मत्ती 24 - पहाड़ी महासुई

परमेश्‍वरा रै घौरा रै विनाशा री भविष्यवाणी

¹ ज़ेबी यीशु परमेश्‍वरा रै घौरा कु बाइरै निकुल़दै थौ लागौ औन्दौ, ता तेसरै च़ेलै परमेश्‍वरा रै घौरा रै बारै दी यीशु काऐ पुछ़दै आशै।

² तिणीऐ तिउंलै बोलौ, “तुमै एस सब देखदै लागै औन्दै ई ना! हाऊं तुमुलै सौच़्च़ौ बोलाऊ, इदै ढोल़ा माथै ढोल़ भी नाईं बौच़दै कैलैकि इयौ सब कुछ़ ढाल़िया नाश हुआ।”

मुसीबत और क्लेश

³ ज़ेबी यीशु जैतूना री पहाड़ी माथै थौ बोशौ औन्दौ, ता च़ेलेउऐ एखुली दी यीशु काऐ आशीयौ तेसलै बोलौ, “आमुलै बोल कि एज़ी बुशै केबी हुआई? तैरै आशणै रौ और धौतरी आखरी हुणै रौ का निशाण हुआ सा?”

⁴ यीशुऐ तिउंलै ज़वाब दैऔ, “बौच़ियौ रौएऊ! कुणिऐ तुमुलै धोखौ ना च़ांई दैऔ,

⁵ कैलैकि कई लोग इणै हुआई ज़ो मैरै नावां कौरीऐ आशीयौ बोलाई, हाऊं मसीहा ऊ, और भौरी लोग तिऊं पिछ़ु डेउणै ई।

⁶ तुमै लौड़ाई और झ़ौगड़ै रै बारै दी शुणा लै, ता तुमै घौबराएऊ नाईं कैलैकि इऐ बुशै हुणी ता ज़ुरुरी ई, पर सेज़ौ बौगत आखरी नाईं हुन्दौ।

⁷ कैलैकि एकी ज़ाती रै लोग दुजी ज़ाती रै लोगु रौ विरोध कौरा ई, एकी देशा रै लोग दुजै देशा रै लोगु रौ विरोध कौरा ई, और ज़ागाह-ज़ागाह दी काल़ पौड़ा आ, और भुईंच़ाल़ हुणै ई।

⁸ इऐ सब बुशै मुसीबता री शुरुआत ई।

⁹ तैबै सै ज़ुण तुमारै विरोधी ई दुःख देणा लै तुमु पाकड़ाई, और तुमु पोरु झ़ांगाई, और मैरै नावां री वज़ाह कु सारै गुटा रै लोग तुमु आइलै दुश्मनी छ़ाड़ाई। कैलैकि तुमै मुं माथै विश्वास कौरा ई।

¹⁰ तैबै भौरी लोग विश्वास पोरु छ़ाड़ाई, और एकी दुजै पकड़ावा ई, और एकी दुजै आइलै दुश्मनी छ़ाड़ाई।

¹¹ भौरी ज़ौणै झ़ुठै और पुराणै भविष्यवक्ता आशा ई, और भौरी लोगु बिशवाशाई।

¹² अधर्मा रै बौड़णै कु भौरी लोग प्यार पोरु बिसरा ई,

¹³ पर ज़ो आखरी झ़ांऊ मुं माथै विश्वास छ़ाड़ा लौ, सेऊ ई बौच़ा आ।

¹⁴ और परमेश्‍वरा रै राज़ा री इऐ खुश खौबरी धौतरी री सारी ज़ागाह दी परचार कौरालै, कि सब ज़ाती रै लोगु लै तेस अपणाउणा रौ मौकौ मिला, तैबै सण्सार रौ आखरी बौगत आशा सा।”

बौड़ी मुसीबता री शुरुआत

¹⁵ “एथीलै ज़ेबी तुमै तिऐं उज़ाड़णै वाल़ी बुरी चीज़ ज़ेथरै बारै दी दानिय्येल भविष्यवक्ता रै ज़ौरिऐ बोली ऐन्दौ थी, एक भौरी बुरौ आदमी आशीयौ एस परमेश्‍वरा रै आराधना रै घौरा री सारेऊ कु शुद्ध ज़ागाह गान्दी कौरा आ (पढ़ने वाल़ौ सौमझ़ा लौ।),

