मत्ती 25 - पहाड़ी महासुई

दस बिण ब्याई छ़ोटुड़ी रौ औनैणौ

¹ “सौरगा रौ राज़ तिऊं दस बिण ब्याई छ़ोटूड़ ज़िणौ हुआ ज़ो आपणै मशाल नीईंयौ लाड़ै कु मिलदै डेई।

² तिऊं मांझ़िऐ पांज़ मुर्ख और पांज़ सौमझ़दार थी।

³ मुर्खै आपणी मशाल ता नींई, पर आपुकै ज़ादड़ौ तेल नाईं निऔं।

⁴ पर सौमझ़दारै आपणै मशाल लालटेणा आइलै आपणी कुप्पी दी तेल भी भौरी गौ।

⁵ ज़ैबै लाड़ै रै आशणै दी बेर हुई, ता सै सारै डुइणी लाइंदै लागी और सुती गोई।

⁶ ज़ेबी राच आधी हुई ता धूम माच़ी ‘शुणौ, लाड़ौ आशदै लागौ औन्दौ आ! तेस मिलदै च़ालौ।’

⁷ तैबै सै दस बिण ब्याई छ़ोटुड़ी उठीयौ आपणै मशाल ठीक कौरदै लागी।

⁸ और मुर्ख छ़ोटुड़ीउऐ सौमझ़दारा लै बोलौ, ‘आपणै तेला मांझ़िआ कु कुछ़ तेल आमुकै भी दैऔ, कैलैकि आमारी मशाल इशदै आ लागी ऐन्दी।’

⁹ पर सौमझ़दारै ज़वाब दैऔ, ‘पर एऊ आमुलै और तुमुलै पुरौ नाईं औन्दौ। तुमुलै ठीक आ कि तुमै बेच़णै वाल़ेऊ काऐ डैऔ और आपु कालै तेल आणौ।’

¹⁰ ज़ेबी सै तेला आणदै डेउंदै थी लागी औन्दी ता लाड़ौ पौउंच़ी गौ, और ज़ो त्यार थी, सै तेस आइलै शादी रै घौरा दी डेई गोई और दार बन्द की ऐरौ।

¹¹ तेत बासिऐ सै दुजी पांज़ बिण ब्याई वापिस आशीयौ लाड़ै लै बोलदै लागी, ‘ओ मालिक, ओ मालिक, आमुलै दार खोल!’

¹² तिणीऐ ज़वाब दैऔ, ‘हाऊं तुमुलै सौच़्च़ौ बोलाऊ, हाऊं तुमु नाईं ज़ाणदौ।’

¹³ एथीलै उज़ीई रौऔ, कैलैकि तुमै मैरै वापिस आशणै रौ सेज़ौ दीन नाईं ज़ाणदै, ना सेज़ौ बौगत ज़ाणदै।”

तोड़ै रौ औनैणौ

¹⁴ कैलैकि एऊ तेस आदमी ज़िणी हालत आ ज़ुण परदेशा लै डेउणै रै बौगतै आपणै नुकुर औटाऐ आपणी ज़यदाद तिउंकै देई।

¹⁵ तिणीऐ एकी कै पांज़ शर्फी, दुजै कै दुई शर्फी, चीज़ै कै एक शर्फी देई। तिणीऐ हर एकी लै तेसरै शक्ति रै मुताबिक दैऔ, और आपु डेई गौ दुजै देशा लै।

¹⁶ तैबै, ज़ासकै पांज़ शर्फी थी मिली ऐन्दी, तिणीऐ खरकच़ार डेइऔ तिऊंरौ लेण-देण किऔ, और तिणीऐ पांज़ शर्फी औज़ौ कौमाई।

¹⁷ इणी ई तिणी दुजै नुकरै भी ज़ासकै दुई शर्फी मिली औन्दी थी, दुई शर्फी औज़ौ कौमाई।

¹⁸ पर ज़ासकै एक मिली औन्दी थी, तिणीऐ डेइऔ माटौ खोदौ, और आपणै मालिका री शर्फी दाबी गोई।

¹⁹ “भौरी दिना बासिऐ तिऊं नुकरा रौ मालिक आशौ और तिउंकै लेण-देणा रै बारै दी पुछ़दै लागौ।

