मत्ती 23 - पहाड़ी महासुई

शास्त्रिउ और फरीसीउ कु दूर रौएऊ

¹ तैबै यीशुऐ लोगु लै और आपणै च़ेलेऊ लै बोलौ,

² “शास्त्री और फरीसीउ कै मुसा रै नियम शिखाउणै रौ हक्क आ।

³ एथीलै सै तुमुलै ज़ो कुछ़ बोलालै सेऊ तुमुऐ कौरणौ और मानणौ, पर तिऊं ज़िणै काम नाईं कौरणै। कैलैकि सै बोला ता ई पर कौरदै नाईं।

⁴ सै तुमु माथै कई नियम थोपा ई ज़ो मानणौ मुश्कल़ आ, सै लोगु कु ज़ौबरिऐ तिऊं नियम मौनावा ई, पर सै आपु नाईं तिऊं मानदै नाईं।

⁵ सै आपणै काम लोगु कै देखाल़णा लै कौरा ई: सै आपणै-आपणै जौंतर बौड़ौ कौरा ई और आपणै च़ोगै-बागै रै धुरै बौड़ै कौरा ई ताकी लोग तिऊं धौर्मी ज़ाणा।

⁶ धामा दी खास आच़्छ़ी ज़ागाह, और आराधनालय दी खास-खास ज़ागाह लोड़ाई बोशणा लै,

⁷ बज़ारा दी ढाल, और लोगु ज़ेबी तिउंलै गुरु बोलाई ता तिउंकै आच़्छ़ौ लागा आ।

⁸ पर तुमै गुरु नाईं बौणेऊ, कैलैकि तुमारौ एक ई गुरु आ, और तुमै सारै आपु मांझ़िऐ भाई-बौइणी ज़िणै ई।

⁹ धौतरी माथै कासी लै आपणौ बाब ना बोलेऊ, कैलैकि तुमारौ एक ई आत्मिक बाब आ, ज़ो सौरगा दी आ।

¹⁰ और मालिक भी नाईं बोलीयौ, कैलैकि तुमारौ एक ई मालिक आ, सिरफ मसीह।

¹¹ ज़ो तुमु माझ़िऐ बौड़ौ आ, सेऊ तुमारौ सेवक बौणा।

¹² ज़ुण-कुण आपुलै बौड़ौ बौणा लौ, सेऊ छ़ोटौ बौणा लौ और ज़ुण-कुण आपुलै छ़ोटौ बौणा, सेऊ बौड़ौ कौरीया लौ।”

शास्त्रिउ और फरीसीउ री बुराई रै बारै दी रोशिणौ

¹³ “ओ कौपटी शास्त्रिउओ और फरीसीउओ, तुमुलै फिटकार! तुमै लोगु कालै सौरगा रै राज़्य रौ दार बन्द कौरा ई, ना ता आपु तेसदी डेउंदै और ना तेसदी डेउणै वाल़ै तेसदी डेउणै दैंदै।”

¹⁴ ओ कौपटी शास्त्रिउ और फरीसीउ, तुमुलै फिटकार! तुमै विधवाऊ रौ घौर सारौ लुटा ई, और देखाउणा लै भौरी बौगता झ़ांऊ प्राथना कौरदै रौआ ई: एथीलै परमेश्‍वरा कु तुमुलै भौरी सौज़ा मिला सा।

¹⁵ “ओ कौपटी शास्त्रिउओ और फरीसीउओ, तुमुलै फिटकार! तुमै एक आदमी आपणै गुटा दी आणना लै भौरी ज़ागाह दी डिआई, और ज़ैबै सेऊ वशा दी आशा सा ता तेस आपु कु दुगुणौ नौरका रै लायक चाणा ई।”

¹⁶ “ओ शेड़ै शास्त्रिउओ और फरीसीउओ, तुमुलै फिटकार! ज़ुण बोलाई कि अगर कुण परमेश्‍वरा रै घौरा री शौपतै खा ता कुछ़ नाईं, पर अगर कुण परमेश्‍वरा रै घौरा रै सुनै री शौपतै खा ता तेसदी बानिया।”

¹⁷ ओ मुर्खो और शेड़ेउओ, कुण आ बौड़ौ। सुनौ या सेऊ परमेश्‍वर ज़ासकु सुनौ पवित्र हुआ सा?

¹⁸ तैबै बोलाई कि अगर कोई बेदी री शौपतै खा ता कुछ़ नाईं, पर अगर ज़ो भैंटा तेसदी आ, अगर तेसरी शौपतै खा ता बानिया सा।

¹⁹ ओ शेड़ेउओ, कुण आ बौड़ौ। भैंटा या बेदी ज़ास कौरी भैंटा पवित्र हुआ सा?

