मत्ती 26 - पहाड़ी महासुई

यीशु रै बिरोधा दी यीशु पाकुड़ना लै च़ाल

¹ ज़ैबै यीशुऐ सब बुशै बोली एरी ता आपणै च़ेलेऊ लै बोलदै लागौ,

² “तुमै ज़ाणाई कि दुई दिनै बासिऐ फसह रौ साज़ौ आ, और आदमी रौ छ़ोहरु क्रुसा माथै च़ड़ाउणा लै पकड़ावा ई।”

³ तैबै बौड़ै याजकु और प्रजा रै स्याणै लोग काइफा नावां रै परधान याजका रै खौल़ै दी कौठै हुऐ,

⁴ और आपु मांझ़िऐ चौपड़िंदै लागै कि यीशु च़लाकी कौरीऐ पाकड़ियौ पोरु झ़ांगी।

⁵ पर सै बोला थै, “साज़ै रै दिना दी नाईं पाकुड़दै, किऐ इणौ ना च़ांई हुऔ कि भीड़ा रै लोग मौच़ावा लै हालौ।”

बैतनिय्याह दी यीशु रोटी खांदै

⁶ ज़ेबी यीशु बेतनियाह दी शमौन कोढ़ी रै घौरा दी थौ,

⁷ ता एक छ़ेउड़ी संगमरमरा री शीशी दी भौरी किमत्ती तेल आणियौ यीशु काऐ आशी, और ज़ैबै यीशु रोटी खांदै थै बोशौ औन्दौ ता सेऊ तेल यीशु रै मुंडा तौल़ै पेरौ।

⁸ इणै देखिऔ यीशु रै च़ेलै रोशुऐ और बोलदै लागै, “इयौ मैहंगौ तेल बर्बाद कैलै कियौ औलौ?

⁹ एस तेल ता आच़्छ़ै दामा दी बेच़ीयौ एथरै रुपाऐ गरीब लोगु दी बांडणै च़ांई थै।”

¹⁰ इणौ ज़ाणीऔ यीशुऐ तिउंलै बोलौ, “तुमै इऐं छ़ेउड़ी लै कैलै रोशिआई? इऐं छ़ेउड़ीऐ मेरी भौलाई लै कियौ आ।

¹¹ गरीब लोग ता तुमु आइलै सौदा रौआ ई, पर हाऊं तुमु आइलै सौदा नाईं रौइंदौ।

¹² इऐं छ़ेउड़ीऐ मैरै मुंडा दी खुश्बुदार तेल पेरौ आ, सेऊ मैरै दबाउणा लै कियौ आ।

¹³ हाऊं तुमुलै सौच़्च़ौ बोलाऊ, ‘पुरी धौतरी दी ज़िऐ-ज़िऐ परमेश्‍वरा रै खुशी री खौबर शुणावा लै, तिऐ-तिऐ इऐं छ़ेउड़ी रै कामा री बुशै भी हुआई।’ ”

यहुदा इस्करियोती रौ विश्वासघात

¹⁴ तैबै यहुदा इस्करियोतीऐ, ज़ो बारह च़ेलेऊ मांझ़िआ कु एक थौ, सेऊ बौड़ै याजकु काऐ डेइयौ बोलदै लागौ,

¹⁵ “अगर हाऊं यीशु तुमारै हाथा दी पकड़वाऊ लै ता तुमै का दिआई?” तिंउऐ तेसलै तीस च़ांदी रै सिक्कै तोलीयौ देई गौऐ।

¹⁶ और सेऊ तेबी कु यीशु पकड़ाउणा री ताकी दी रौ।

च़ेलेऊ आइलै आखरी बार साज़ै री रोटी खाणी

¹⁷ तैबै बिणा संज़ेड़ै री रोटी रै पैहलै दिनै, च़ेलै यीशु काऐ आशीयौ पुछ़दै लागै, “तुमै किऐ च़ाहा ई कि आमै फसह रै साज़ै री रोटी रौ इन्तज़ाम कौरी?”

