौ, “धीया हिम्मत छ़ाड़, तैरै विश्वासै तू ठीक कौरी गोई आ।” तैबै सै छ़ेउड़ी तेबी ई ठीक हुई गोई।

²³ ज़ेबी यीशु तेस याईरा रै घौरा काऐ पौउंच़ौ ता तिऐ बांइशी बज़ाउणै वाल़ै और भीड़ देखी,

²⁴ तैबै बोलौ, “दूर हुऔ इदरु, मांई मौरी नाईं, पर सुती ऐन्दी आ।” एथ माथै सै यीशु रौ मज़ाक उड़ाउंदै लागै।

²⁵ पर ज़ेबी भीड़ गाड़ी गोई, ता यीशुऐ भितरै डेइयौ तिऐं मांई रौ हाथ पाकड़ौ, और सै ज़िउंदी हुई गोई।

²⁶ और एज़ी बुशै री खुशी री खौबर तेस सारै देशा दी फैअली गोई।

दुई शेड़ेऊ लै आखी देणी

²⁷ ज़ेबी यीशु तिदरु औगांऊ डैऔ, ता दुई शेड़ै तेस पिछ़ु इणौ औटाउंदै लागै, “ओ यीशु, राज़ै दाऊदा री खानदानी रौ, आमु माथै दया कर।”

²⁸ ज़ेबी यीशु घौरा दी पौउंच़ौ, ता सै शेड़ै यीशु काऐ आशै, और यीशुऐ तिउंलै बोलौ, “का तुमुकै विश्वास आ कि हाऊं तुमु च़ांगै कौरी सौका ऊ? तिंउऐ यीशु लै बोलौ, ‘ओ, प्रभु, आमै विश्वास कौरी कि तुमै आमु च़ांगै कौरी सौका ई!’

²⁹ तैबै यीशुऐ तिउंरी आखी छ़ुंइऔ बोलौ, ‘तुमारै विश्वासा रै ज़ौरिऐ तुमै च़ांगै हुआई।’

³⁰ और सै देखदै लागै। यीशुऐ तिउंकै च़ितल़ाइऔ बोलौ, ‘खौबरदार, कासी कै भी एज़ी बुशा रौ पौतौ ना च़ांई लागौ।’ ”

³¹ पर तिंउऐ डेइयौ सारै देशा दी यीशु रौ नाऊं फैलाई गौ।

एक लाटौ च़ांगौ कौरणौ

³² ज़ेबी सै बाइरै थै डेउंदै लागै औन्दै ता देखौ, लोगु एक लाटौ ज़ासदी बुरी आत्मा थी लागी ऐन्दी, यीशु काऐ आणौ।

³³ और ज़ेबी यीशुऐ बुरी आत्मा गाड़ी गोई, ता लाटौ बोलदै लागौ। एथ माथै भीड़ हैरान हुईऔ बोलदै लागी, “आमुऐ इस्राइल देशा दी इणौ केबी नाईं देखौ।”

³⁴ पर फरीसीउऐ बोलौ, “एऊ ता बुरी आत्मा रै मुख्यै री सहायता कौरी बुरी आत्मा गाड़ा सा।”

भौरी कम ज़िमदार

³⁵ तैबै यीशु और तेसरै च़ेलै गलील परदेशा रै सारै इलाकै और गांवा दी डेवै, और तिउंरै आराधनालय दी डेइऔ शिक्षा दैंदै थाकौ लागी, और परमेश्‍वरा रै राज़्य री खुश-खौबरी रौ परचार कौरदै, और सौभी रौंगा री बिमारी और कमज़ोरी दूर कौरदै थाकौ लागी।

³⁶ ज़ेबी यीशुऐ भीड़ देखी ता तेसरै लोगु माथै दया आशी, कैलैकि सै लोग इणै थै ज़िणी बिण भेराल़डु री भेरै हुआई। और सै परेशान और भटकै औन्दै थै।

³⁷ तैबै यीशुऐ आपणै च़ेलेऊ लै बोलौ, “पाच़ी ऐन्दी फसल ता भौरी सी, पर तिऐं फसली मेटणे वाल़ै ज़िमदार भौरी कम ई।

³⁸ एथीलै डोखरै रै मालिका कु औरज़ कौरौ कि आपणै डोखरै दी पाच़ी ऐन्दी फसली लौइणा लै ज़िमदार भेज़।”