मत्ती 10 - पहाड़ी महासुई

यीशु रै बारह च़ेलै

¹ तैबै यीशुऐ आपणै च़ुनै औन्दै बारह च़ेलै आपु काऐ औटाऐ, और तिउंलै बुरी आत्मा माथै हक्क दैऔ कि तिऊं गाड़ौ और सौभी रौंगा री बिमारी और सौभी रौंगा री कमज़ोरी दूर कौरौ।

² तिऊं बारह च़ेलेऊ रै नाऊं एज़ै-एज़ै ई, पैहलौ शमौन, ज़ासलै पतरस भी बोलाई, और तेसरौ भाई आन्द्रियास। जबदी रौ छ़ोहरु याकूब, और तेसरौ भाई यहुन्ना।

³ फिलिप्पुस, और बरतुल्मै, थोमा, और मामलै निणा वाल़ौ मत्ती, हलफाई रौ छ़ोहरु याकूब, और तद्दै,

⁴ शमौन कनानी, और यहुदा इस्करियोती ज़ुणिऐ यीशु पकड़वाऔ आ।

बारह (प्रेरित) च़ेलेऊ री सेवा और काम

⁵ इऊं बारह लै यीशुऐ एज़ै हुकमा देइऔ भेज़ै “दुजी ज़ाती भिलै नाईं डेइऔ, और सामरिउ रै केज़ै इलाकै दी नाईं डेइऔ।

⁶ पर इस्राइला रै घौरा ई री औच़ी ऐन्दी भेरी काऐ डैऔ।

⁷ और हांडदै-हांडदै इणौ परचार कौरौ, ‘सौरगा रौ राज़्य नज़दीक आशी गौ सा।’

⁸ बिमार लोगु ठीक कौरौ, मौरै ऐन्दै ज़िउंदै कौरौ, कोढ़ीऊ ठीक कौरौ, बुरी आत्मा गाड़ौ। तुमुऐ मुफता दै पाऔ सा, और मुफता दी दैऔ।

⁹ आपणै गाची दी ना ता सुनौ, और ना ता रुपाऐ, और ना चांबौ छ़ाड़णौ।

¹⁰ बाटा लै ना बैग निऔं, ना दुई कुरतै, ना बूट और ना डिंगै निऔं, कैलैकि मज़दुरा लै तेसरी रोटी मिलणी च़ांई।”

¹¹ “ज़ेज़ै केज़ै इलाकै या गांवा दी डिआलै, ता पौतौ लाऔ कि तिऐ कुण आ ठीक। और ज़ेबी झ़ांऊ तिदरु कु नाईं निकल़ालै, तेसी रै काऐ रौऔ,

¹² घौरा दी डेउंदै ई तेसलै आशीष दैऔ।

¹³ अगर तेस घौरा रै लोग शान्ति रै लायक औलै ता तिउंलै आशीष मिला सा, अगर सै इणै लायक नाईं औलै ता सै आशीष और शान्ति वापिस आशा सा।

¹⁴ ज़ुण-कुण तुमु नाईं अपणावा लै और तुमारी बुशै नाईं शुणा लै, तेस घौरा या तेस इलाकै कु डेउंदी बारै आपणी चैपली री धूड़ भी पोरु झाड़ै ऊ।।

¹⁵ हाऊं तुमुलै सौच़्च़ौ बोलाऊ कि फैसलै रै दिनै तेस इलाकै री हालता कु सदोम और अमोरा रै देशा री हालत भौरी सैहन ना कौरणै रै लायक औआ ली।”

आशणै वाल़ी मुश्कल़

¹⁶ “देखौ, हाऊं तुमु भेरीऊ ज़िणै, इणै लोगु काऐ भेज़ाऊ ज़ुण खतरनाक शाल़टेऊ ज़िणै ई, एथीलै सापा ज़िणै च़लाक और कबुतरा ज़िणै भोल़ै बौणौ।

¹⁷ पर लोगु कु होशियार रौऔ, कैलैकि सै तुमु बौड़ी खुंबल़ी दी निआं ई, और आपणी आराधनालय दी तुमु दी डिंगै ला ई।

¹⁸ तुमै मुं कालै जजा और राज़ौ काऐ तिऊं माथै, और दुजी ज़ाती माथै गवाह हौणा लै पौउंच़ावा लै।

¹⁹ ज़ेबी सै तुमु पाकड़ा लै ता एज़ी फिकर नाईं कौरीऔ कि आमै केज़ी रीती कु या का बोलीलै, कैलैकि ज़ो कुछ़ तुमारौ बोलणौ औलौ, सेऊ सेज़ी बौगतै तुमुलै बोला सा।

²⁰ कैलैकि बोलणै वाल़ै तुमै नाईं ई, पर तुमारै बाबा री आत्मा तुमु दी बोला सा।”

²¹ “भाई भाई कै और बाब छ़ोहरु कै, झ़ांगणा लै दिआ लै, और छ़ोहरु मां बाबा रै विरोधा दी उठीयौ तिऊं झ़ंगावा ई।

²² मैरै नावां री वज़ाह कु सौभी लोग तुमु कु दुश्मनी छ़ाड़ा लै, पर ज़ो आखरी झ़ांऊ सौबर कौरालौ तेस ई रौ छ़ुटकारौ औआ लौ।

²³ ज़ेबी सै तुमु एकी इलाकै दी तंग कौरालै, ता दुजै लै भागणौ। हाऊं तुमुलै सौच़्च़ौ बोलाऊ, ता तुमै इस्राइला रै सौभी इलाकै दी नाईं भागा लै की आदमी रौ छ़ोहरु आशा लौ।”