¹⁸ यीशुऐ तिउंलै बोलौ, “शहरा दी फलाणै आदमी काऐ डेइयौ तेसलै बोलौ, गुरुजी बोलाई कि मैरौ बौगत नज़दीक आ। हाऊं आपणै च़ेलै आइलै तैरै घौरा दी फसह रौ साज़ौ मौनाऊं।”

¹⁹ तैबै च़ेलेउऐ यीशु रौ हुकम मानौ और फसह रै साज़ै री रोटी त्यार की।

²⁰ ज़ेबी ब्याल़ हुई ता यीशु बारह च़ेलेऊ आइलै रोटी खान्दै बोशौ।

²¹ ज़ेबी सै रोटी खान्दै लागै औन्दै थै ता यीशुऐ तिउंलै बोलौ, “हाऊं तुमुलै सौच़्च़ौ बोलाऔ कि तुमु मांझ़िऐ एक आ ज़ो मुं पकड़ावा ई।”

²² इणौ शुणियौ सै भौरी परेशान हुऐ, और हर एक यीशु कु पुछ़दै लागै, “ओ गुरुजी, का सेऊ हाऊं ऊ?”

²³ यीशुऐ ज़वाब दैऔ, “ज़ुणिऐ मुं आइलै थाल़ी दी हाथ पाऔ आ, सेऊ ई मुं पकड़ावा।

²⁴ आदमी रौ छ़ोहरु ता ज़िणौ तेसरै बारै दी लिखी औन्दौ आ, मैरौ मौरणौ ता इणी भी आ। पर तेस आदमी लै फिटकार आ ज़ासरै ज़ौरिऐ आदमी रौ छ़ोहरु पकड़वाइआ तेस आदमी लै तैबै आच़्छ़ौ थौ कि तेसरौ ज़नमा ना हुआ थौ।”

²⁵ तैबै यीशु पकड़ाउणै वाल़ै यहुदै बोलौ, “ओ गुरुजी, का सेऊ हाऊं ऊ?” यीशुऐ तेसलै बोलौ, “ओ ताइंऐ मानी गौ।”

प्रभु भोज़

²⁶ ज़ेबी सै रोटी खान्दै थै लागै औन्दै ता यीशुऐ रोटी च़ुंगी, और परमेश्‍वरा रौ धन्यबाद कौरीयौ चोड़ी और च़ेलेऊ लै देइयौ बोलौ, “नियौं, खाऔ। इयौ मैरौ ज़िसम आ।”

²⁷ तैबै यीशुऐ अंगुरा रौ खोरु च़ुंगियौ परमेश्‍वरा रौ धन्यबाद कियौ, और तिउंलै देइयौ बोलौ, “तुमै सब एथकु पिऔ,

²⁸ कैलैकि एस अंगुरा रौ रस तुमै मैरौ लोऊ सौमझ़ौ ज़ो भौरी लोगु तिंउरै पापा री सौज़ा कु बौच़ाउणा लै बौइणै वाल़ौ आ। मैरै मौरणै कु परमेश्‍वर लोगु आइलै एक नौंवौ रिश्तै रौ वायदौ पाकौ कौरा आ।

²⁹ हाऊं तुमुलै सौच़्च़ौ बोलाऊ कि अंगुरा रौ एऊ रस सेज़ै दिना झ़ांऊ केबी नाईं पिंदौ, ज़ेबी झ़ांऊ तुमु आइलै आपणै बाबा रै राज़ा दी नौउंऔ नाईं पिऊ।”

³⁰ तैबै सै भजन गाइयौ जैतूना री पहाड़ी माथै डै।

पतरसा रै मुकुरना री भविष्यवाणी

³¹ तैबै यीशुऐ तिउंलै बोलौ, “तुमै सारै आज़ राची मैरै बारै दी ठोकर खाआ ई, कैलैकि लिखौ औन्दौ आ: ‘हाऊं भेराल़ड़ु झ़ांगाऊ, और शाल़ा री भेरी ओरु-पोरु भागा ई।’

