मत्ती 7 - पहाड़ी महासुई

दुजेऊ माथी दोष नाईं लाइणौ

¹ “कासी दी भी झ़ुठै आरोप नाईं लाऔ तैबै तुमु दी भी झ़ुठै आरोप नाईं लागदै।

² कैलैकि ज़िणौ तुमै आरोप ला ई, तिणी ई परमेश्‍वर भी तुमु दी भी आरोप ला सा। ज़िणौ तुमै दुजेऊ आइलै बर्ताव कौरा ई तिणी परमेश्‍वर भी तुमु आइलै बर्ताव कौरा आ।

³ “तू आपणै भाई री आखी दी सांगर कैलै देखा ई, का तांउकै आपणी आखी रौ डिगंच़ौ नाईं च़ौगरिंदौ?

⁴ ज़ैबै तेरी ई आखी दी डिगंच़ौ आ ता तैबै तू आपणै भाई लै किणौ बोली सौका ई, ‘भाई टेक हाऊं तेरी आखी रौ सांगर गाड़ाऊ?’

⁵ ओ कौपटी! पैहलै आपणी आखी रौ डिगंच़ौ गाड़, तैबै तू आपणै भाई री आखी कु तेस सांगर आच़्छ़ै कौरी गाड़ी सौका ई।

⁶ “पवित्र च़ीज़ कुकरा लै नाईं दैऔ, और आपणै मोती सुंगरा कै नाईं पा। इणौ ना च़ांई कि सै तिऊं बांगणा थाली फेंच़ा और पौल़टियौ तुमु ई धेड़ा-च़ीरा और खा।

मांगा लै ता तुमुलै मिला सा

⁷ “ज़ो तुमारी ज़ुरत आ परमेश्‍वरा कु मांगौ, ता सेऊ तुमुकै दिआ आ, लोड़ा लै ता तुमुकै मिला। खटखटावा लै, ता तुमुलै खुला सा।

⁸ कैलैकि ज़ुण मांगा तेसलै परमेश्‍वर दिया सा, और ज़ुण लोड़ा लौ तेसकै मिला, और ज़ुण खटखटावा लौ तेसलै दार खुला सा।”

⁹ “तुमु मांझ़िऐ इणौ कुण आदमी आ, कि ज़ेबी तेसरौ छ़ोहरु रोटी मांगा लौ, ता तेसलै पात्थर दिआ लौ?

¹⁰ या माच़्छ़ी मांगा लौ, ता तेसलै माच़्छ़ी रै बौदल़ै साप दिआ?

¹¹ ज़ैबै तुमै बुरै हुइयौ आपणै लोल़डेऊ लै आच़्छ़ी च़िज़ै दैणी ज़ाणाई, तैबै सौरगा दी रौइणै वाल़ौ सारेऊ रौ बाब आपणै मांगणै वाल़ै लोल़डेऊ लै पवित्र आत्मा कैलै ना दैंदौ?

¹² एज़ी बज़ाह कु ज़िणौ तुमै लोगु कु च़ाहा ई कि लोग तुमु आइलै कौरा, तुमै भी तिऊं आइलै तिणौ कौरौ। कैलैकि मुसा रै नियम और भविष्यवक्ता री लिखी ऐन्दी बुशु रौ एज़ौ मतलब आ।”

घाटी और खुली बाट

¹³ “परमेश्‍वरा रै राज़्य दी सांगड़ै दारा बाटी डैऔ, कैलैकि खुलौ आ सेऊ दार और आसान आ सै बाट ज़ो विनाशा री तौरफा दी पौउंच़ावा। और भौरी सी ज़ुण तिंआ बाटा दी डेआई।

¹⁴ कैलैकि सांगड़ौ आ सेऊ दार और काठी आ सै बाट ज़ो सौदा री ज़िन्दगी भिलै पौउंच़ावा सा। और थोड़ै ई सै लोग ज़ो तिंआ बाटा दी हांडा ई।

ज़िणौ पेड़ तिणौ फौल़

¹⁵ “झ़ुठै भविष्यवक्ता कु बौच़ियौ रौएऊ, ज़ो भेरी रै रुपा दी तुमु काऐ आशा ई, पर असली ता सै धेड़नै वाल़ै शाल़टै ई।

¹⁶ तिंउरै कामा रै ज़ौरिऐ तुमै तिऊं रुवावा ई। का लोग झ़ाड़ी कु अंगूर, या कांडै वाल़ै पेड़ा कु फेड़ु रौ फौल़ चोड़ाई?