²⁰ ज़ासकै पांज़ शर्फी मिली औन्दी थी, तिणीऐ पांज़ शर्फी आणियौ बोलौ, ‘ओ मालिक, ताइंऐ मुकै पांज़ शर्फी देई औन्दी थी, देख, मुंइऐ पांज़ औज़ौ कौमाई।’

²¹ तेसरै मालिकै तेसलै बोलौ, ‘शाबाश, ओ आच़्छ़ौ और विश्वासा रै लायक नुकुर, तू थोड़ै दी विश्वासा वाल़ौ निकल़ौ।’ हाऊं ताऊं भौरी च़िज़ा रौ मालिक चाणाऊ। आपणै मालिका री खुशी दी खुश रौऊ।”

²² “और ज़ासकै दुई शर्फी मिली औन्दी थी, तिणीऐ भी आशीयौ बोलौ, ‘ओ मालिक, ताइंऐ मुकै दुई शर्फी देई औन्दी थी, देख, मुंइऐ दुई औज़ौ कौमाई।’

²³ तिणीऐ मालिकै तेसलै बोलौ, ‘शाबाश, ओ आच़्छ़ौ और विश्वासा वाल़ौ नुकुर, तू थोड़ै दी विश्वासा वाल़ौ निकल़ौ। हाऊं ताऊं भौरी च़िज़ेऊ रौ मालिक चाणाऊ। आपणै मालिका री खुशी दी खुश रौऊ।’

²⁴ तैबै ज़ासकै एक शर्फी थी मिली औन्दी, तिणीऐ आशीयौ बोलौ, ‘ओ मालिक, हाऊं ज़ाणाऊ कि तू काठौ आदमी ई: ज़िऐ तू नाईं बौइंदौ तेस भी तू लौआ ई, ज़िऐ तैरौ नाईं आ तिदरु भी तू निंआई।

²⁵ हाऊं डौरी गौ थौ और डेइऔ तेरी शर्फी माटै थाली दाबी गोई। शुण, ज़ो तैरौ आ, सेऊ इदै आ।’

²⁶ एथीलै तेसरै मालिकै तेसलै ज़वाब दैऔ, ‘ओ दुष्ट और निकामौ नुकुर, ज़ैबै तू ज़ाणा थौ कि ज़िऐ हाऊं नाईं बौइंदौ तिऐ हाऊं लौआऊ, और ज़िऐ मैरौ नाईं आ तिदरौ हाऊं च़ुंगाऊ।’

²⁷ ता ताऐं मेरी शर्फी ब्याज़ा माथै कैलै ना देई ताकी ज़ेबी हाऊं आशा थौ ता तेबी सित ब्याज़ै निआं थौ।

²⁸ एथीलै इऐं शर्फी एसकु ओरु छ़ुड़ाऔ, और ज़ासकै दस शर्फी मुहरै ई, तेसकै दैऔ।

²⁹ कैलैकि ज़ासकै आसती आ और सेऊ ठीक ढौंगारौ बौरता लौ तेसकै औज़ौ मिला। ज़ुण ठीक ढौंगारौ ना बौरता लौ तेसकु सेऊ भी ओरु निईंआ सा ज़ो तेसकै औलौ।

³⁰ एस निकामौ नुकुर बाइरै न्यारै दी पाऔ, ज़िऐ लेरणौ और दांद पिशणौ हुआ आ।”

फैसलै रौ दीन

³¹ “ज़ेबी हाऊं आदमी रौ छ़ोहरु आपणी महिमा दी आशा लौ और सब सौरगदूत मुं आइलै आशा ई, ता हाऊं आपणी महिमा रै ज़ागाह माथै बोशौ औन्दौ हुआ ऊ।

³² और सारी ज़ाती मुं काऐ कौठी कौरा ई। और ज़िणौ भेराल़ड़ु भेरी बाकरी कु अलग कौरा ई, तिणी ई हाऊं भी तिऊं एकी दुजै कु अलग कौरा सा।

³³ हाऊं भेरीऊ ज़ुण धौर्मी लोग ई आपणी सुल़टी भिलै और बाकरी ज़ुण अधर्मी लोग ई उल़टी भिलै खौड़ौ कौराऊ।