³² पर हाऊं ज़िउंदौ हुइयौ तुमु कु औगाड़िऐ गलीला लै डेआऊ।”

³³ एथ माथै पतरसै यीशु लै बोलौ, “अगर सारै विश्वासा दी डगमगा लै, पर मैरौ विश्वास केबी नाईं डगमगाउंदौ।”

³⁴ यीशुऐ तेसलै बोलौ, “हाऊं ताउंलै सौच़्च़ौ बोलाऊ कि आज़ राची कुखड़ै रै बाशणै कु पैहलै, आपणै मुंआ कु चिआ बारै बोलाई कि तू मुं नाईं ज़ाणदौ।”

³⁵ पतरसै यीशु लै बोलौ, “च़ाऊ मुं ताऊं आइलै मौरणौ भी जा लौ, तैबै भी हाऊं केबी ना बोलदौ कि हाऊं तुमु नाईं ज़ाणदौ।” और सारै च़ेलै इणौ लागै बोलदै।

गतसमनी दी प्राथना

³⁶ तैबै यीशु आपणै च़ेलै आइलै गतसमनी नाऊं री ज़ागाह दी आशौ और आपणै च़ेलै लै बोलदै लागौ, “तुमै इदै बोशी रौएऊ, ज़ेबी झ़ांऊ हाऊं प्राथना कौरुलै।”

³⁷ यीशुऐ पतरस और जबदी रै दुई छ़ोहरु आपु आइलै निऐं, और यीशु भौरी दुखी और घबराउंदै लागौ।

³⁸ तैबै यीशुऐ तिउंलै बोलौ, “मैरौ मन भौरी दुखी आ, इदरा झ़ांऊ कि मैरै प्राण डेउंदै ई लागै औन्दै। तुमै इदै ई रुकौ और मुं आइलै उज़ीई रौएऊ।”

³⁹ तैबै यीशु आगुड़ै डेइयौ धौनी ज़मीना माथै मुंडा लाइयौ पौड़ौ, और प्राथना कौरदै लागौ, “ओ मैरौ बाब, अगर तू च़ाहा ई एस दुखा रौ खोरु पोरु टाल़, तैबै भी ज़िणौ हाऊं च़ाहा ऊ तिणौ नाईं, पर ज़िणौ तू च़ाहा ई तिणी च़ांई हुऔ।”

⁴⁰ तैबै यीशु आपणै च़ेलेऊ काऐ आशीयौ देखै ता सै थै सुतै औन्दै तैबै यीशुऐ पतरसा लै बोलौ, “का तुमै एकी घौड़ीयै भी ना उज़ीई रौई बौल़ै?

⁴¹ उज़ीई रौएऊ, और प्राथना कौरदै रौऔ कि तुमै मुसीबता दी नाईं च़ांई पौड़ै।”

⁴² तैबै यीशुऐ दुजी बारै डेइयौ इणी प्राथना कौरी, “ओ मैरौ बाब, अगर एऊ मैरै पिऐ बिणा नाईं टौल़ी सौकौ ता तेरी इच़्छ़ा च़ांई पुरी हुई।”

⁴³ तैबै यीशु दुजी बारै आशौ तेबी भी सै सुतै औन्दै थै, कैलैकि तिउंकै भौरी नीज थी लागी औन्दी।

⁴⁴ तिऊं छ़ाड़ियौ यीशु औज़ौ चीजी बारै प्राथना कौरना लै डैऔ।

⁴⁵ तैबै यीशुऐ च़ेलेऊ काऐ आशीयौ बोलौ, “आबै सुती रौएऊ, और आराम कौरौ: देखौ सेऊ बौगत आशी ऐरौ आ, और आदमी रौ छ़ोहरु पापी लोगु रै हाथा दी पकड़ाइया सा।

⁴⁶ उठौ! औगांऊ हाण्डौ। देखौ, मुं पकड़ाउणै वाल़ौ आशी गौ आ।”