¹⁷ एज़ै ज़ौरिऐ हर एक आच़्छ़ौ पेड़ आच़्छ़ौ फल़ आणा सा।

¹⁸ आच़्छ़ौ पेड़ निकामौ फल़ नाईं आणी सौकदौ, और ना निकामौ पेड़ आच़्छ़ौ फल़ आणी सौकदौ।

¹⁹ ज़ो-ज़ो पेड़ आच़्छ़ौ फल़ नाईं आणदौ, तेस काटियौ आगी दी पा ई। तिणी ई तिऊं झ़ुठै भविष्यवक्ता लै भी सौज़ा मिला आ

²⁰ इणी ई तिंउरै कामा कौरी तुमै तिऊं रुवावा ई।”

²¹ “ज़ुण मुलै, ‘ओ प्रभु! ओ प्रभु!’ बोलाई, तिऊं मांझ़िऐ कु हर एक सौरगा रै राज़्य दी नाईं डेई सौकदौ, पर सेऊ ई डिआ सा ज़ो मैरै सौरगा रै बाबा री इच़्छ़ा दी आण्डा आ।

²² फैसलै रै दिनै भौरी लोग मुलै बोलालै, ‘ओ प्रभु, ओ प्रभु, का आमुऐ तैरै नाऊं कौरी भविष्यवाणी नाईं की, और तैरै नाऊं कौरी बुरी आत्मा नाईं गाड़ी, और तैरै नाऊं कु भौरी हैरान कौरना वाल़ै काम नाईं किऐ?’

²³ तैबै हाऊं तिऊंकु खुलीयौ बोलु लौ, ‘कि मुंइऐ तुमै केबी भी आपणै ज़ाणै नाईं।’ ओ बुरै काम कौरणै वाल़ेउओ, मुकाऐ कु पोरु डैऔ।”

घौरा चाणनै वाल़ै दुई आदमी बुद्धी वाल़ौ और मुर्ख

²⁴ “एथीलै ज़ुण-कुण मेरी एज़ी बुशै शुणियौ तिऊं माना सा, सै तेस आदमी ज़िणै ई ज़ुणिऐ घौरा चाणदी बारै ज़बीन डुंगी खोदियौ पाकी ज़ागाह दी पौई बोशाल़ी आ,

²⁵ और ज़ेबी नौं आशी भौरुईयौ और तेसरौ छ़ालौ तेस घौरा दी लागौ पर सेऊ घौर हिलौ भी नाईं कैलैकि सेऊ घौर पाकी ज़ागाह दी थौ बौणौ औन्दौ।

²⁶ पर ज़ुण-कुण मेरी एज़ी बुशै शुणाई और तिऊं माथै नाईं आण्डदै, सै तेस निर्बुद्धी आदमी ज़िणै औआ लौ ज़ुणिऐ आपणौ घौर बाल़ु माथै चाणौ।

²⁷ और पाणी लागौ, और बाड़ आशी, और बागुर लागी, और तेस घौरा दी टकराई और सेऊ घौर ढौल़ियौ सत्यानाष हुई गौ आ।”

²⁸ ज़ेबी यीशुऐ एज़ी बुशै बोली गोई, ता इणौ हुऔ कि भीड़ तेसरी शिक्षा कु हैरान हुऐ,

²⁹ कैलैकि यीशु शिक्षा हक्‍का कौरीऐ दिया थौ। यीशु री शिक्षा यहुदी शास्त्री लोगु ज़िणी नाईं थी।