³⁴ तैबै हाऊं राज़ौ तिउंलै बोलाऊ ज़ो सुल़टी भिलै ई, ‘ओ मैरै बाबा रै भौलै लोगुओ, आशौ, तेस राज़्या रै हिसेदार बौणौ, ज़ो धौतरी रै पैहलै कु तुमुलै त्यार किऔ औन्दौ आ।

³⁵ कैलैकि ज़ेबी हाऊं भुखौ थौ, तुमुऐ मुलै खाणा लै दैऔ। ज़ेबी हाऊं चिशौ थौ, और तुमुऐ मुलै पिणा लै पाणी दैऔ। ज़ेबी हाऊं परदेशी थौ, और तुमुऐ हाऊं आपणै घौरा दी छ़ाड़ौ।

³⁶ ज़ेबी हाऊं नांगौ थौ, तुमुऐ मुकालै भिड़ना लै जुड़कै दै। ज़ेबी हाऊं बिमार थौ, और तुमुऐ हाऊं पुछ़ौ, ज़ेबी हाऊं कैदा दी थौ, तुमै मुकाऐ मिलदै आशै।’

³⁷ तैबै धौर्मी लोग तेसलै ज़वाब दिआ लै, ‘ओ प्रभु, आमुऐ केबी तू भुखौ देखौ और खिलाऔ? या केबी तू आमुऐ चिशौ देखौ और पाणी पिलाऔ?

³⁸ आमुऐ केबी तू परदेशी देखौ और केबी आमुऐ तू आपणै घौरा दी छ़ाड़ौ? या केबी तू नांगौ थौ और केबी ताउंकै जुड़कै भिड़ाऐ?

³⁹ आमुऐ केबी तू बिमार और कैदा दी देखौ और केबी ताऊं काऐ मिलदै आशै?’

⁴⁰ तैबै हाऊं राज़ौ तिउंलै ज़वाब दिआ, ‘हाऊं तुमुलै सौच़्च़ौ बोलाऊ कि तुमुऐ ज़ो इऊं छ़ोटे कु छ़ोटे विश्वासी भाईऊ मांझ़िऊ कास एकी आइलै किऔ, सेऊ ई मुं आइलै कियौ।’

⁴¹ तैबै सेऊ आपणी ज़ो उल़टी भिलै ई बोशाल़ै औन्दै तिउंलै बोला, ‘ओ शापित लोगुओ, मुं काऐ कु तिऐं सौदा री आगी मांझ़िऐ डैऔ, ज़ो परमेश्‍वरै शैतान और तेसरै सारै दूता लै आ त्यार की ऐन्दी।

⁴² कैलैकि ज़ेबी हाऊं भुखौ थौ और तुमुऐ मुलै खाणा लै नाईं दैऔ। ज़ेबी हाऊं चिशौ थौ, और तुमुऐ मुलै पिणा लै पाणी नाईं दैऔ।

⁴³ ज़ेबी हाऊं परदेशी थौ, और तुमुऐ हाऊं आपणै घौरा दी नाईं छ़ाड़ौ। ज़ेबी हाऊं नांगौ थौ, और तुमुऐ मुलै भिड़ना लै जुड़कै नाईं दैणै। ज़ेबी हाऊं बिमार और कैदा दी थौ, और तुमुऐ हाऊं नाईं पुछ़ौ।’

⁴⁴ तैबै सै ज़वाब दिआ लै, ‘ओ प्रभु, आमुऐ तू केबी भुखौ, या चिशौ, या परदेशी, या नांगौ, या बिमार, या कैदा दी देखौ आ, और तेरी सेवा टहल नाईं की?’

⁴⁵ तैबै हाऊं तिउंलै ज़वाब दिआ, ‘हाऊं तुमुलै सौच़्च़ौ बोलाऊ कि तुमुऐ ज़ो इऊं छ़ोटे कु छ़ोटे मांझ़िआ कु कास एकी आइलै भी नाईं किऔ, सेऊ मुं आइलै भी नाईं कियौ।’

⁴⁶ और इउंलै सौदा री ज़िन्दगी झ़ांऊ सौज़ा मिला सा, पर धौर्मी लोग सौदा री ज़िन्दगी दी डेआई।”