यीशु धोखै दी पाकुड़नौ

⁴⁷ यीशु इणौ बोलदै थौ लागौ औन्दौ कि यहुदा ज़ो बारह च़ेलेऊ मांझ़िऊ कु एक थौ सेऊ आशौ, और तेस आइलै एक भौरी भीड़ भी थी ज़ासकै तलवारै और डिंगै थै। सै भीड़ बौड़ै याजक, यहुदा शास्त्री और स्याणै लोगुऐ भेज़ी औन्दी थी, यीशु पाकुड़णालै।

⁴⁸ यहुदै पैहलै बोलौ औन्दौ थौ कि, “ज़ास हाऊं खोबीयाउलौ सेऊ ई आ। तेस पाकड़ेउ।”

⁴⁹ और सेऊ खरकच़ार यीशु काऐ आशौ और बोलौ, “ओ गुरुजी, ढाल!” और यीशु भौरी खोबीयाऔ।

बौड़ी खुंबल़ी काऐ यीशु

⁵⁰ यीशुऐ तेसलै बोलौ, “ओ गोश्टण, ज़ेज़ै कामा लै तू आशौ थौ, तेस कर।” तैबै तिऊं लोगुऐ आगुड़ै आशीयौ यीशु पाकड़ौ।

⁵¹ यीशु रै च़ेलेऊ मांझ़िऐ कु एकीऐ आपणी तलवार गाड़ी और परधान याजका रै नुकरा रौ कौन्थु पोरु पा काटौ।

⁵² तैबै यीशुऐ तेसलै बोलौ, “आपणी तलवार म्याणा दी छ़ाड़ कैलैकि ज़ो तलवार च़लावा ई सै सारै तलवारा कौरै नाश हुआई।

⁵³ का तू नाईं ज़ाणदौ कि हाऊं आपणै बाबा कु औरज़ कौरी सौका ऊ, और सौ सौरगदूता री बारह पल़टणा कु भौरी मुं काऐ इबी भेज़ी सौका?

⁵⁴ पर पवित्रशास्त्रा री सै बुशै कि इणौ ई हुणौ ज़ुरुरी आ, किणै कौरी पुरी हुआई?”

⁵⁵ सेज़ै बौगतै यीशुऐ भीड़ा रै लोगु लै बोलौ, “का तुमै तलवारी और डिंगै कौरीऐ ई आशै औन्दै। का तुमै मुं डाकु सौमझ़ा ई? हाऊं हर दीन परमेश्‍वरा रै घौरा दी बोशियौ तुमुलै शिक्षा दिआ थौ, और तुमुऐ हाऊं नाईं पाकड़ौ।

⁵⁶ पर एऊ सब एथीलै हुऔ आ ताकी पुराणै भविष्यवक्ता रौ सेऊ वचन पुरौ हुआ।” तैबै सारै च़ेलै तेस छ़ाड़ियौ भागी गौऐ।

⁵⁷ तैबै तिंउऐ यीशु पाकड़ियौ परधान याजका रै घौरा दी नियौं। तिऐ सारै शास्त्री और स्याणै लोग कौठै थै हुऐ औन्दै।

⁵⁸ पतरस यीशु पिछ़ु दूर-दूर आण्डियौ परधान याजका रै गौड़ै झ़ांऊ डैऔ, पतरस तिऐ च़ोउकीदारु काऐ बोशियौ आगी तापदै लागौ।

⁵⁹ बौड़ै याजक और सारै यहुदी फैसलै कौरणै वाल़ी खुंबल़ी रै लोग च़ाहा थै कि कोई यीशु रै विरोधा दी गवाही दिआ थै,

⁶⁰ पर भौरी लोग यीशु रै विरोधा दी गवाही दैंदै लागै पर तिउंरी बुशै आपु मांझ़िऐ नाईं मिला थी। बासिऐ दुई ज़ौणै गवाही दैंदै आशै,

⁶¹ और बोलदै लागै, “आमुऐ शुणौ ई कि इयौ यीशु बोला कि हाऊं परमेश्‍वरा रौ घौर ढाल़ी सौका ऊ और चिया दिना दी चाणाऊ।”

⁶² तैबै परधान याजकै खौड़ै हुइयौ यीशु लै बोलौ, “का तू कोई ज़वाब नाईं दैंदौ? इऐ लोग तैरै बारै दी का गवाही दिआई?