¹⁶ तैबै ज़ेज़ै लोग यहुदिऊ दी औलै सै बौच़णा लै पहाड़ा दी जा डेउणौ।

¹⁷ ज़ो छ़ापरा माथै औलै, सै आपणै घौरा कु समाना आणना लै तौल़ै नाईं उतरियौ।

¹⁸ और ज़ो डोखरै दी औलै, सै आपणै जुड़कै आणना लै घौरै नाईं डेआलै।

¹⁹ सेज़ै दिनै दी ज़ो छ़ेउड़ी गौरकै ज़िवा री औली और ज़ासकै दूध पिणै वाल़ै लोल़डै औलै, तुमुलै इऐ केती बुरी बूश आ।

²⁰ प्राथना कौरदै थाकौ लागी कि तुमै शेल़ै रै दिनै या आरामा रै दिना दी नाईं जा लौ भागणौ।

²¹ कैलैकि सेज़ै बौगतै इणौ भौरी दुःख हुआ, ज़िणौ धौतरी रै पैहलै कु ना इबी झ़ांऊ हुऔ और ना केबी हुणौ।

²² अगर सेज़ै दीन कम नाईं कौरा थै ता कोई भी प्राणी नाईं बौच़ा थौ, पर च़ुनै औन्दै री वज़ाह कु सै दीन कम कौरी गौऐ।

²³ सेज़ै बौगतै अगर तुमुलै कुण बोलालौ, ‘शुणौ, मसीह इदै आ!’ या ‘तिदै आ!’ ता विश्वास नाईं कौरेऊ।

²⁴ कैलैकि झ़ुठै मसीह और झ़ुठै भविष्यवक्ता आशा ई, और बौड़ै निशाण, और हैरानी वाल़ै काम देखाइयौ लोगु परमेश्‍वरा री बाटा कु टाल़णै री कोशिश कौरा ई।

²⁵ शुणौ, मुंइऐ तुमुलै सारी कुछ़ बुशै पैहलै ई बोली गोई आ।

²⁶ एथीलै अगर सै तुमुलै बोलालै, ‘शुणौ, सेऊ ज़ांगल़ा दी आ,’ ता बाइरै नाईं निकल़ियौ। या बोलालै ‘शुणौ, सेऊ कोठरिउ दी आ,’ ता विश्वास नाईं कौरेऊ।

²⁷ कैलैकि ज़िणौ बिज़ल़ी पुर्वा कु निकल़ियौ पश्चिमा झ़ांऊ च़ौमका ई, तिणी ई आदमी रै छ़ोहरु रौ आशणौ हुआ सा।

²⁸ ज़ियै मौरौ औन्दौ प्राणी हुआ सा, तिऐ बाज़ कौठै हुआई।”

आदमी रै छ़ोहरु रौ दुजी बारै आशणौ

²⁹ “सेज़ै दिना रै दुखा बासिऐ सुरज काल़ौ पौड़ा सा, और सुरज और ज़ून भी प्याशौ दैणौ बन्द कौरा, और तारै सौरगा कु छ़ुटियौ तौल़ै पौड़ा ई और सौरगा री शक्ति हिलणी।

³⁰ तैबै आदमी रै छ़ोहरु री निशाणी सौरगा दी दिशा ई, और तैबै सौरगा रै सारै कुला रै लोग हिकड़ौ पिटाई। और आदमी रै छ़ोहरु बौड़ी शक्ति और शाना कौरीऐ सौरगा रै बादल़ा माथै आशदै देखा ई।

³¹ सेऊ बांइशी बाज़ियौ आपणै सौरगदूत भेज़ा आ, और सै पुरी धौतरी कु मैरै छ़ांटै औन्दै लोग कौठै कौरा ई।”

फेड़ु रै पेड़ा रौ औनैणौ

³² “फेड़ु रै पेड़ा कु एज़ौ औनैणौ शिखौ ज़ेबी फेड़ु रै पेड़ा रै शाऊंटै कौंउल़ै हुआई और तेसदी पाच लागदै लागा ई, ता तेबी तुमुकै पौतौ लागा कि गौरमी आशणै वाल़ी आ।

³³ तिणी ई ज़ेबी तुमै इऊं सब बुशै औन्दै देखा लै, ता तुमै सौमझ़ेऊ कि मैरौ दुजी बारै वापिस आशणै रौ बौगत हुई ऐरौ आ।