²⁰ एथीलै ज़ो बेदी री शौपतै खा सा, सेऊ तेसरी और ज़ो कुछ़ तेस माथै आ, तेसरी भी शौपतै खा सा।

²¹ ज़ो परमेश्‍वरा रै घौरा री शौपतै खा सा, सेऊ तेसरी और तेसदी रौइणावाल़ै री भी शौपतै खा सा।

²² ज़ो सौरगा री शौपतै खा सा, सेऊ परमेश्‍वरा री ज़ागाह री और तेत माथै बोशणा वाल़ै री भी शौपतै खा सा।

²³ “ओ कौपटी शास्त्रिउओ और फरीसीउओ, तुमुलै फिटकार! तुमै पुदीनै और सौंफ, और ज़ीरै रौ दौसुऔ भाग ता दिआई, पर तुमुऐ नियमा री खास बुशै, मतलब फैसलौ, और दया, और बफादारी पोरु छ़ाड़ी गोई आ। इणौ च़ांई थौ कि इऊं भी कौरा थै और तिऊं भी नाईं छ़ाड़ा थै।

²⁴ ओ शेड़ै शास्त्रिउओ और फरीसीउओ, तुमै छ़ोटै-छ़ोटै नियम ता बौड़ै ध्याना कौरी माना ई ज़िणै माच़्छ़र छ़ाणा ई पाणी कु पर परमेश्‍वरा रै खास और मुख्य नियम टाल़ा ई पोरु, ज़िणै सौगल़ै ऊंट घुटा ई।

²⁵ ओ कौपटी शास्त्रिउओ और फरीसीउओ, तुमुलै फिटकार! तुमै डौंगै और थाल़ी बाइठी ता मांझ़ाई पर सै भितरी आइलै न्यारै और मौल़ा कौरी भौरुई ऐन्दी।

²⁶ ओ शेड़ै फरीसीउओ, पैहलै डौंगौ और थाल़ी भितरी आइलै मांज़ौ कि सै बाइरी आइलै भी साफ हुआ।”

²⁷ “ओ कौपटी शास्त्रिउओ और फरीसीउओ, तुमुलै फिटकार! तुमै च़ुनै कौरी माशी औन्दी कौबरी ज़िणै ई ज़ो बाइरी आलै बड़ीया दिशा ई, पर भितरी आइलै मौड़ै री हाड़केऊ और सारै रौंगा री गान्दी च़िज़ा कौरी भौरुऐ औन्दै।

²⁸ एज़ी रीती कौरी तुमै भी बाइरी आइलै भी लोगु कै धौर्मी दिशा ई, पर भितरी आइलै कपट और अधर्मा कौरी भौरुऐ औन्दै ई।”

शास्त्रिउ और फरीसीउ माथी डांडा री भविष्यवाणी

²⁹ “ओ कौपटी शास्त्रिउओ और फरीसीउओ, तुमुलै ता इऐ केती बुरी बूश आ! तुमै पुराणै भविष्यवक्ता री ओडाच़ी सज़ावा ई ज़ो तुमारै नाना-बुड़ुऐ भौरी पैहलै झ़ांगै थै और इज़्ज़तमान कौरना लै धौर्मिऊ री ओडाच़ी चाणा ई,

³⁰ और बोलाई कि, ‘अगर आमै आपणै बाब दादै रै बौगता दी हुआ थै ता पुराणै भविष्यवक्ता झ़ांगणा लै तिऊं आइलै साथा दी नाईं हुआ थै।’

³¹ इणै कौरी ता तुमै आपणै बारै दी आपु ऊ गवाही दिआई कि तुमै पुराणै भविष्यवक्ता रै खुनी री संतान ई।

³² और तुमुऐ भी आपणै बाब दादै रै पापा रौ घौड़ौ पुरौ भौरौ।

³³ ओ सापा ज़िणै बिशलै और खतरनाक लोल़डेउओ, तुमै नौरका री सौज़ा कु किणै कौरीऐ बौच़ाई?

³⁴ एथीलै देखौ, हाऊं तुमु काऐ पुराणै भविष्यवक्ता और बुद्धी वाल़ै और शास्त्रिउ भेज़ाऊ। और तुमै तिऊं मांझ़िआ कु कुछ़ झ़ांगाई पोरु और कुछ़ क्रुसा माथै च़ड़ावा ई, और कुछ़ लोगु लै तुमै आपणै आराधनालय दी डिंगै ला ई और एकी इलाकै कु दुजै इलाकै दी गाड़दै थाका ई लागी।

³⁵ ज़ेथकु धौर्मी हाबिला कु बिरिक्याह रौ छ़ोहरु जकरयाह झ़ांऊ, ज़ो तुमुऐ परमेश्‍वरा रै घौरा दी और बेदी रै बिच़ा री ज़ागाह दी झ़ांगौ थौ, ज़ेती धौर्मी लोगु रौ लोऊ धौतरी माथै बौऔ औन्दौ आ तिऊं सौभी रौ पाप तुमारै मुंडा माथै सा।

³⁶ हाऊं तुमुलै सौच़्च़ौ बोलाऊ कि, इऐ सारी बुशै एज़ै जुगा रै लोगु माथै पौड़ा ई।”

यरुशलेमा लै लेरणौ

³⁷ “ओ यरुशलेमा रै लोगुओ, ओ यरुशलेमा रै लोगुओ! तू पुराणै भविष्यवक्ता झ़ांगाई। और ज़ो ताऊं काऐ भेज़ै ई, तिऊं तुमै ढोल़ीयावा ई। केती बारै मुंइऐ च़ाऔ कि ज़िणौ कुखड़ी आपणै टैऐणु आपणै पांखै थालै सौंभाल़ा आ, तिणी ई हाऊं भी तैरै छ़ोहरु सौंभाल़ा ऊ, पर तुमुऐ नाईं च़ाऔ।

³⁸ देखौ, तुमारौ घौर तुमु कालै उज़ाड़ी छ़ाड़ाऊ।

³⁹ कैलैकि हाऊं तुमुलै बोलाऊ कि इबी कु ज़ेबी झ़ांऊ तुमै नाईं बोलालै, ‘भौलौ आ सेऊ, ज़ुण परमेश्‍वरा रै नावां कौरी आशा सा’ तेबी झ़ांऊ मुं तुमै केबी ना देखाल़ै।”