⁶³ पर यीशु च़ुटुक थाकौ।” तैबै परधान याजकै यीशु लै बोलौ, “हाऊं ताउंलै ज़िउंदै परमेश्‍वरा री कसम दिआऊ कि अगर तू परमेश्‍वरा रौ छ़ोहरु मसीह ई, ता आमुलै बोल।”

⁶⁴ यीशुऐ तेसलै बोलौ, “ताइंऐ आपु ई बोली गौ। पर हाऊं तुमुलै इणौ भी बोलाऊ कि इबी कु तुमै आदमी रौ छ़ोहरु ज़ो सौभी कु शक्ति वाल़ै परमेश्‍वरा री सुल़टी भिलै बोशा, और सौरगा रै बादल़ा माथै आशदै देखा ई।”

⁶⁵ एथ माथै परधान याजकै आपणै जुड़कै च़िरै और बोलौ, “इणीऐ परमेश्‍वरा री बुराई कौरी आ, आबै आमुकै कासी री गवाही री ज़ुरत नाईं? शुणौ, तुमुऐ इबी एज़ी बुराई शुणी आ!”

⁶⁶ तुमै का सुंच़ाई? सारै लोग बोलदै लागै, “यीशु लै मौरणै री सौज़ा च़ांई मिली।”

⁶⁷ तैबै तिंउऐ यीशु रै मुंआ दी थुकौ और यीशु पिटदै लागै, दुजै लोगुऐ यीशु दी थापै लाई और बोलदै लागै,

⁶⁸ “ओ मसीह, अगर तू भविष्यवक्ता ई ता बोल ताउंदी कुणिऐ लाई?”

पतरसा रौ इनकार

⁶⁹ पतरस बाइरी भिलै खौल़ै दी थौ बोशौ औन्दौ तैबै बौड़ै याजकु री एक नुकराण तेस कई आशी और तेसलै बोलौ, “तू भी तेस यीशु गलीली आइलै थौ।”

⁷⁰ तिणीऐ सौभी काऐ इणौ बोलीयौ इनकार कियौ, “हाऊं नाईं ज़ाणदौ तू का ई लागी औन्दी बौल़दै।”

⁷¹ ज़ेबी पतरस बाइरै डैऔ, ता दुजी नुकराणिऐ पतरस देखीयौ तिऊं लोगु लै बोलौ ज़ो तिऐ थै, “इयौ भी ता यीशु नासरी आइलै थौ।”

⁷² पतरस कसम खाइयौ औज़ौ मुकरौ “हाऊं तेस आदमी नाईं ज़ाणदौ।”

⁷³ दख बौगता बासिऐ तिऐ ज़ो लोग खौड़ै थै, तिंउऐ पतरसा लै बोलौ, “पाकौ तू भी तिऊं मांझ़िआ कु एक ई, कैलैकि तेरी बोली तैरौ राज़ खोला सा।”

⁷⁴ तैबै पतरस कसमा खांदै लागौ। “हाऊं तेस आदमी बिल्कुल भी नाईं ज़ाणदौ।” और खरकच़ार कुखड़ौ बाशौ।

⁷⁵ तैबै पतरसा कै सै बुशै याद आशी गोई ज़ो यीशुऐ तेसलै बोली थी: “कुखड़ै रै बाशणै कु पैहलै चिया बारै तू मैरौ इनकार कौरा ई।” और सेऊ बाइरै डेइयौ डीकरी-डीकरीयौ लेरदै लागौ।