²⁴ “च़ेलौ केबी भी आपणै गुरु कु बौड़ौ नाईं औन्दौ। और ना नुकुर आपणै मालिका कु।

²⁵ च़ेलै रौ गुरु रै, और नुकुरा रौ मालिका रै बराबर हौणौ ई भौरी आ। अगर तिंउऐ घौरा रै मालिका आइलै बुरौ बरताव कियौ आ ता तेसरै नुकरु आइलै भी बुरौ बरताव कौरा ई।”

कासकु डौरी लै

²⁶ “एथीलै लोगु कु नाईं डौरौ। कैलैकि कोई भी च़ीज़ छ़िपी औन्दी ना आसती, ज़ो पौगड़ौ ना कौरियाली, और ना ई कुछ़ छ़ुपौंदौ आसतौ, ज़ो उज़ाल़ै दी ना आणियालौ।

²⁷ ज़ो हाऊं तुमुलै न्यारै दी बोलाऊ, तेस तुमै प्याशै दी बोलौ। और ज़ो तुमै कौन्थु दी घुणमुणा ई, तेस छ़ापरा माथै कु पौगड़ौ कौरौ।

²⁸ ज़ो शरीर ता झ़ांगी बौल़ा ई, पर आत्मा नाईं, तिऊंकु नाईं डौरौ। पर परमेश्‍वरा कु डौरौ, ज़ो आत्मा और शरीर दुइया नौरका दी नाश कौरी सौका आ।

²⁹ दुई पैसेऊ कौरी दुई च़ौड़की बिका ई। तैबै भी तुमारै बाबा री मौरज़ी रै बिणा तिऊं मांझ़िआ कु एक भी ज़मीना माथै नाईं लोटदी

³⁰ परमेश्‍वर तुमारी ज़िन्दगी रै बारै दी ख्याल छ़ाड़ा आ इदरा झ़ाऊं कि तुमारै मुंडा रै बाल़ भी गौणै औन्दै ई।

³¹ एथीलै डौरौ नाईं। कैलैकि तुमै परमेश्‍वरा लै तिऊं च़ौड़की रै बालरा कु भी ज़ादै किमत्ती ई।”

यीशु मानणौ या नाईं मानणौ

³² “ज़ुण-कुण मुं लोगु मांझ़िऐ अपणावा लौ ता हाऊं आदमी रौ छ़ोहरु तेस आदमी सौरगा रै बाबा काऐ अपणावा ऊ।

³³ पर अगर कुण, लोगु काऐ मुं नाईं अपणावा लौ, ता हाऊं भी आपणै सौरगा रै बाबा काऐ तेस नाईं अपणाउंदौ।”

यीशु आशणै रौ नतीज़ौ

³⁴ “इणौ ना सौमझ़ौ की हाऊं धौतरी दी लोगु मांझ़िऐ मेल मिलाप कौरदै ऊ आशौ औन्दौ। हाऊं मेल मिलाप नाईं, पर झ़ौगड़ै कौराउंदै ऊ आशौ औन्दौ।

³⁵ हाऊं ता आशौ ऊ कि, ‘आदमी तेसरै बाबा कु, और छ़ोटी तिंआरी मां कु, और बोऊ तिंआरी शाशु कु अलग कौरु।’

³⁶ ‘आदमी रै दुश्मन ता तेसरै टौबरा रै लोग हुआई।’ ”

³⁷ “ज़ुण आपणै मां या बाब मुकु भी भौरी प्यारै ज़ाणाई, सै मैरै च़ेलै बौणनै रै लायक नाईं। और ज़ुण आपणै मांऊ या मांई मुकु भौरी प्यारै ज़ाणालौ, सै मैरै च़ेलै बौणनै रै लायक नाईं।

³⁸ और ज़ुण-कुण आपणौ क्रूस नाईं उठावा लौ, और मुं पिछ़ु नाईं आशा लौ सेऊ भी मैरौ च़ेलौ नाईं बौणी बौल़दौ।

³⁹ ज़ुण आपणै प्राण बच़ावालौ, सेऊ तिऊं नाश कौरा आ। और ज़ुण मेरी वज़ाह कु आपणै प्राण नाश कौरालौ, सेऊ तिऊं बौच़ावा।”

आच़्छ़ै कौरीयौ आच़्छ़ौ

⁴⁰ “ज़ो तुमु अपणावा लौ, सेऊ मुं अपणावा सा। ज़ो मुं अपणावा सा सेऊ मैरै भेज़णै वाल़ौ अपणावा सा।

⁴¹ ज़ो भविष्यवक्ता लै भविष्यवक्ता ज़ाणीऔ अपणावा लौ, सेऊ भविष्यवक्ता ज़िणौ परमेश्‍वरा कु इनाम पा आ। और ज़ो धौर्मी लै धौर्मी ज़ाणीऔ अपणावा लौ, सेऊ धौर्मिऊ ज़िणौ परमेश्‍वरा कु इनाम पा आ।

⁴² ज़ो कोई इऊं छ़ौटै मांझ़िऊ कु एकी लै मैरौ च़ेलौ ज़ाणीऔ सिरफ एक गिलासा शेल़ौ पाणी पिलावालै, हाऊं तुमुकै सौच़्च़ौ बोलाऊ, सेऊ ज़ुरुरी आपणौ इनाम पा आ।”