³⁴ हाऊं तुमुलै सौच़्च़ौ बोलाऊ कि ज़ेबी झ़ांऊ इऐ सारी बुशै पुरी ना औली, तेबी झ़ांऊ एज़ी पीड़ी रौ नाश नाईं औन्दौ।

³⁵ सौरग और धौतरी टौल़ी सौका ई पर मेरी बोली ऐन्दी बुशै केबी ना टौल़दी।”

उज़ीई रौएऊ

³⁶ “मैरौ दुजी बारै आशणै रै बौगता रै बारै दी कोई नाईं ज़ाणदौ, ना सौरगदूत और ना छ़ोहरु, सिरफ परमेश्‍वरा कै पौतौ।

³⁷ ज़िणै नुहा रै दीन थै, तिणी ई मुं आदमी रै छ़ोहरु रौ आशणौ भी हुआ सा।

³⁸ कैलैकि ज़िणौ पाणी रै विनाशा कौरी पैहलै रै दिना दी, ज़ेबी झ़ांऊ कि नूह ज़ाहज़ा दी नाईं डैऔ, सेज़ै दिनै झ़ांऊ लोग खा-पिया थै, और तिऊं मांझ़िऐ शादी ब्याऐ औआ थै।

³⁹ और ज़ेबी झ़ांऊ पाणी रै विनाशा आशीयौ सै सारै बौआइयौ नाईं निऐं, तेबी झ़ांऊ तिउंकै कुछ़ भी सौमझ़िऐ नाईं आशौ। तिणी ई हाऊं आदमी रै छ़ोहरु रौ आशणौ भी हुआ आ।

⁴⁰ सेज़ै दिनै दी ज़ो लोग डोखरै दी हुआई, एक निंआई पोरु दुजौ छ़ाड़ाई तिदै।

⁴¹ दुई छ़ेउड़ी जांजै पिशदै रौआ ई, एक पोरु निंआलै और दुजी छ़ाड़ा लै तिदै।

⁴² एथीलै उज़ीई रौऔ, कैलैकि तुमै नाईं ज़ाणदै कि तुमारौ प्रभु केज़ै दिना दी आशा सा।

⁴³ पर इणौ ज़ाणौ कि अगर घौरा रौ मालिक ज़ाणदौ औलौ कि च़ोर केज़ै बौगतै आशा ई ता उज़ीई रौआ थौ, और आपणै घौरा दी च़ोरी कौरणै नाईं दिया थौ।

⁴⁴ एथीलै तुमै भी तैयार रौऔ, कैलैकि ज़ेज़ै बौगतै रै बारै दी तुमै सुंच़दै नाईं, सेज़ै बौगतै आदमी रौ छ़ोहरु आशा सा।”

विश्वासा वाल़ौ दास और दुष्ट दास

⁴⁵ “तैबै विश्वास वाल़ौ बुद्धी वाल़ौ दास सेऊ आ, ज़ो मालिकै आपणै ओरी नुकरा-च़ाकरा रौ मुख्यौ चाणौ कि सेऊ बौगता दी तिउंलै रोटी दिआ

⁴⁶ भौलौ आ सेऊ दास, ज़ो तेसरौ मालिक आशीयौ इणौ कौरदै तेस देखा लौ।

⁴⁷ हाऊं तुमुलै सौच़्च़ौ बोलाऊ, ‘सेऊ मालिक आपणै तेस दासा कै आपणी सारी धन-ज़यदादा सौम्भाल़णै रौ हक्क दिआ सा।

⁴⁸ अगर सेऊ दास सुंच़ा लौ कि मैरौ मालिक ता कुछ़ दिना झ़ांऊ वापिस ना आशदौ,

⁴⁹ और दुजै नुकरा लै दुःख दैणौ शुरु कौरालौ, और आपुलै खाणै पिणै रौ इन्तज़ाम कौरालौ और सूर पिआ लौ।

⁵⁰ ता तेसरौ मालिक बिण बोली तेबी वापिस आशा ज़ेबी तिणीऐ सुंच़ौ औन्दौ भी नाईं औलौ।’

⁵¹ तैबै सेऊ मालिक तेस नुकरा लै सौज़ा दिया और कौपटीऊ मांझ़िऐ भेज़ा तिऐ लेरणौ और दांद पिशणौ हुआई।”