मत्ती 22 - पहाड़ी महासुई

शादी दी रोटी खांदै औटाउणै रौ औनैणौ

¹ यीशु औज़ौ तिउंकै औनैणै दी बोलदै लागौ,

² “सौरगा रौ राज़ तेस राज़ै ज़िणौ आ, ज़ुणिऐ आपणै छ़ोहरु री शादी की।

³ और तिणीऐ आपणै नुकुर भेज़ै कि ज़ासलै नीऊंदौ आ दैऔ औन्दौ तिऊं लोगु शादी री धामा खांदै औटाऊ। पर सै नाईं आशै।

⁴ तैबै तिणीऐ औज़ौ आपणै नुकुर इणै बोलीयौ भेज़ै कि, ‘ज़ासलै नीऊंदौ आ दैऔ औन्दौ तिऊं लोगु लै बोलौ शुणौ, मुंइऐ बौड़ी और स्वादली धाम तैयार की गोई आ, और सब कुछ़ तैयार आ। शादी री धामा दी आशौ।’

⁵ पर सै नाईं कौरीयौ तिदरु डेई गौऐ कोई डेवै आपणै डोखरै लै, कोई डेवै आपणै कामा खौटदै।

⁶ दुजै लोग ज़ो बौच़दै थै लागै औन्दै तेसरै नुकुर पाकड़ै और तिउंरी बेइज़्ज़ती की और पोरु झ़ांगै

⁷ तैबै राज़ै रै रोश आशै, और तिणीऐ आपणै सिपाई भेज़ीयौ सै लोऊ कौरणै वाल़ै पोरु झ़ांगै, और तिंउरै इलाकै दी आग लाई और सारौ पोरु ज़ाल़ौ।

⁸ तैबै तिणीऐ आपणै नुकरु लै बोलौ, ‘शादी री धाम ता तैयार आ पर निऊंदै वाल़ै लोग तिऐ आशणै रै लायक नाईं थै।

⁹ एथीलै सौड़की दी डैऔ और ज़ेती लोग तुमुकै मिला ई, सौभी लोगु शादी री धामा खान्दै औटाऔ।’

¹⁰ तैबै तिऊं नुकरुऐ सौड़की दी डेइयौ का भौलै का बुरै, ज़ेती मिलै, सारै लोग कौठै कियै। और शादी रौ घौर पाउणै कौरी भौरुई गौ।

¹¹ ‘ज़ेबी राज़ौ पाउणै देखदै भितै आशौ, ता तिणीऐ तिऐ एक आदमी देखौ, ज़ुणिऐ शादी रै जुड़कै भिड़ै औन्दै नाईं थै।’

¹² तिणीऐ तेसकु पुछ़ौ, ‘ओ गोश्टण। तू शादी रै जुड़कै भिड़ीयौ कैलै नाईं आशौ?’ तेस आदमी रौ मूंह बन्द हुई गौ।

¹³ तैबै राज़ै आपणै नुकरा लै बोलौ, ‘एसरै हाथ और बांगणै बानियौ बाइरै न्यारै दी पाऔ, तिऐ लेरणौ और दांद पिशणौ हुआ।’

¹⁴ कैलैकि औटाऐ औन्दै ता भौरी ई और छ़ांटै औन्दै थोड़ै ई।”

कैसरा लै मामलौ दैणै

¹⁵ तैबै फरीसी डेइयौ आपु मांझ़िऐ सुंच़दै लागै कि एस केज़ै ज़ौरिऐ बुशु दी फसाई।

¹⁶ तैबै तिंउऐ आपणै च़ेलै हेरोदेसा आइलै यीशु काऐ इणौ बोलणा लै भेज़ै, “ओ गुरु, आमै ज़ाणी आ कि तू सौच़्च़ौ आ, और परमेश्‍वरा री बाट सौच़्च़ाई कौरी शिखावा आ, और कासी री परवाह नाईं कौरदौ, कैलैकि तू आदमी रौ मूंह देखीयौ बूश नाईं कौरदौ।

¹⁷ एथीलै आमुलै बोल तू का सुंच़ाई? कैसरा लै मामलौ दैणौ च़ांई कि नाईं।”

¹⁸ यीशुऐ तिउंरी च़ालाकी ज़ाणीऔ तिउंलै बोलौ, “ओ कौपटी लोगुऔ, मुं कैलै पौरखा ई?

¹⁹ मामलै रौ सिक्कौ मुकै देखाल़ौ।” तैबै तिंउऐ यीशु काऐ एक सिक्कौ निऔं ज़ेथरी किम्मत एक दिना री दिहाड़ी रै बराबर थी

²⁰ यीशुऐ तिऊंकु पुछ़ौ, “एऊ छ़ाप और नाऊं कासरौ आ?”

²¹ तिंउऐ तेसलै बोलौ, “कैसरा रौ।” तैबै यीशुऐ तिउंलै बोलौ, “ज़ो कैसरा रौ आ तेस कैसरा कै दैऔ। और ज़ो परमेश्‍वरा रौ आ तेस परमेश्‍वरा लै दैऔ।”

²² इणौ शुणियौ सै लोग हैरान हुऐ, और तिदरु कु डेई गौऐ।

दुजी बारै पैदौ हुणौ और शादी

²³ सेज़ै दिनै सदुकी लोगु ज़ो इणौ मानाईं कि ज़ुण मौरा ई सै दुजी बारै ज़िउंदै नाईं हुंदै, यीशु काऐ आशै और तेसलै बोलौ,

²⁴ “ओ गुरु, मुसै बोलौ थौ कि अगर केज़ौ आदमी बिण औलादीऐ मौरा लौ, ता तेसरौ भाई तेसरी विधवा छ़ेउड़ी आइलै शादी कौरीयौ आपणै भाई कालै वंश पैदौ कौरा।

²⁵ आबै आमारै घौरा दी सात भाई थै, पैहलौ भाई शादी कौरीयौ मौरी गौ, और दुजै भाईऐ तिऐं छ़ेउड़ी आइलै शादी कौरी ताकी तेस भाई री औलाद बौणी रौआ।

²⁶ इणी कौरै चीज़ै और च़ौथेउऐ भी इणौ कियौ, और साथी भाईउऐ तिऐं आइलै शादी की और बिणा औलादीऐ मौरी गौऐ।

²⁷ तेत बासिऐ सै छ़ेउड़ी भी मौरी गोई।

²⁸ ज़ैबै सै छ़ेउड़ी ज़िउंदी हुआ ली ता तिऊं साता मांझ़िऊ कु कासरी छ़ेउड़ी हुआ? कैलैकि सै सारेऊ री छ़ेउड़ी थी।”

²⁹ यीशुऐ तिउंलै ज़वाब दैऔ, “तुमै पवित्रशास्त्र और परमेश्‍वरा री शक्ति नाईं ज़ाणदै। एज़ै कारणै तुमै गौलती दी पौड़ै औन्दै आ।

³⁰ कैलैकि ज़िउंदै हुणा दी सै ना ता शादी कौरदै और ना शादी लै दैंदै पर सौरगा दी सौरगदूतै ज़िणै हुणै ई।

³¹ पर मौरणै बासिऐ ज़िउंदै हुणा रै बारै दी का तुमुऐ एज़ौ वचन नाईं पौढ़ौ ज़ो परमेश्‍वरै तुमु आइलै बोलौ आ:

³² ‘हाऊं अब्राहमा रौ परमेश्‍वर, और इसहाका रौ परमेश्‍वर, और याकुबा रौ परमेश्‍वर आ?’ सेऊ मौरै औन्दै रौ नाईं, पर ज़िउंदै रौ परमेश्‍वर आ।”

³³ इणौ शुणियौ लोग तेसरी शिक्षा कु हैरान हुऐ।

सौभी कु बौड़ौ हुकम

³⁴ ज़ैबै फरीसीउऐ शुणौ कि यीशुऐ सदुकिऊ रौ मूंह बन्द कौरी गौ, ता सै कौठै हुऐ।

³⁵ तिऊं मांझ़िऊ कु एकी शास्त्रिऐ यीशु पौरखणा लै तेसकु पुछ़ौ,

³⁶ “ओ गुरु, नियमा दी केज़ौ हुकम सौभी कु बौड़ौ आ?”

³⁷ यीशुऐ तेसलै बोलौ, “तू परमेश्‍वर आपणै प्रभु कु आपणै पुरै मन और आपणै पुरै प्राणा और आपणी सारी औकली आइलै प्यार छ़ाड़ै।

³⁸ बौड़ौ और ज़ुरुरी हुकम ता एऊ ई आ।

³⁹ और दुजी ज़ुरुरी हुकम भी तिणी आ कि ज़िणौ प्यार तू आपु आइलै कौरा ई तिणौ प्यार तू आपणै आस-पड़ोसा रै लोगु आइलै भी कौरै।

⁴⁰ एज़ै ई दुई हुकम सौभी नियम और पुराणै ज़मानै रै भविष्यवक्ता री बुनियाद आ।”

मसीह कासरौ छ़ोहरु आ?

⁴¹ ज़ेबी फरीसी कौठै थै, ता यीशुऐ तिऊंकु पुछ़ौ,

⁴² “मसीह रै बारै दी तुमै का सुंच़ाई? सेऊ कासरौ छ़ोहरु आ?” तिंउऐ यीशु लै बोलौ, “दाऊदा रौ।”

⁴³ यीशुऐ तिउंकै पुछ़ौ, “ता दाऊद आत्मा दी हुइयौ तेसलै प्रभु कैलै बोला सा?

⁴⁴ ‘प्रभुऐ, मैरै प्रभु लै बोलौ, मेरी सुल़टी भिलै बोश, ज़ेबी झ़ांऊ हाऊं तैरै दुश्मनु तेरी लाता थालै ना कौरु।’

⁴⁵ तैबै, ज़ैबै दाऊद तेसलै प्रभु बोला सा, ता सेऊ तेसरौ छ़ोहरु किणौ ठहरौ?

⁴⁶ एस ज़वाबा दी कोइऐ भी एक बूश ना बोली बौल़ै। सेज़ै दिना कु कासी रै भी तेसकु कुछ़ पुछ़णा री हिम्मत नाईं हुई।”